IPL 2022 DC vs RR: ఐపీఎల్ టీ20 మెగా లీగ్ 15వ సీజన్ రసవత్తరంగా సాగుతోంది. దిల్లీ క్యాపిటల్స్తో ముంబయిలోని వాంఖడే మైదానంలో శుక్రవారం సాయంత్రం జరుగుతున్న మ్యాచ్లో రాజస్థాన్ రాయల్స్ ఓపెనర్లు విధ్వంసం సృష్టించారు. తొలి వికెట్కు 155 పరుగుల భాగస్వామ్యం నెలకొల్పి జట్టు భారీ స్కోర్ సాధించేందుకు బాటలు వేశారు. నిర్ణీత 20 ఓవర్లలో రెండు వికెట్ల నష్టానికి 222 పరుగులు చేసింది ఆర్ఆర్. ఓపెనర్ జోస్ బట్లర్ మరోమారు సిక్సుల వర్షం కురిపించాడు. ఈ ఐపీఎల్ సీజన్లోనే మూడో సెంచరీ నమోదు చేశాడు. దీంతో దిల్లీ క్యాపిటల్స్ ముందు 223 పరుగులు భారీ లక్ష్యాన్ని నిర్దేశించింది ఆర్ఆర్.
రాజస్థాన్ రాయల్స్ తరఫున 100వ మ్యాచ్ ఆడుతున్న కెప్టెన్ సంజూ శాంసన్ సైతం వచ్చి రాగానే ఫోర్లు, సిక్సర్లతో స్కోరును పరుగులు పెట్టించాడు. ఖలీల్ అహ్మద్ వేసిన 18వ ఓవర్లో ఓ సిక్సర్ బాదిన శాంసన్ ఐపీఎల్లో 5వేల పరుగులు పూర్తి చేసుకున్నాడు.
ఆర్ఆర్ బ్యాటర్లలో జోస్ బట్లర్ 65 బంతుల్లో 116 పరుగులు చేసి ఔట్ అయ్యాడు.ఈ ఐపీఎల్ సీజన్లో అత్యధిక వ్యక్తిగత స్కోర్ నమోదు చేశాడు బట్లర్. దేవదత్ పడిక్కల్ 35 బంతుల్లో 7ఫోర్లు, రెండు సిక్సర్లతో 54 పరుగులు చేసి వెనుదిరిగాడు, కెప్టెన్ సంజూ శాంసన్ 19 బంతుల్లో 46 పరుగులు చేశాడు. దిల్లీ బౌలర్లలో కలీల్ అహ్మద్ 4 ఓవర్లలో 47 పరుగులు ఇచ్చి ఒక వికెట్ తీశాడు. ముస్తఫిజర్ రెహ్మాన్ 4 ఓవర్లలో 43 పరుగులు ఇచ్చి బట్లర్ వికెట్ పడగొట్టాడు.
ఇదీ చూడండి: ఐపీఎల్లో మళ్లీ కరోనా కలవరం- ఐసోలేషన్లోకి దిల్లీ హెడ్కోచ్ పాంటింగ్
