బీసీసీఐ తీరుపై ఆస్ట్రేలియా మహిళా మాజీ కెప్టెన్ లీసా స్టాలేకర్ అసంతృప్తి వ్యక్తం చేసింది. టీమ్ఇండియా మహిళా ప్లేయర్ వేదా కృష్ణమూర్తి పట్ల బోర్డు ఇటీవల వ్యవహరించిన తీరు సరిగ్గా లేదని ఆరోపించింది. ఈ మధ్యే వేదా తల్లి, సోదరి కరోనా కారణంగా చనిపోయారు. ఈ క్రమంలోనే ఇంగ్లాండ్ పర్యటన కోసం జట్టును ప్రకటించిన బోర్డు.. కృష్ణమూర్తిని ఎంపిక చేయలేదు. ఈ విషయమై ఆమెతో సంప్రదింపులు జరపకుండా నిర్ణయం తీసుకోవడం సరికాదని లీసా విమర్శించింది.
"ఇంగ్లాండ్ సిరీస్ కోసం వేదాను ఎంపిక చేయకపోవడం వాళ్ల దృష్టిలో సరైనదే కావొచ్చు. అయితే ఈ విషయమై ఆమెతో ఒక్కసారి కూడా మాట్లాడకుండా ఇలా చేయడం సరికాదు. కనీసం ఆమె పరిస్థితి ప్రస్తుతం ఎలా ఉందని కూడా ఆరా తీయలేదు!. ఇది నాకెంతో కోపం తెప్పించింది. ఓ నిజమైన అసోసియేషన్ కేవలం ఆటపైనే కాదూ తమ ఆటగాళ్ల గురించి ఆలోచించాలి. భారత మహిళా జట్టుకు ప్లేయర్స్ అసోసియేషన్ ఉండటం కచ్చితంగా అవసరమని అనుకుంటున్నాను"
-లిసా, ఆస్ట్రేలియా మాజీ సారథి
లిసా స్టాలేకర్.. కెరీర్లో 8టెస్టులు(416 పరుగులు), 125వన్డేలు(2728), 54టీ20(769)లు ఆడింది. వన్డేల్లో 1000 పరుగులు 100 వికెట్లు తీసిన తొలి మహిళా క్రికెటర్గా నిలిచింది.
ఇదీ చూడండి: ఇంగ్లాండ్ పర్యటనకు భారత మహిళల జట్టు ఇదే
