ఇండియన్ ప్రీమియర్ లీగ్ 16వ సీజన్లో భాగంగా.. దిల్లీ, ముంబయి జట్ల మధ్య ఆసక్తికరమైన మ్యాచ్ ప్రారంభమైంది. అందులో భాగంగా ముంబయి టాస్ గెలిచి.. బౌలింగ్ ఎంచుకుంది. ప్రత్యర్థి దిల్లీకి బ్యాటింగ్ అప్పగించింది. అయితే, ఈ సీజన్లో దిల్లీ, ముంబయి పేలవ ప్రదర్శన చేస్తున్నాయి. ముంబయి ఇండియన్స్ జట్టు ఇప్పటివరకు రెండు మ్యాచ్లు ఆడి.. రెండింట్లో ఓడిపోయింది. ఇక, దిల్లీ ఆడిన మూడు మ్యాచ్ల్లోనూ బోల్తా కొట్టింది. దీంతో పాయింట్ల పట్టికలో చివరి రెండు స్థానాల్లో ముంబయి, దిల్లీ నిలిచాయి.
దిల్లీ క్యాపిటల్స్ తుది జట్టు: పృథ్వీ షా, డేవిడ్ వార్నర్ (కెప్టెన్), మనీశ్ పాండే, యశ్ ధుల్, రోవ్‌మన్ పావెల్, లలిత్ యాదవ్, అక్షర్ పటేల్, అభిషేక్ పోరెల్ (వికెట్ కీపర్), కుల్దీప్ యాదవ్, అన్రిచ్ నార్టే, ముస్తాఫిజుర్ రెహమాన్
ముంబయి ఇండియన్స్ తుదిజట్టు : రోహిత్ శర్మ(కెప్టెన్), ఇషన్ కిషన్(వికెట్ కీపర్), కామెరూన్ గ్రీన్, సూర్యకుమార్ యాదవ్, తిలక్ వర్మ, నెహాల్ వధేరా, హృతిక్ షోకీన్, అర్షద్ ఖాన్, పీయూష్ చావ్లా, జాసన్, రిలే మెరెడిత్
సమష్టి కృషి చేయాలి : డేవిడ్ వార్నర్
మేమంతా సమష్టిగా కష్టపడాలి. మా ఆటకు పదును పెట్టాలి. ఖలీల్ అహ్మద్కు గాయం కావడం వల్ల.. అతడి స్థానంలో యశ్ ధుల్ను తీసుకోవాల్సి వచ్చింది. అలాగే రిలీ రోస్సో ప్లేస్లో ముస్తాఫిజుర్ రెహమాన్ను తీసుకున్నాం. టీమ్ అంతా సిద్ధంగా ఉన్నారు. పరిస్థితులను అర్ధం చేసుకుని ఆడాలి. హోమ్ క్రౌడ్ ముందు ఆడటం ఉత్సాహాన్నిస్తుంది.
మొదటి బ్యాటింగ్ చేస్తే ఓడిపోయాం : రోహిత్ శర్మ
ఇంతకుముందు రెండు మ్యాచ్లలో బ్యాటింగ్ చేశాం. వాటిలో ఓడిపోయాం. అందుకే ఇప్పుడు ముందుగా బౌలింగ్ తీసుకున్నాం. పిచ్ పొడిగా ఉంది. స్పిన్కు అనుకూలిస్తుంది. దాంతో ఛేజింగ్ సులభం అవుతుందని భావిస్తున్నాం. స్టబ్స్ స్థానంలో రిలీ మెరెడిత్ను జట్టులోకి తీసుకున్నాం. జోఫ్రా జట్టులో లేడు. పరిస్థితులను బట్టి ఇంపాక్ట్ ప్లేయర్లను కూడా తీసుకుంటాం.
దిల్లీ తన మొదటి మ్యాచ్ లఖ్నవూ సూపర్ జెయింట్స్తో ఆడింది. ఆ మ్యాచ్లో 50 పరుగుల తేడాతో ఘోర పరాజం పాలైంది. రెండో మ్యాచ్లోనైనా తేరుకుంటుంది అనుకుంటే.. గుజరాత్ టైటాన్స్ చేతిలో 6 వికెట్ల తేడాతో ఓటమి మూటగట్టుకుంది. ముచ్చటగా మూడో మ్యాచ్లో దిల్లీని 57 పరుగులతో తేడాదో ఓడించింది రాజస్థాన్ రాయల్స్ జట్టు. ముంబయి కూడా మొదటి మ్యాచ్లో బెంగళూరు చేతిలో 8 వికెట్ల తేడాతో ఓడిపోయింది. రెండో మ్యాచ్లోనూ ఏం మార్పు లేకుండా 7 వికెట్ల తేడాతో చెన్నై సూపర్ కింగ్స్ జట్టు చేతిలో ఒటమి మూటగట్టుకుంది.
