ఇంగ్లాండ్తో జరగాల్సిన ఐదో టెస్టు(IND Vs ENG 5th Test) రద్దు అయిన కారణంగా తమ ఆటగాళ్లను యూఏఈ రప్పించేందుకు ఐపీఎల్ ఫ్రాంచైజీలు(IPL Franchises) కసరత్తులు చేస్తున్నాయి. ఆటగాళ్ల కోసం మాంచెస్టర్ నుంచి ప్రత్యేక విమానాలను ఏర్పాటు చేయనున్నారని సమాచారం. ఇందుకోసం ఛార్టెర్ సంస్థలతో ఐపీఎల్ జట్టు యాజమాన్యాలు సంప్రదింపులు జరిపాయని తెలుస్తోంది. ఈ నేపథ్యంలో శనివారం రాత్రికి ఆటగాళ్లందరూ యూఏఈ చేరుకునేందుకు ప్రణాళికలు రచిస్తున్నారు.
భారత క్రికెటర్లతో ఇంగ్లాండ్ ఆటగాళ్లను యూఏఈ రప్పించేందుకు ఇప్పటికే కసరత్తులు మొదలయ్యాయని ఓ ఫ్రాంఛైజీకి చెందిన అధికారులు వెల్లడించారు. బీసీసీఐ నుంచి ఒకసారి అనుమతి వచ్చిన వెంటనే క్రికెటర్ల కోసం చార్టెర్ విమానాలు సిద్ధంగా ఉంచుతామని తెలిపారు. శనివారం సాయంత్రం లేదా ఆదివారం ఉదయాన్నే కుటుంబాలతో పాటు చేరుకునే అవకాశం ఉందని చెప్పారు.
సాధారణ విమానాల్లో..
భారత్, ఇంగ్లాండ్ మధ్య జరగాల్సిన ఐదో టెస్టు రద్దైన కారణంగా తమ క్రికెటర్లను యూఏఈ రప్పించేందుకు చెన్నై సూపర్కింగ్స్ జట్టు(Chennai Super Kings IPL) యాజమాన్యం కసరత్తులు చేస్తుంది. అయితే తమ ఆటగాళ్ల కోసం ప్రత్యేక విమానాలను కాకుండా సాధారణ విమానాల్లో టికెట్లు బుక్ చేశారు. యూఏఈ చేరుకున్న తర్వాత వీరంతా ఆరు రోజులు క్వారంటైన్ ఉండాల్సిఉందని సీఎస్కే యాజమాన్యం తెలిపింది.
సీఎస్కేకు చెందిన రవీంద్ర జడేజా, ఛెతేశ్వర్ పుజారా, శార్దూల్ ఠాకూర్, మొయిన్ అలీ, సామ్ కరన్లు ప్రస్తుతం మాంచెస్టర్లో ఉన్నారు. అయితే వీరంతా.. ఇప్పటికే ఐపీఎల్ కోసం ప్రాక్టీస్ మొదలుపెట్టేశారు.
ఇదీ చూడండి.. IND Vs ENG 5th Test: 'మ్యాచ్ రద్దుకు కరోనా కారణం కాదు'
