ఐపీఎల్ సీజన్ 16లో రికార్డుల పరంపర కొనసాగుతోంది. కొందరు ఆటగాళ్లు కెరీర్లో అత్యుత్తమ రికార్డులు నెలకొల్పుతుంటే.. మరి కొందరు పేలవ ప్రదర్శనతో చెత్త రికార్డులను తమ ఖాతాలో వేసుకుంటున్నారు. తాజాగా ఈ జాబితాలో కృనాల్ పాండ్య వచ్చి చేరాడు. రీసెంట్గా లఖ్నవూ సూపర్ జెయింట్స్ జట్టు బాధ్యతలు స్వీకరించిన కృనాల్.. అటు కెప్టెన్గా ఇటు బ్యాటర్గా రెండింటిలోనూ విఫలమవుతున్నాడు. చెన్నై సూపర్ కింగ్స్ మ్యాచ్తో ఫుల్ టైం కెప్టెన్గా పరిచయం అయ్యాడు కృనాల్.
ఆ మ్యాచ్లో కెప్టెన్గా ముందుండి నడిపించాల్సిన కృనాల్ డకౌట్గా వెనుదిరిగాడు. తర్వాత తన తమ్ముడు హార్దిక్ సారధ్యం వహిస్తున్న గుజరాత్ టైటాన్స్తో ఆడిన మ్యాచ్లోనూ సున్నా చుట్టేశాడు. ఈ క్రమంలో కెప్టెన్గా బాధ్యతలు స్వీకరించిన తర్వాత ఆడిన మొదటి రెండు మ్యాచుల్లోనూ గోల్డెన్ డకౌట్గా పెవిలియన్ చేరి కెరీర్లో చెత్త రికార్డును మూటగట్టుకున్నాడు. ఐపీఎల్ చరిత్రలో కెప్టెన్గా ఆడిన మొదటి రెండు మ్యాచ్ల్లో గోల్డెన్ డకౌట్ అవ్వడం ఇదే మొదటిసారి.
అంతకుముందు రాయల్ ఛాలెంజర్స్ బెంగళూరుతో జరిగిన మ్యాచ్లో స్వల్ప లక్ష్య ఛేదనలో కృనాల్ 14 పరుగులకే పరిమితమయ్యాడు. ఇలా బ్యాటర్గా, మరోవైపు పటిష్ఠంగా ఉన్న జట్టును ముందుకు నడిపించలేక కెప్టెన్గా కూడా విఫలమవుతున్నాడు. ఈ ఐపీఎల్ సీజన్లో 11 మ్యాచ్లు ఆడిన లఖ్నవూ సూపర్ జెయింట్స్ ప్రస్తుతం 11 పాయింట్లతో మెరుగైన (3వ) స్థానంలోనే ఉందని చెప్పవచ్చు. ఇకపై ఆడే మూడు మ్యాచ్లు లఖ్నవూకు ముఖ్యమైనవే. మరి కృనాల్ ఒత్తిడిని అధిగమించి కెప్టెన్గా సక్సెఫుల్ కావాలని అతడి అభిమానులు ఆశిస్తున్నారు. ఫ్లే ఆఫ్కు చేరాలంటే రన్రేట్ కూడా కీలకం కానుంది అందుకని కృనాల్ తన ఆటపై ప్రత్యేకంగా దృష్టి సారించి ఆల్ రౌండర్గా నిరూపించుకోవాల్సిన అవసరం ఉంది.
ఇకపోతే కృనాల్ను మొదటగా ముంబయి ఇండియన్స్ జట్టు 2016 వేలంలో రూ. 2 కోట్లకు దక్కించుకుంది. ఆరు సీజన్లు ముంబయి విజయాల్లో కీలకంగా మారాడు. కాగా గత సీజన్ నుంచి కృనాల్ లఖ్నవూ జట్టుకు ఆడుతున్నాడు. ఐపీఎల్ మొత్తంగా 96 ఇన్నింగ్స్ల్లో 1,448 పరుగులు చేయగా.. 101 ఇన్నింగ్స్ల్లో 67 వికెట్లు పడగొట్టాడు. ఈ సీజన్లో 11 ఇన్నింగ్స్ల్లో కలిపి కేవలం 122 పరుగులు చేసిన కృనాల్ బౌలింగ్లో 6 వికెట్లే పడగొట్టి చెత్త ప్రదర్శన కొనసాగిస్తున్నాడు.
ఇంకోవైపు తన తమ్ముడు హార్దిక్ పాండ్య కెప్టెన్గా అద్భుతంగా రాణిస్తున్నాడు. గత సీజన్ నుంచి హార్దిక్ గుజరాత్ జట్టుకు సారధ్యం వహిస్తున్నాడు. కెప్టెన్గా ఆడిన మొదటి సీజన్లోనే తమ జట్టును టైటిల్ విజేతగా నిలబెట్టాడు. కాగా వీరిద్దరూ 2021 సీజన్ వరకూ ముంబయి జట్టులో కీలక ఆటగాళ్లు. 2022లో రిటెన్షన్ పద్దతిలో ముంబయి ఈ ఇద్దరినీ వదులుకొంది.
ఐపీఎల్ చరిత్రలో తొలిసారి..
ఆదివారం నాటి లఖ్నవూ, గుజరాత్ మ్యాచ్ మరో అద్భుత ఘట్టానికి వేదికైంది. ఈ మ్యాచ్లో హార్దిక్ పాండ్య, కృనాల్ పాండ్య అన్నదమ్ములు తలపడ్డారు. ఇదివరకు అన్నదమ్ములు.. వేర్వేరు జట్లకు, ఒకే జట్టుకు ఆడిన సందర్భాలు ఉన్నాయి. కానీ, తొలిసారి ప్రత్యర్థి జట్లకు కెప్టెన్లుగా ఉన్న సోదరులుగా హర్దిక్ పాండ్య, కృనాల్ పాండ్య రికార్డు సృష్టించారు.
