ముంబయిలో స్టార్ ప్లేయర్లకు కొదువలేదు. వేలం ఏదైనా... అత్యుత్తమ ఆటగాళ్లను కొనుగోలు చేస్తుంది. వేలం సమయంలో లౌక్యం ప్రదర్శించి అప్పుడప్పుడు ఆటగాళ్ల ధరను కూడా అమాంతం పెంచి బిడ్డింగ్ నుంచి తప్పుకున్న సందర్భాలూ ఉన్నాయి. అలాంటి ముంబయి యాజమాన్యం 23 ఏళ్ల ఆస్ట్రేలియన్ ఆల్రౌండర్ కామెరూన్ గ్రీన్ను ఏకంగా రూ.17.5 కోట్లకు కొనుగోలు చేసింది. ముంబయి అంత మొత్తం వెచ్చించి గ్రీన్ను కొనడంతో అతడిపై అంచనాలు అమాంతం పెరిగిపోయాయి.అయితే భారీ అంచనాలతో బరిలోకి దిగిన గ్రీన్.. ఈ సీజన్లో మొదట్లో పెద్దగా ఆకట్టుకోలేకపోయాడు. దీంతో 17 కోట్లు బూడిదలో పోసిన పన్నీరులా అయ్యాయంటూ నెటిజన్లు తీవ్రంగా విమర్శించారు. ఇలాంటి జట్టుతో కప్ కొట్టేది ఎలా అంటూ ముంబయి ఫ్యాన్స్ నిరాశపడ్డారు.
విమర్శించిన నోటనే ప్రశంసలు.. అయితే గ్రీన్ దండగా అన్న ముంబయి అభిమానులే గత రెండు ఇన్నింగ్సుల్లో అతడి ఆటతీరు చూసి పండగ చేసుకుంటున్నారు. గతవారం హైదరాబాద్తో మ్యాచ్తో ఫామ్లోకి వచ్చిన గ్రీన్ శనివారం పంజాబ్పై అదే జోరు కొనసాగించాడు. సన్రైజర్స్పై 64 పరుగులతో నాటౌట్గా నిలిచాడు. ఆ ఇన్నింగ్స్ గాలివాటం కాదు అన్నట్టుగా నిన్నటి మ్యాచ్లో 67 పరుగులతో జట్టును విజయం అంచుల దాకా తీసుకొచ్చాడు. అటు బౌలింగ్లోనూ రాణిస్తున్నాడు. ఇప్పటివరకూ సీజన్లో 5 వికెట్లు పడగొట్టాడు. 166 పరుగులు తీశాడు.
ఫామ్లోకి సూర్యభాయ్ .. తన భీకరమైన ఆటతీరుతో ప్రత్యర్థి బౌలర్లను చెమటలు పట్టించే సూర్య... గత కొద్ది కాలంగా పేలవ ఫామ్ను కొనసాగిస్తున్నాడు. ఈ ఐపీఎల్ సీజన్లో కూడా మొదటి నుంచి తనదైన శైలిలో బ్యాటింగ్ చేయకండా విఫలమవుతూ వస్తున్నాడు. దీంతో ముంబయి అభిమానులు తీవ్ర అసంతృప్తికి గురయ్యారు. "ఏంటి సూర్య.. నువ్వేనా ఇలా ఆడేది" అంటు సోషల్ మీడియాలో ఫైరయ్యారు. మిస్టర్ 360 గా పేరొందిన సూర్య.. డక్ కౌట్లకు కేరాఫ్ అడ్రస్గా మారుతున్నాడా.. అన్నంత సందేహం నెలకొంది అందరిలోనూ. అయితే గతరాత్రి పంజాబ్పై ఛేదనలో రోహిత్ ఔటవగానే క్రీజులోకి ఎంట్రీ ఇచ్చాడు సూర్య.. అంతే ఆకాశమే హద్దుగా చెలరేగిపోయాడు. వచ్చీ రావడంతోనే బౌండరీలతో విరుచుకుపడ్డాడు. కొండంత లక్ష్యం చిన్నదయిపోతుందన్న రేంజ్లో ప్రత్యర్థి బౌలర్లపై దాడి చేశాడు. 26 బంతుల్లోనే 3 సిక్సర్లు.. 7 ఫోర్లతో 57 పరుగులు చేశాడు. స్టేడియం అంతా సూర్యా.. సూర్యా...నామంతో హోరెత్తిపోయింది.. చివర్లో అర్షదీప్ బౌలింగ్లో క్యాచ్గా వెనుదిరిగాడు. సూర్య ఔట్తో పంజాబ్ బౌలర్లు ఊపిరిపీల్చుకున్నారు. ఆఖర్లో టిమ్ డెవిడ్ పోరాడినా మరో ఎండ్లో వికెట్లు పడటంతో పంజాబ్ గెలుపొందింది.
ఇవీ చదవండి:
