యావత్ క్రికెట్ అభిమానులు ఎంతో మెచ్చే ఇండియన్ ప్రీమియర్ లీగ్ 16వ సీజన్ మరికొద్ది రోజుల్లో ప్రారంభం కానుంది. అయితే ఐపీఎల్ వస్తుందంటే చాలు.. రికార్డుల గురించి మాట్లాడుకుంటూ ఉంటాం. అత్యధిక రన్స్, అత్యధిక సెంచరీలు, ఫాస్టెస్ట్ సెంచరీలు, అత్యధిక సిక్స్లు వంటి సూపర్ రికార్డుల గురించి చాలా మంది తెలుసు. అయితే ఈ మెగా లీగ్లో ఎక్కువ సార్లు డకౌటైన ప్లేయర్స్ గురించి మీకు తెలుసా? ఇప్పటికే 15 సీజన్లు పూర్తి చేసుకున్న ఐపీఎల్లో పది కంటే ఎక్కువసార్లు డకౌటైన ప్లేయర్లు చాలా మందే ఉన్నారు.
లీగ్ చరిత్రలో అత్యంత విజయవంతమైన జట్టుగా పేరు సంపాదించిన ముంబయి ఇండియన్స్ కెప్టెన్ రోహిత్ శర్మ కూడా ఉండటం విశేషం. అత్యధిక పరుగులు, సిక్స్లు, సెంచరీల రికార్డులతోపాటు ఐపీఎల్లో రోహిత్ పేరిట ఈ డకౌట్స్ రికార్డు కూడా ఉంది. 2008లో జరిగిన తొలి సీజన్ నుంచి ఐపీఎల్ ఆడుతున్న రోహిత్.. ఇప్పటి వరకూ 222 ఇన్నింగ్స్ ఆడాడు. అందులో ఏకంగా 14 సార్లు డకౌటయ్యాడు. అత్యధిక డకౌట్స్ లిస్టులో అతడే టాప్లో ఉన్నాడు.
అంతే కాదు.. ఈ అత్యధిక డకౌట్స్ అయిన ప్లేయర్ల జాబితాలో విదేశీ ప్లేయర్స్ కంటే భారత క్రికెటర్లే ఎక్కువగా ఉండటం గమనార్హం. ఐపీఎల్లో అత్యధిక సార్లు డకౌట్ అయిన టాప్ 10 లిస్టులో మొదటి 8 మంది ఇండియన్ బ్యాటర్లే. రోహిత్ తోపాటు రహానే, రాయుడు లాంటి ప్లేయర్స్ ఈ లిస్ట్లో ఉన్నారు.
- ఐపీఎల్లో అత్యధిక డకౌట్స్
- రోహిత్ శర్మ - 14
- మణ్‌దీప్ సింగ్ - 14
- పీయూష్ చావ్లా - 13
- హర్భజన్ సింగ్ - 13
- పార్థివ్ పటేల్ - 13
- అజింక్య రహానే - 13
- అంబటి రాయుడు - 13
- దినేశ్ కార్తీక్ - 13
- రషీద్ ఖాన్ - 12
- సునీల్ నరైన్ - 12
మార్చి 31వ తేదీన ఐపీఎల్ 16వ సీజన్ ప్రారంభం కానుంది. తొలి మ్యాచ్లో డిఫెండింగ్ ఛాంపియన్ గుజరాత్ టైటాన్స్, నాలుగు సార్లు టైటిల్ను గెలుచుకున్న చెన్నై సూపర్ కింగ్స్ జట్టు తలపడనున్నాయి. అహ్మదాబాద్లోని నరేంద్ర మోదీ స్టేడియంలో ఈ మ్యాచ్ జరగనుంది. అంతకన్నా ముందు పలు సాంస్కృతిక కార్యక్రమాలు చేపట్టేందుకు బీసీసీఐ ప్లాన్ చేస్తోంది. ఇటీవలే ఆస్కార్ గెలుచుకున్న నాటు నాటు పాటకు డ్యాన్స్ ప్రదర్శన ఉన్నట్లు వార్తలు వస్తున్నాయి.
