IPL 2022 MI CSK: 2022 ఐపీఎల్ రసవత్తరంగా సాగుతోంది. ఇప్పటికే 14 మ్యాచ్లు అయిపోయాయి. ఇప్పటివరకు చూస్తే.. కొత్తగా వచ్చి చేరిన లఖ్నవూ సూపర్ జెయింట్స్, గుజరాత్ టైటాన్స్ బాగానే ఆడుతున్నాయి. కొన్నేళ్లుగా నిరాశాజనక ప్రదర్శన చేస్తున్నా.. కోల్కతా నైట్రైడర్స్, రాజస్థాన్ రాయల్స్, పంజాబ్ కింగ్స్ వంటి జట్లు పాయింట్ల పట్టికలో పైభాగాన ఉండటం గమనార్హం. మరోవైపు.. ఐదుసార్లు ఐపీఎల్ ఛాంపియన్గా నిలిచిన ముంబయి ఇండియన్స్, నాలుగు సార్లు విజేతగా నిలిచి డిఫెండింగ్ ఛాంపియన్ హోదాలో బరిలోకి దిగిన చెన్నై సూపర్ కింగ్స్ బోణీ కొట్టలేకపోయాయి. ఆడిన మూడింట్లో ఒక్కటీ గెలవలేక అభిమానుల్ని నిరాశ పరుస్తున్నాయి. 2020 సీజన్ వరకు మంచి టీంగా పేరున్న సన్రైజర్స్ హైదరాబాద్ తీరూ ఇంతే. రెండింటికి రెండూ ఓడి పాయింట్స్ టేబుల్లో అట్టడుగున ఉంది. ఈ నేపథ్యంలో ఈ జట్లకు ఏమైందని అభిమానులు కంగారు పడుతున్నారు. అసలు ఈ జట్లు ఎందుకు ఓడిపోతున్నాయో ఓసారి పరిశీలిద్దాం.
ముంబయి ఇండియన్స్: ముంబయి ఇండియన్స్ సాధారణంగా ప్రతి ఐపీఎల్ సీజన్ను నెమ్మదిగా ఆరంభిస్తోంది. ప్రారంభ మ్యాచ్ల్లో ఓడటం.. తర్వాత పుంజుకోవడం ఈ జట్టుకు అలవాటే. గత పదేళ్లుగా తొలి మ్యాచ్ ఓడిపోవడాన్ని.. సంప్రదాయంగా చేసుకుంది ముంబయి. అదే సమయంలో 2013-20 మధ్యలో ఎనిమిదింట్లో.. ఐదు సార్లు ముంబయిని(2013,15,17,19,20) ఛాంపియన్గా నిలిపాడు కెప్టెన్ రోహిత్ శర్మ. అయితే.. ఎప్పటిలాగే ఈసారీ అనుకుంటే పొరపాటే. కారణం.. ఆడే విధానం. పరిస్థితులు మునుపటిలా లేవు. జట్టు పూర్తిగా మారిపోయింది. ముంబయికి చాన్నాళ్లుగా ఆడిన హార్దిక్ పాండ్య, కృనాల్ పాండ్య, రాహుల్ చాహర్, ట్రెంట్ బౌల్ట్, క్వింటన్ డికాక్ వంటి మ్యాచ్ విన్నర్లు మెగా వేలంతో ఇతర జట్లలోకి వెళ్లారు. ఇది ముంబయికి పెద్ద దెబ్బ.
ఈ సీజన్కు ముందు ఐపీఎల్ వేలంలో ముంబయి చురుగ్గానే ప్లేయర్ల కొనుగోలు చేపట్టిందని భావించినా.. మ్యాచ్లు జరుగుతున్నకొద్దీ పలు సందేహాలు వ్యక్తమవుతున్నాయి. బ్యాటింగ్లో కొదవ లేకపోయినప్పటికీ.. బౌలింగ్లో చాలా బలహీనంగా కనిపిస్తోంది. గతంలో బుమ్రా, బౌల్ట్, కృనాల్, రాహుల్ చాహర్తో బలంగా కనిపించే బౌలింగ్ లైనప్ ఈసారి లేదు. బుమ్రాకు సహకారం అందించే మరో బౌలర్ కరవయ్యాడు. స్పిన్నర్ మురుగన్ అశ్విన్ ఆకట్టుకుంటున్నా నిలకడ లేదు. పేసర్లు టైమల్ మిల్స్, డేనియల్ సామ్స్, బాసిల్ థంపి ధారాళంగా పరుగులు ఇచ్చుకుంటున్నారు. బౌలింగ్లో మెరుగుపడకుంటే ఈసారి ముంబయి ప్లేఆఫ్స్ చేరడం కష్టమే అని చెప్పొచ్చు.
