ఐపీఎల్ 14వ సీజన్లో భాగంగా సన్రైజర్స్ హైదరాబాద్- చెన్నై సూపర్ కింగ్స్ మధ్య ఆసక్తికర పోరు జరగనుంది. ఈ మ్యాచ్కు దిల్లీలోని అరుణ్ జైట్లీ స్టేడియం ఈ సీజన్లో తొలిసారిగా ఆతిథ్యమివ్వనుంది. ఒకవైపు వరుస విజయాలతో టాప్-2లో ఉన్న చెన్నై జట్టు.. మరొకటి వరుస పరాజయాలతో చిట్టచివరి స్థానంలో ఉన్న హైదరాబాద్ టీమ్. ఇరుజట్లలో చెన్నై జట్టు అన్ని విభాగాల్లోనూ దుర్భేద్యంగా కనిపిస్తోంది. మరి ఈ మ్యాచ్లోనైనా వార్నర్ సేన గట్టెక్కుతుందేమో చూడాలి.
వరుస విజయాలతో చెన్నై..
సీజన్ను ఓటమితో ప్రారంభించిన చెన్నై సూపర్ కింగ్స్.. తర్వాత జరిగిన నాలుగు మ్యాచ్ల్లోనూ విజయం సాధించి ఊపుమీదుంది. గత సీజన్లో ప్లే ఆఫ్స్ చేరడంలో విఫలమైన ఈ జట్టు ఈ సారి 'ఛాంపియన్ చెన్నై'ని గుర్తుకు తెస్తోంది. బెంగళూరుతో జరిగిన గత మ్యాచ్లో జడేజా ఆల్రౌండ్ ప్రదర్శనతో జట్టుకు ఒంటి చేత్తో విజయాన్ని అందించాడు. ఇక బ్యాటింగ్లో యువ ఓపెనర్ రుతురాజ్ గైక్వాడ్తో పాటు డుప్లెసిస్ అద్భుతంగా ఆడుతున్నారు. మూడో స్థానానికి ప్రమోట్ అయిన మొయిన్ అలీ మంచి ప్రదర్శన చేస్తున్నాడు. వీరితో పాటు రైనా, ధోనీ మంచి ఫామ్లో ఉన్నారు.
బౌలింగ్లో దీపక్ చాహర్ ప్రత్యర్థిని మొదటి పవర్ప్లేలోనే దెబ్బకొట్టడానికి సిద్ధంగా ఉన్నాడు. మరో పేసర్ శార్దుల్ ఠాకుర్ కూడా మెరుగ్గా బౌలింగ్ చేస్తున్నాడు. ఆర్సీబీతో మ్యాచ్లో రవీంద్ర జడేజా, మొయిన్ అలీ స్పిన్ ద్వయం కీలకమైన వికెట్లను తీసి ప్రత్యర్థిని గట్టి దెబ్బ కొట్టింది.
ఇదీ చదవండి: బంతికి ఉమ్ము రుద్దిన మిశ్రా.. అంపైర్ వార్నింగ్
పరాజయాలకు బ్రేక్ పడుతుందా?
ఇప్పటివరకు ఐదు మ్యాచ్లాడిన హైదరాబాద్.. కేవలం ఒక్కటంటే ఒక్కటే గెలుపొందింది. దిల్లీతో జరిగిన గత మ్యాచ్లో త్రుటిలో ఓడిన వార్నర్ సేన.. విలియమ్సన్ పోరాటం వల్ల మ్యాచ్ను సూపర్ ఓవర్ వరకు తీసుకెళ్లింది. చివరికి అక్కడ కూడా భంగపాటు తప్పలేదు. ఓపెనర్లు డేవిడ్ వార్నర్, బెయిర్ స్టో రాణిస్తున్నప్పటికీ.. అనంతరం బ్యాటింగ్ ఆర్డర్ పేకమేడను తలపిస్తుంది. వీరు పెవిలియన్ చేరిన తర్వాత ఆ స్థాయిలో ఆడే ఆటగాడే కరువయ్యాడు. విలియమ్సన్ రాకతో కొంతమేర టాపార్డర్ బలంగా కనిపిస్తున్నప్పటికీ.. మిడిలార్డర్ సమస్య వేధిస్తోంది.
ఇక బౌలింగ్ విషయానికొస్తే ఐపీఎల్లో అత్యుత్తమ బౌలింగ్ లైనప్ ఉన్న జట్లలో ఎస్ఆర్హెచ్ ముందు వరుసలో ఉంటుంది. కానీ, ఈ దఫా భువనేశ్వర్ కుమార్ అంతగా ఆకట్టుకోలేకపోతున్నాడు. దీంతో చివరి మ్యాచ్లో ఉద్వాసన తప్పలేదు. రషీద్ ఖాన్ రాణిస్తున్నా.. అతడికి మరో ఎండ్లో సహకరించే వారే కరవయ్యారు. మిగతా బౌలర్లు ఆకట్టుకుంటున్నప్పటికీ.. ధారాళంగా పరుగులు ఇస్తున్నారు. మరి కొత్తగా జట్టులోకి వచ్చిన కౌల్తో పాటు అభిషేక్ వర్మ రాణిస్తేనే బౌలింగ్ గాడిలో పడుతుంది. అన్ని రంగాల్లో మెరుగైతేనే బలమైన చెన్నైని ఢీకొట్టొచ్చు. లేకపోతే మరో పరాభవం తప్పదు.
ఇదీ చదవండి: బ్రెట్ లీ దాతృత్వం- భారత్కు బిట్కాయిన్ సాయం
