ఇండియన్ ప్రీమియర్ లీగ్.. ఈ పేరు చెప్పగానే క్రికెట్ అభిమానుల్లో పూనకాలు వస్తాయి. అయితే ఈ మెగాటోర్నీలో ముంబయి ఇండియన్స్కు ఉన్న క్రేజ్ గురించి ప్రత్యేకంగా చెప్పనక్కర్లేదు. ఏ టీమ్కు సాధ్యం కాని రీతిలో ఏకంగా ఐదు సార్లు ట్రోఫీని ముద్దాడి బలమైన జట్టుగా అవతరించింది. కానీ గత సీజన్లో మాత్రం పూర్తిగా విఫలమై పాయింట్ల పట్టికలో ఆఖరి స్థానంలో నిలిచింది. అయితే ప్రస్తుతం ఆసక్తిగా సాగుతున్న తాజా సీజన్లోనూ మార్చి 2న రాయల్ ఛాలెంజర్స్ బెంగళూరుతో జరిగిన మ్యాచ్లో ఓడి.. ఓటమితో సీజన్ను ఆరంభించింది. ముంబయి జట్టులో హైదారాబాద్ కుర్రాడు తిలక్ వర్మ మినహా ఎవరూ రాణించలేకపోయారు.
అయితే ఐపీఎల్లో ఆడిన తమ తొలి మ్యాచ్లో ఓడిపోవడం ముంబయి ఇండియన్స్ జట్టుకు కొత్తేం కాదు. గత పదేళ్లుగా ఆ జట్టుకు ఇలా ఫస్ట్ మ్యాచులో ఓడిపోపడం అలవాటుగా మారిపోయింది. 2013 నుంచి ఆ టీమ్.. ఐపీఎల్లో ఆడిన తమ తొలి మ్యాచ్ను గెలవలేదు. ఓటమితోనే సీజన్లను ఆరంభించింది. అభిమానులు కూడా.. తొలి మ్యాచ్ను దేవుడికి ఇచ్చేయడం అలవాటే అంటూ సోషల్మీడియాలో ట్రోల్ కూడా చేస్తుంటారు.
2013లో ముంబయి ఇండియన్స్.. బెంగళూరు వేదికగా రాయల్ ఛాలెంజర్స్ బెంగళూరుతో జరిగిన మ్యాచ్లో రెండు పరుగుల తేడాతో ఓటమిని అందుకుంది. కానీ ఆ సీజన్ ముంబయి.. తమ తొలి ఐపీఎల్ ట్రోఫీని ముద్దాడింది. 2014, 2015లో మళ్లీ సేమ్ సీన్ రిపీట్ అయింది. ఆ రెండు సీజన్లోనూ కోల్కతా నైట్ రైడర్స్తో ఆడిన ముంబయి... రెండు సార్లు ఓడిపోయింది. అయితే 2015లో మాత్రం టైటిల్ను దక్కించుకుంది.
2016, 17లో రైజింగ్ పుణె సూపర్ జెయింట్స్తో ఆడిన ఫస్ట్ మ్యాచ్లో ముంబయి ఇండియన్స్ తొమ్మిది, ఏడు వికెట్ల తేడాతో ఓటమిని ఖాతాలో వేసుకుంది. అయితే 2017 సీజన్ ఛాంపియన్గా నిలిచింది. 2018లో చెన్నై సూపర్ కింగ్స్తో జరిగిన మ్యాచ్లోనూ ఒక్క వికెట్ తేడాతో ఓడిపోయింది. 2019లో దిల్లీ క్యాపిటల్స్పై 37 పరుగుల తేడాతో పరాజయాన్ని అందుకుంది. అయితే 2019లో ముంబయినే సీజన్ విజేత.
ఇక 2020లో చెన్నై సూపర్ కింగ్స్తో జరిగిన మ్యాచ్లో ఐదు వికెట్ల తేడాతో ఓడిన రోహిత్ సేన.. ఆ సీజన్లో టైటిల్ విన్నర్గా నిలిచింది. 2021లో చెన్నై వేదికగా రాయల్ ఛాలెంజర్స్ బెంగళూరుతో జరిగిన మ్యాచ్లో రెండు వికెట్ల తేడాతో ఓడింది. ఇక 2022 సీజన్లో ముంబయి.. తన తొలి మ్యాచ్లో ఓటమిని మూటగట్టుకుంది. సీజన్ మొత్తం చెత్త ప్రదర్శన చేసింది. ఇక తాజాగా చిన్నస్వామి స్టేడియం వేదికగా ఆర్సీబీతో జరిగిన మ్యాచ్లో ముంబయి అదే ఫలితాన్ని రిపీట్ చేసింది.
2013కు ముందు.. ముంబయి.. 2013కు ముందు 2009, 2010, 2011, 2012 సీజన్లలో తాము ఆడిన ఫస్ట్ మ్యాచుల్లో విజయం సాధించింది. కానీ ఆ సీజన్లలో ముంబయి ట్రోఫీని అందుకోలేకపోయింది. మరి వరుసగా పదేళ్ల పాటు తమ ఐపీఎల్ ఫస్ట్ మ్యాచ్లో ఓటమిని అందుకుంటున్న ముంబయి.. ఈ సీజన్లో 2013, 2015, 2017, 2019, 2020 మ్యాజిక్ను రిపీట్ చేసి.. సీజన్ విన్నర్గా నిలుస్తుందో లేదో చూడాలి...
ఇదీ చూడండి: IPL 2023: దినేశ్ కార్తీక్-సిరాజ్.. ఒకరేమో ప్రపంచ రికార్డు.. మరొకరేమో..
