Dhoni IPL Matches : ఐపీఎల్లో చెన్నై సూపర్ కింగ్స్ సారథి మహేంద్రసింగ్ ధోనీ ఓ అరుదైన ఘనతను అందుకోనున్నాడు. ఐపీఎల్ ప్రారంభమైన 2008 సంవత్సరం నుంచి మహీ ఇప్పటివరకు 16 సీజన్లలో కలిపి 249 మ్యాచ్లు ఆడాడు. ఆదివారం గుజరాత్ తో జరిగే ఫైనల్తో అతడు 250 మ్యాచ్లు పూర్తి చేసుకోనున్నాడు.
ఈ క్రమంలో ఈ ఘనత సాధించిన మొదటి ఆటగాడిగా ధోనీ రికార్డులకెక్కనున్నాడు. ధోనీ తర్వాతి స్థానాల్లో వరుసగా ముంబయి ఇండియన్స్ కెప్టెన్ రోహిత్ శర్మ(243), టీమ్ఇండియా సీనియర్ బ్యాటర్ దినేశ్ కార్తీక్(242), రాయల్ ఛాలెంజర్స్ బెంగళూరు స్టార్ బ్యాటర్ విరాట్ కోహ్లీ (237), చెన్నై సూపర్ కింగ్స్ ఆల్ రౌండర్ రవీంద్ర జడేజా (225)లు ఉన్నారు.
Dhoni IPL Matches Csk Rps : ఐపీఎల్ ప్రారంభం నుంచి ధోనీ చెన్నై ఫ్రాంచైజీతోనే ఉన్నాడు. మధ్యలో రెండు సీజన్ల పాటు (2016, 2017) చెన్నై సూపర్ కింగ్స్, రాజస్థాన్ రాయల్స్ జట్లపై బోర్డు నిషేధం విధించింది. ఆ రెండు సంవత్సరాల పాటు ధోనీ.. రైజింగ్ పూణే సూపర్ జెయింట్స్ జట్టుకు ప్రాతినిథ్యం వహించాడు. ఆ జట్టు తరఫున 30 మ్యాచ్లు ఆడిన ధోనీ చెన్నై తరఫున 219 మ్యాచ్లు ఆడాడు.
ఇప్పటి వరకు ఆ రెండు సీజన్లు మినహా మిగిలిన 14 సీజన్ల పాటు ధోనీనే చెన్నై కెప్టెన్. తన సారథ్యంలో ప్రస్తుత సీజన్తో కలిపి చెన్నై 12 సార్లు ఫైనల్ చేరింది. 2010,2011,2018,2021 సీజన్లలో టైటిల్ విజేతగా నిలిచింది. దీంతో అత్యధిక ఐపీఎల్ ట్రోఫీలు నెగ్గిన జట్ల జాబితాలో ముంబయి ఇండియన్స్ (5) తర్వాత చెన్నై రెండో స్థానంలో ఉంది.
ధోనీ ఐపీఎల్ ఆల్టైమ్ రికార్డులు..
- ఐపీఎల్ 16 సీజన్లలో 249 మ్యాచ్ల్లో 217 ఇన్నింగ్స్లు ఆడిన ధోనీ 39 సగటున 136 స్ట్రయిక్ రేట్తో 5082 పరుగులు చేశాడు. ఇందులో 24 అర్ధ సెంచరీలు ఉన్నాయి.
- ఐపీఎల్లో అత్యధిత పరుగుల వీరుల లిస్ట్లో ధోనీది ఏడో స్థానం. విరాట్ కోహ్లీ 7263 పరుగులతో టాప్లో కొనసాగుతున్నాడు.
- కెప్టెన్గా ధోనీ 4622 పరుగులతో రెండో ప్లేస్లో ఉన్నాడు. ధోనీ కంటే ముందు విరాట్ కోహ్లీ 4881 ఫస్ట్ ప్లేస్లో ఉన్నాడు.
- ఐపీఎల్లో ధోనీ 239 సిక్సర్లు బాదాడు. అత్యధిక సిక్స్లు బాదిన భారత ఆటగాళ్ల జాబితాలో రెండో స్థానంలో ఉండగా.. ఓవరాల్గా నాలుగో స్థానంలో ఉన్నాడు.
- వికెట్ కీపర్గా ధోనీ 178 డిస్మిసల్స్తో ప్రథమ స్థానంలో ఉన్నాడు. ఇందులో 137 క్యాచ్లు, 41 స్టంపింగ్లు ఉన్నాయి. ఈ జాబితాలో వరుసగా దినేశ్ కార్తీక్ 169, వృద్ధిమాన్ సాహా 106, రాబిన్ ఊతప్ప 90, పార్థీవ్ పటేల్ 81తో మొదటి ఐదు స్థానాల్లో భారత ఆటగాళ్లే ఉండటం విశేషం.
ఇకపోతే ధోనీ కెప్టెన్గా చెన్నై జట్టుకు నాలుగు సార్లు ట్రోఫీ అందించాడు. ఈ జాబితాలో అత్యధికంగా రోహిత్ శర్మ ముంబయి ఇండియన్స్ (5)కు టైటిల్స్ అందించి టాప్లో ఉన్నాడు. ఆదివారం జరిగే ఫైనల్లో చెన్నై గుజరాత్పై గెలిస్తే.. ధోనీ, రోహిత్ సరసన నిలుస్తాడు.
