పంజాబ్తో మ్యాచ్లో 196 పరుగుల భారీ లక్ష్యాన్ని అలవోకగా ఛేదించింది దిల్లీ క్యాపిటల్స్. అయితే ఈ విజయంలో ఓపెనర్లు ధావన్-పృథ్వీ జోడీ మరోసారి కీలక పాత్ర పోషించారు. 'గబ్బర్' కొద్దిలో సెంచరీ చేసే అవకాశాన్ని చేజార్చుకున్నాడు. యువ బ్యాట్స్మన్ షా ఉన్న కాసేపట్లో ప్రత్యర్థికి చేయాల్సిన నష్టం చేసే వెళ్లాడు. అయితే వీరి ఆటతీరు వెనుక ఉన్న కారణాలను తాజాగా పంచుకున్నారు.
స్ట్రైక్ రేట్పై దృష్టి సారించా..
ఇటీవల మ్యాచ్ల్లో తన స్ట్రైక్ రేట్ మెరుగుపడటం గురించి స్పందించాడు శిఖర్ ధావన్. అందుకోసం కాస్త రిస్క్ తీసుకున్నట్లు వెల్లడించాడు. "స్ట్రైక్ రేట్ పెంచుకోవాలని అనుకున్నాను. మార్పులకు భయపడను. సవాళ్లను ఎల్లప్పుడూ స్వీకరిస్తాను. కొన్ని షాట్లపై ప్రత్యేకంగా దృష్టిసారించాను. దీంతో నా స్లాగ్ షాట్ మెరుగైంది. ఇప్పుడు మరింత స్వేచ్ఛగా బ్యాట్ ఝుళిపిస్తున్నాను. చాలా ఏళ్ల నుంచి ఆడుతున్నాను కాబట్టి రిలాక్స్డ్గా బ్యాటింగ్ చేస్తున్నాను" అని ధావన్ చెప్పుకొచ్చాడు.
ఇదీ చదవండి: టీ20 వరల్డ్కప్లో డివిలియర్స్ రీ-ఎంట్రీ!
టెక్నిక్లో స్వల్ప మార్పులు..
గత ఆస్ట్రేలియా పర్యటనలో విఫలమై విమర్శల పాలైన పృథ్వీ.. తన టెక్నిక్లో స్వల్ప మార్పులు చేసుకున్నట్లు తెలిపాడు. అనంతరం విజయ్ హజారే టోర్నీలో సత్తా చాటిన ఈ యువ బ్యాట్స్మన్.. ఏకంగా 827 పరుగులు సాధించాడు. ఐపీఎల్లో చెన్నైతో జరిగిన తొలి మ్యాచ్లో 38 బంతుల్లోనే 72 పరుగులు చేసిన పృథ్వీ.. తన ఫామ్ను చాటుకున్నాడు.
"ఆసీస్ పర్యటనలో నేను బౌల్డ్ ఔట్గా వెనదిరిగడం వల్ల నాలో ఆందోళన మొదలైంది. ఆసీస్ నుంచి రాగానే ఈ విషయంపై దృష్టి సారించాను. మా కోచ్ ప్రశాంత్ శెట్టి, ప్రవీణ్ ఆమ్రేతో కలిసి ఈ విషయంపై చర్చించాను. విజయ్ హజారే ట్రోఫీలో నా సహజమైన ఆట ఆడాను. ఇందులో కేవలం చిన్న టెక్నిక్ మార్పు చేసుకున్నాను. అప్పటినుంచి నా బ్యాటింగ్ మెరుగుపడింది" అని పృథ్వీ తెలిపాడు.
ఐపీఎల్కు ముందు కావాల్సినంత ప్రాక్టీస్ మ్యాచ్లు లేనప్పటికీ.. పాంటింగ్, ఆమ్రే, ప్రశాంత్లతో మంచి ప్రాక్టీస్ సెషన్లు లభించాయని పృథ్వీ తెలిపాడు. "క్రీజులో స్వేచ్ఛగా బ్యాటింగ్ చేయమని పాంటింగ్ చెప్పాడు. మొదటి 6 ఓవర్లలో భాగస్వామ్యాలు నెలకొల్పడం అవసరమని పేర్కొన్నాడు. బ్యాటింగ్కు వెళ్లే ముందు శిఖర్తో కలిసి ప్రణాళికలు సిద్ధం చేసుకుంటాను" అని షా పేర్కొన్నాడు.
ఇదీ చదవండి: ఫ్రెంచ్ ఓపెన్లో బరిలోకి దిగుతా: ఫెదరర్
