Hardik Pandya Injury: ఐపీఎల్ 2022లో కొత్త జట్టు గుజరాత్ టైటాన్స్ అదరగొడుతోంది. గత రాత్రి రాజస్థాన్ జట్టుతో జరిగిన మ్యాచ్లో 37 పరుగుల తేడాతో విజయం సాధించింది. దీంతో గుజరాత్ జట్టు పాయింట్ల పట్టికలో అగ్రస్థానంలోకి దూసుకెళ్లింది. ఈ మ్యాచ్లో బ్యాట్తో అదరగొట్టిన హార్దిక్ పాండ్య గుజరాత్‌కు భారీ స్కోరు అందించాడు. ఆ తర్వాత మెరుపు ఫీల్డింగ్‌తో రాజస్థాన్ కెప్టెన్ సంజు శాంసన్‌ను రనౌట్‌ చేశాడు. బౌలింగ్‌లోనూ రాణించి జట్టు విజయంలో కీలక పాత్ర పోషించాడు. అయితే గాయం భయం మాత్రం అతడిని ఇంకా వెంటాడుతోంది.
రాజస్థాన్ బ్యాటింగ్ సమయంలో.. 19వ ఓవర్‌ వేసేందుకు వచ్చిన హార్దిక్ కోటా పూర్తి చేయలేకపోయాడు. తొడకండరాల సమస్యతో కేవలం మూడు బంతులే వేసి మైదానాన్ని వీడాడు. ఆ ఓవర్‌ను విజయ్‌ శంకర్‌ పూర్తి చేశాడు. అయితే గాయాలు, ఫిట్నెస్లేమితో.. హార్దిక్ చాలా కాలంగా టీమ్ఇండియాకు ఆడట్లేదు. ఇప్పుడు ఐపీఎల్లో మళ్లీ ఏమైందని అభిమానులు ఆందోళన చెందుతున్నారు. ఈ నేపథ్యంలో.. మ్యాచ్ అనంతరం స్పందించిన హార్దిక్ "అది చిన్న నొప్పి మాత్రమే, తీవ్రమైన గాయం ఏం కాదు. ఆందోళన చెందాల్సిన అవసరం లేదు" అని అన్నాడు.
టీ20 మెగా టోర్నీలో భాగంగా నిన్న(గురువారం) జరిగిన మ్యాచ్లో గుజరాత్ అద్భుతంగా ఆడింది. ప్రత్యర్థి జట్టు రాజస్థాన్కు 193 పరుగుల భారీ లక్ష్యం నిర్దేశించింది. ఇక బ్యాటింగ్కు దిగిన రాజస్థాన్ జట్టు 9 వికెట్లు కోల్పోయి 155 పరుగులు చేసి ఓటమిపాలైంది. బ్యాటింగ్, బౌలింగ్తో అద్భుతంగా రాణించిన గుజరాత్ జట్టు విజయం సాధించింది. గుజరాత్ బ్యాటర్లలో కెప్టెన్ హార్దిక్ పాండ్య (87; 52 బంతుల్లో 8×4, 4×6) అర్ధ శతకంతో సత్తా చాటాడు. అభినవ్ మనోహర్ (43; 28 బంతుల్లో 4×4, 2×6), డేవిడ్ మిల్లర్‌ (31; 14 బంతుల్లో 5×4, 1×6) ధాటిగా ఆడారు. ఇక బౌలింగ్లో కూడా లాకీ ఫెర్గూసన్‌, యశ్ దయాల్ మూడేసి వికెట్లు తీయగా.. మహమ్మద్ షమి, హార్దిక్ పాండ్య చెరో వికెట్ తీసి అదరగొట్టారు. గుజరాత్ జట్టు తన తదుపరి మ్యాచ్లో చెన్నై సూపర్ కింగ్స్‌తో ఆదివారం పుణెలో తలపడనుంది.
ఇవీ చూడండి
