క్రికెట్ అభిమానులు ఎంతో ఆసక్తిగా ఎదురుచూస్తున్న ఇండియన్ ప్రీమియర్ లీగ్ (ఐపీఎల్) శుక్రవారం నుంచి ప్రారంభంకానుంది. గతేడాది యూఏఈలో జరిగిన ఈ లీగ్ తిరిగి ఈ దఫా భారత్లో జరగనుంది. ప్లే ఆఫ్స్తో పాటు ఫైనల్ మ్యాచ్లను కొత్తగా నిర్మించిన నరేంద్ర మోదీ స్టేడియంలో నిర్వహించనున్నారు. ప్రస్తుత సీజన్ ఏప్రిల్ 9న ప్రారంభమై మే 30న ముగియనుంది.
చెన్నై వేదికగా తొలి మ్యాచ్ డిఫెండింగ్ ఛాంపియన్ ముంబయి ఇండియన్స్, రాయల్ ఛాలెంజర్స్ బెంగళూరు మధ్య జరగనుంది. తొలుత నిర్ణయించినట్లుగా మొత్తం ఆరు వేదికల్లో మ్యాచ్ల నిర్వహణ జరుగుతుందని బీసీసీఐ తెలిపింది. అహ్మదాబాద్, బెంగళూరు, చెన్నై, ముంబయి, దిల్లీ, కోల్కతాలను వేదికలుగా నిర్ణయించింది. ఇందులో మొత్తం 56 లీగ్ మ్యాచ్లు జరగనున్నాయి. చెన్నై, ముంబయి, కోల్కతా, బెంగళూరులలో పదేసి మ్యాచ్ల చొప్పున జరుగుతాయి. మిగిలిన రెండు వేదికలలో 8 చొప్పున మ్యాచ్లు నిర్వహిస్తారు. మ్యాచ్ జరిగే వారం, తేదీ, వేదిక వంటి పూర్తి వివరాలతో కూడిన సమాచారాన్ని ఈటీవీ భారత్ మీకోసం అందిస్తోంది.
ఐపీఎల్ పాలక మండలి అన్ని జట్లకు తటస్థ వేదికలను ఇదివరకే ప్రకటించింది. దీంతో ఏ జట్టుకు సొంత మైదానంలో ఆడే అవకాశమే లేకుండా పోయింది. లీగ్ మ్యాచ్లను ప్రతి జట్టు నాలుగు వేదికలలో ఆడనున్నాయి.
ఇదీ చూడండి: ఐపీఎల్: హోమ్ టీమ్లో ఆడని క్రికెటర్లు!