బ్యాటింగ్లో ఇషాన్ కిషన్, సూర్యకుమార్ యాదవ్, తిలక్ వర్మ మంచి ఫామ్లో ఉన్నారు. అరంగేట్ర మ్యాచ్లో అదరగొట్టిన డెవాల్డ్ బ్రెవిస్పైనా నమ్మకం ఉంది. ఓపెనర్ రోహిత్ శర్మ తడబడుతున్నాడు. కెప్టెన్ ముందుండి రాణించాల్సిన అవసరం ఉంది. అంతకుముందు కూడా బుమ్రా, పాండ్య సోదరులు సహా ఎందరో కొత్త కుర్రాళ్ల నుంచి అద్భుత ప్రదర్శన రాబట్టింది ముంబయి యాజమాన్యం. వారిలో చాలా మంది టీమ్ఇండియాకు కూడా ఎంపికయ్యారు. ఇప్పుడు కూడా అదే తరహా టీమ్ను తయారుచేసి.. ముంబయి మళ్లీ పుంజుకోవాలని ఆశిస్తున్నారు అభిమానులు.
చెన్నై సూపర్ కింగ్స్: చెన్నై సూపర్ కింగ్స్.. 2020 ఐపీఎల్ మినహా ప్రతిసారీ ప్లేఆఫ్ చేరిన జట్టు. చెన్నైని నాలుగు సార్లు టోర్నీ విజేతగా(2010,11,18,21) నిలిపాడు విజయవంతమైన కెప్టెన్ మహేంద్ర సింగ్ ధోనీ. 2020లో దారుణ ప్రదర్శనతో పాయింట్ల పట్టికలో అట్టడుగున నిలిచినా.. మరుసటి ఏడాది ఘనంగా పుంజుకొని టైటిల్ కొట్టడం చెన్నైకే చెల్లింది. అయితే.. ఈసారి మళ్లీ 2020ని పునరావృతం చేసేలా కనిపిస్తుంది. ఆడిన మూడింట్లో ఓడింది. ఈ సీజన్కు రెండు రోజుల ముందు కెప్టెన్సీని జడేజాకు అప్పగించాడు ధోనీ. జడ్డూ అనుభవరాహిత్యానికి తోడు.. జట్టులో సమతూకం లోపించింది.
బ్యాటింగ్లో గతేడాది ఆరెంజ్ క్యాప్ విన్నర్ రుతురాజ్ గైక్వాడ్ వరుస వైఫల్యాలు చెన్నైని కలవరపెడుతోంది. గైక్వాడ్తో కలిసి శుభారంభాలు అందించిన ఫాఫ్ డుప్లెసిస్ను వేలంలో బెంగళూరు దక్కించుకుంది. అంబటి రాయుడు, మొయిన్ అలీ, జడేజా ఏమంత ఫామ్లో లేరు. శివం దూబే, ధోనీనే కాస్తో కూస్తో బ్యాట్ ఝులిపిస్తున్నారు. బౌలింగ్లో మరీ తీసికట్టుగా కనిపిస్తోంది. డ్వేన్ బ్రావో ఒక్కడే కాస్త పొదుపుగా బౌలింగ్ చేస్తున్నాడు. పెద్దగా అనుభవం లేని ముకేశ్ చౌదరి సహా జడ్డూ, జోర్డాన్ కూడా భారీగా పరుగులు ఇస్తున్నాడు. ప్రిటోరియస్ రాకతో కాస్త బలపడ్డట్లు కనిపించినా.. మిగతావారి నుంచి అతడికి సహకారం లభించట్లేదు.
చెన్నైకి మరో పెద్ద దెబ్బ ఏంటంటే.. దీపక్ చాహర్, శార్దుల్ ఠాకుర్ లేకపోవడం. కొన్నాళ్లుగా చెన్నై విజయాల్లో వీరిది ప్రధాన పాత్ర. చాహర్ పవర్ప్లేలో పొదుపుగా బౌలింగ్ చేస్తూ వికెట్లు తీస్తుండేవాడు. కీలక సమయాల్లో శార్దుల్ వికెట్లు తీసేవాడు. ఇద్దరూ బ్యాటింగ్లోనూ మెరుపులు మెరిపించారు. ఈ మెగావేలంలో దీపక్ చాహర్ను రికార్డు స్థాయిలో రూ. 14 కోట్లకు దక్కించుకుంది చెన్నై. అయితే.. గాయంతో చాహర్ దూరమయ్యాడు. ప్రస్తుతం కోలుకుంటున్న అతడు.. త్వరలో సీఎస్కే శిబిరంలో చేరే అవకాశాలున్నట్లు తెలుస్తోంది. మరోవైపు శార్దుల్ ఠాకుర్ను దిల్లీ దక్కించుకుంది. మరి.. చెన్నై ఈ జట్టుతో ఏమైనా అద్భుతాలు చేస్తుందో వేచిచూడాలి.
