డబ్ల్యూటీసీ ఫైనల్ తర్వాత.. టీమ్ఇండియాకు బయోబబుల్ నుంచి కాస్త విముక్తి లభించనుంది. 20రోజుల పాటు వారు ఈ బుడగ జీవితానికి బ్రేక్ ఇవ్వనున్నారు. ఈ విషయాన్ని ఓ బీసీసీఐ అధికారి తెలిపారు.
ప్రస్తుతం భారత జట్టు జూన్(18-22) జరగబోయే ప్రపంచటెస్టు ఛాంపియన్షిప్ ఫైనల్ కోసం సౌథాంప్టన్లో ప్రత్యేకంగా ఏర్పాటు చేసిన బయోబుడగలో సాధన చేస్తోంది. ఈ ఫైనల్ పూర్తవ్వగానే అక్కడే ఉండి ఆగస్టు 4-సెప్టెంబరు 14వరకు ఇంగ్లాండ్తో సిరీస్ ఆడనున్నారు. ఈ రెండింటి మధ్య దాదాపు 40రోజుల పాటు ఆటగాళ్లకు విరామ సమయం దొరుకుతుంది. కాబట్టి ప్లేయర్స్ మానసిక ఆరోగ్యాన్ని దృష్టిలో ఉంచుకుని బుడగ నుంచి బయటకు వచ్చి వారు సరదాగా గడిపేలా ప్రణాళిక రచిస్తున్నారు. ఇందుకోసం జూన్ 24-జులై 14వరకు 20రోజుల పాటు వారికి బ్రేక్ ఇవ్వనున్నారు.
"న్యూజిలాండ్తో ఫైనల్ అవ్వగానే జున్ 24నుంచి ఆటగాళ్లకు బుడగ జీవితం నుంచి విరామం ఇవ్వనున్నాం. మళ్లీ ఇంగ్లాండ్ సిరీస్ కోసం జులై 14న వారు తిరిగి బబుల్లోకి అడుగుపెడతారు. ప్లేయర్స్కు మానసిక విశ్రాంతి అవసరం. యూకే దాటి బయటకు వెళ్లడం కష్టం. అకస్మాతుగా కేసులు పెరిగి ప్రయాణ ఆంక్షలు విధిస్తే మళ్లీ తిరిగి రాలేము. కాబట్టి ఈ విరామ సమయాన్ని సరదాగా గడిపేందుకు యూకేలోని ప్రాంతాలను మాత్రమే పరిశీలిస్తున్నాం.
- బీసీసీఐ అధికారి.
ఇంగ్లాండ్ పర్యటనకు వెళ్లేముందుకు డబ్ల్యూటీసీ ఫైనల్ తర్వాత బయోబబుల్ నుంచి ఆటగాళ్లకు కాస్త విరామం ఉంటే బాగుంటుందని ఇప్పటికే సూచించాడు సారథి కోహ్లీ. నిరంతరం బుడగలో ఉండటం కష్టమని చెప్పాడు.
ఇదీ చూడండి: WTC Final: 'కోహ్లీసేనతో పోటీ కఠినమే'
