దిల్లీతో శనివారం జరిగిన మ్యాచ్లో చెన్నై జట్టు 7 వికెట్ల తేడాతో ఓడిపోయింది. బ్యాటింగ్లో రైనా, కరన్, రాయుడు ఆకట్టుకున్నప్పటికీ.. బౌలింగ్లో తేలిపోయింది. అయితే రెండో మ్యాచ్కు సిద్ధమవుతున్న సీఎస్కేకు మరో దెబ్బ తగిలింది. విదేశీ పేసర్లు ఎంగిడి, బెహ్రాన్డార్ఫ్.. ఈ పోరులో పాల్గొనలేకపోతున్నారని కోచ్ స్టీఫెన్ ఫ్లెమింగ్ చెప్పాడు. తమ దేశాల్లో మ్యాచ్లు ఆడుతున్న వారిద్దరూ, భారత్ వచ్చి క్వారంటైన్లో ఉండాల్సి ఉంటుందని.. అందుకే రెండో మ్యాచ్కు అందుబాటులో ఉండరని కోచ్ తెలిపాడు.
తొలి మ్యాచ్లో తాము బ్యాటింగ్ బాగా చేసినప్పటికీ, బౌలింగ్ విషయంలో మెరుగుపడాలి అని ఫ్లెమింగ్ అన్నాడు. ఈ విషయంలో ప్రత్యేక దృష్టి సారిస్తున్నట్లు తెలిపాడు. కరోనా కారణంగా తటస్థ వేదికల్లో ఆడుతున్న జట్లన్నీ.. ఆ వాతావరణాన్ని అలవాటు చేసుకునేందుకు కొంచెం సమయం పడుతుందని చెప్పాడు. ముంబయి ఇండియన్స్ తొలి మ్యాచ్ ఓడిన విషయాన్ని ఈ సందర్భంగా గుర్తుచేశాడు.
తొలి మ్యాచ్లో త్వరగా వికెట్లు పోగొట్టుకున్నా, తమ బ్యాట్స్మెన్ భారీ స్కోరు చేయడం సానుకూల సంకేతం అని ఫ్లెమింగ్ అన్నాడు. ఏప్రిల్ 16న జరిగే తర్వాతి మ్యాచ్లో చెన్నై.. పంజాబ్ కింగ్స్తో తలపడనుంది.
ఇది చదవండి: ఐపీఎల్: స్లో ఓవర్ రేట్.. ధోనీకి జరిమానా