సన్రైజర్స్ హైదరాబాద్: సన్రైజర్స్ హైదరాబాద్ 2016లో కప్ కొట్టింది. ఆ తర్వాత పలుమార్లు ప్లేఆఫ్స్కు వెళ్లింది. గతేడాది చెత్త ప్రదర్శనతో పాయింట్ల పట్టికలో ఆఖరున నిలిచింది. ఈసారి కూడా ఆడిన రెండింట్లో ఓడి చివర్లోనే ఉంది. దీంతో వేలంలో సరిగ్గా వ్యవహరించలేదని ఫ్రాంఛైజీపై మండిపడుతున్నారు సన్రైజర్స్ ఫ్యాన్స్. ఈ జట్టు రెండు విభాగాల్లో తేలిపోతోంది. బ్యాటింగ్లో డేవిడ్ వార్నర్ను వదులుకోవడం పెద్ద దెబ్బగా చెబుతున్నారు. విలియమ్సన్ వంటి విజయవంతమైన కెప్టెన్ ఉన్నప్పటికీ టీంలో సమతూకం లేదు. బ్యాటింగ్ ఆర్డర్లో మార్పులు చేయాల్సిన అవసరం ఉంది. ఓపెనర్లుగా అభిషేక్ వర్మ, విలియమ్సన్ విఫలమవుతున్నారు. మార్క్రమ్, త్రిపాఠి మూడు, నాలుగో స్థానాల్లో అంతగా రాణించలేకపోతున్నారు. వెస్టిండీస్ స్టార్లు నికోలస్ పూరన్, షెఫర్డ్పై భారీగా ఆశలు పెట్టుకుంది యాజమాన్యం. వాషింగ్టన్ సుందర్ కాస్త దూకుడుగా ఆడుతున్నాడు. ఇతడిని బ్యాటింగ్ ఆర్డర్లో ముందు పంపించాల్సిన ఆవశ్యకత ఉంది. ఇప్పటివరకు బ్యాటింగ్లో పూరన్, త్రిపాఠి, మార్క్రమ్, సుందర్ ఒక్కో మ్యాచ్లోనే రాణించారు.
బౌలింగ్లో భువనేశ్వర్, నటరాజన్, వాషింగ్టన్ సుందర్ కాస్త ఫర్వాలేదనిపిస్తున్నా.. వికెట్లు తీయలేకపోతున్నారు. ఉమ్రాన్ మాలిక్, షెఫర్డ్ పరుగులు భారీగా సమర్పించుకుంటున్నారు. బ్యాటింగ్ ఆర్డర్లో మార్పులు చేసి.. బౌలర్లను సక్రమంగా వినియోగించుకుంటూ కేన్ మామ సన్రైజర్స్ను గాడిన పెడతాడో లేదో చూడాలి.
రాజస్థాన్ రాయల్స్, పంజాబ్ కింగ్స్, లఖ్నవూ సూపర్ జెయింట్స్, రాయల్ ఛాలెంజర్స్ బెంగళూరు ఒక్కో మ్యాచ్ ఓడినా.. రెండు చొప్పున గెలిచాయి. కోల్కతా నైట్రైడర్స్ ఒకటి ఓడి, 3 గెలిచి పాయింట్ల పట్టికలో టాప్లో ఉంది. గుజరాత్ టైటాన్స్ ఆడిన రెండిట్లో గెలిచి మూడో స్థానంలో ఉంది. దిల్లీ క్యాపిటల్స్ రెండు ఆడి ఒకటి గెలిచింది. ప్రస్తుతం ఏడో స్థానంలో కొనసాగుతోంది.
ఇవీ చూడండి: 'హైదరాబాద్ అభిమానులు ఫుల్ కుష్'.. చెన్నైపై నెటిజన్ల సెటైర్లు!
ఇప్పటికీ.. ఎప్పటికీ.. ఆయనే నాకు స్ఫూర్తి: రోహిత్
'పిచ్ ఏదైనా.. సన్రైజర్స్ తలరాత అంతే': పాక్ మాజీ క్రికెటర్
