KKR vs MI: ఈ ఐపీఎల్లో వరుసగా రెండు మ్యాచ్లు ఓడిన ముంబయి ఇండియన్స్.. బుధవారం కోల్కతా నైట్రైడర్స్తో తలపడనుంది. రాత్రి 7.30 గంటలకు పుణెలోని ఎంసీఏ వేదికగా మ్యాచ్ జరగనుంది. కోల్కతా ఇప్పటివరకు ఆడిన 3 మ్యాచ్ల్లో రెండు విజయాలతో పాయింట్ల పట్టికలో రెండో స్థానంలో ఉంది. ముంబయితో గెలిస్తే అగ్రస్థానంలోకి వెళ్తుంది. గత మ్యాచ్లో పంజాబ్ను 6 వికెట్ల తేడాతో ఓడించింది కోల్కతా. ముంబయి తొలుత దిల్లీ క్యాపిటల్స్ చేతిలో 4 వికెట్లు, రాజస్థాన్ రాయల్స్ చేతిలో 23 పరుగుల తేడాతో ఓడిపోయింది.
ముంబయిని ముంచుతున్న బౌలింగ్: ఐదుసార్లు ఐపీఎల్ ఛాంపియన్స్గా నిలిచిన ముంబయిని ఈసారి బౌలింగ్ వేధిస్తోంది. బుమ్రా, మురుగన్ అశ్విన్ మినహా ఎవరూ అంతగా ఆకట్టుకోలేకపోతున్నారు. పేసర్ బాసిల్ థంపి ధారాళంగా పరుగులు ఇస్తున్నాడు. ఆసీస్ ఆల్రౌండర్ డేనియల్ సామ్స్ పరుగులు ఎక్కువగా ఇవ్వకున్నా.. వికెట్లు తీయలేకపోతున్నాడు. డెత్ ఓవర్లలో బుమ్రాకు సహకరించే మరో బౌలర్ లేకపోవడం ముంబయికి లోటుగా కనిపిస్తోంది. బ్యాటింగ్లో రోహిత్కు కోల్కతాపై మంచి రికార్డు ఉంది. రోహిత్ అదే జోరు కొనసాగించాలని అభిమానులు ఆశిస్తున్నారు. మరో ఓపెనర్ ఇషాన్ కిషన్ ఆడిన రెండు మ్యాచ్ల్లో అర్ధసెంచరీలతో ఆకట్టుకున్నాడు. భారీ స్కోరు చేయాల్సి వస్తే ఈ ఇద్దరి ప్రదర్శనపైనే ఆధారపడి ఉంటుంది. సూర్యకుమార్ యాదవ్ ఈ మ్యాచ్కైనా అందుబాటులోకి వస్తాడో రాడో స్పష్టత లేదు. ఒకవేళ వస్తే.. ముంబయి బ్యాటింగ్ బలోపేతం అవుతుందనడంలో సందేహం లేదు. యువకెరటం తిలక్ వర్మ.. అద్భుతంగా రాణిస్తున్నాడు. రాయల్స్తో మ్యాచ్లో జట్టును గెలిపించినంత పనిచేశాడు. అన్మోల్ప్రీత్ సింగ్, కీరన్ పొలార్డ్, టిమ్ డేవిడ్ తమను తాము నిరూపించుకోవాల్సి ఉంది. అంతర్జాతీయ టీ-20 లీగ్ల్లో సత్తాచాటిన టిమ్.. ఇండియా పిచ్లపై రాణించలేకపోతున్నాడు. ఇతడి స్థానంలో బేబీ ఏబీ- డెవాల్డ్ బ్రేవిస్ను పరిశీలిస్తుందో చూడాలి.
సమతూకంగా కోల్కతా: కోల్కతాకు సంతృప్తి కలిగించే విషయం ఏంటంటే.. విండీస్ విధ్వంసకర ప్లేయర్ ఆండ్రీ రసెల్ ఫామ్లోకి రావడం. పంజాబ్తో జరిగిన మ్యాచ్లో 2 ఫోర్లు, 8 సిక్సర్లతో 31 బంతుల్లోనే 70 పరుగులు చేసి నాటౌట్గా నిలిచాడు. అతడి నుంచి మరోసారి అలాంటి ప్రదర్శనే ఆశిస్తోంది కేకేఆర్. ఓపెనర్లు వెంకటేశ్ అయ్యర్, అజింక్య రహానే ఫామ్ కలవరపెడుతోంది. కెప్టెన్ శ్రేయస్ అయ్యర్ ఇన్నింగ్స్ బాగానే ప్రారంభిస్తున్నా.. భారీ స్కోరుగా మలచలేకపోతున్నాడు. సామ్ బిల్లింగ్స్, నితీశ్ రాణా కూడా అంతలా రాణించింది లేదు. బౌలింగ్లో టీమ్ఇండియా సీనియర్ పేసర్ ఉమేశ్ యాదవ్ ముందుండి నడిపిస్తున్నాడు. 3 మ్యాచ్ల్లో 8 వికెట్లతో పర్పుల్ క్యాప్ ఉమేశ్ దగ్గరే ఉంది. టిమ్ సౌథీ, శివం మావి.. ఉమేశ్ చక్కటి సహకారం అందిస్తే ముంబయిని తక్కువ స్కోరుకే పరిమితం చేయొచ్చు. కట్టుదిట్టంగా బంతులు వేసే మిస్టరీ స్పిన్నర్లు సునీల్ నరైన్, వరుణ్ చక్రవర్తి ఎలాగూ ఉండనే ఉన్నారు. ఇరుజట్ల రికార్డు చూస్తే.. ముంబయి చాలా ముందంజలో ఉంది. ముంబయి ఇండియన్స్ 22 సార్లు గెలిస్తే.. కోల్కతా 7 మ్యాచ్ల్లోనే నెగ్గింది.
ఇవీ చూడండి: Korea Open: రెండో రౌండ్కు దూసుకెళ్లిన సింధు, శ్రీకాంత్
