ఐపీఎల్ 14వ సీజన్లో భాగంగా నేడు కోల్కతా నైట్ రైడర్స్, రాజస్థాన్ రాయల్స్ మధ్య మ్యాచ్ జరగనుంది. ఈ ఆసక్తికర పోరుకు వాంఖడే వేదిక కానుంది. ఇప్పటికే చెరో నాలుగు మ్యాచ్లు ఆడిన ఇరుజట్లు మూడు ఓటములను మూటగట్టుకున్నాయి. ఇక పాయింట్ల పట్టికలో శాంసన్ సేన చివరి స్థానంలో ఉండగా.. మోర్గాన్ సేన చివరి నుంచి మూడో స్థానంలో ఉంది.
కోల్కతా గెలుపు బాట పట్టేనా..
చివరగా చెన్నైతో జరిగిన మ్యాచ్లో 220 పరుగుల భారీ లక్ష్యాన్ని ఛేదించేలా కనిపించిన కోల్కతా.. విజయానికి కొద్ది దూరంలో నిలిచిపోయింది. టాపార్డర్ విఫలమైనప్పటికీ మిడిలార్డర్ ఫర్వాలేదనిపించింది. ఓపెనర్లు గిల్-రానాతో పాటు కెప్టెన్ మోర్గాన్ రాణిస్తే బ్యాటింగ్కు తిరుగుండదు.
ఇక బౌలింగ్లో వరుణ్ చక్రవర్తి, ఆండ్రూ రస్సెల్ ఫర్వాలేదనిపిస్తున్నారు. ప్రసిధ్ కృష్ణ, కమిన్స్ స్థిరంగా రాణించకపోగా.. భారీగా పరుగులు ఇస్తున్నారు. దీంతో ప్రత్యర్థి జట్లు పరుగుల పండగ చేసుకుంటున్నాయి. వీరితో పాటు షకిబుల్ హసన్ ఆల్రౌండ్ ప్రదర్శన చేయాలని కేకేఆర్ కోరుకుంటోంది.
ఇదీ చదవండి: తడబడిన ముంబయి.. పంజాబ్ లక్ష్యం 132
రాజస్థాన్ అంచనాలు అందుకునేనా..
చివరగా బెంగళూరుతో జరిగిన మ్యాచ్లో ప్రధాన బ్యాట్స్మెన్ విఫలమైనప్పటికీ.. మంచి స్కోరు సాధించింది రాజస్థాన్ జట్టు. కానీ, బెంగళూరు బ్యాట్స్మెన్ ఆర్ఆర్ బౌలర్లపై పూర్తి ఆధిపత్యం చెలాయించారు. వికెట్ నష్టపోకుండా లక్ష్యాన్ని ఛేదించారు. గత మ్యాచ్లో శివమ్ దూబే, తెవాతియా, పరాగ్ రాణించడం చెప్పుకోదగ్గ అంశం. జాస్ బట్లర్, వోహ్రా, మిల్లర్ ఆకట్టుకోలేకపోతున్నారు. తొలి మ్యాచ్లో సంజూ సెంచరీతో అదరగొట్టినా.. తర్వాత ఆ స్థాయిలో ఆడలేదు.
ఇక బౌలింగ్లో సకారియా, క్రిస్ మోరిస్, ముస్తాఫిజుర్ రెహ్మన్ రాణిస్తున్నా.. గోపాల్, తెవాతియా, పరాగ్ ఆకట్టుకోలేకపోతున్నారు. ఈ స్పిన్నర్లు రాణిస్తే రాజస్థాన్కు ఎదురుండదు.
ఇదీ చదవండి: జింబాబ్వే చేతిలో ఖంగుతిన్న పాకిస్థాన్
