విండీస్ విధ్వంసకర బ్యాట్స్మన్ క్రిస్ గేల్ ఐపీఎల్లో సరికొత్త రికార్డు నమోదు చేశాడు. లీగ్ చరిత్రలో 350కిపైగా సిక్స్లు కొట్టిన తొలి బ్యాట్స్మన్గా నిలిచాడు. రాజస్థాన్తో మ్యాచ్లో బెన్ స్టోక్స్ తొలి ఓవర్లో బంతిని స్టాండ్స్లోకి పంపిన గేల్.. ఈ ఫీట్ సాధించాడు. మొత్తం గేల్ 351 బంతులను సిక్సర్లుగా మలిచాడు.
గేల్ దరిదాపుల్లో ఏ ఇతర క్రికెటర్ లేడు. ఒక్క ఏబీ డివిలియర్స్ మాత్రమే 237 సిక్స్లతో అతని తర్వాతి స్థానంలో ఉన్నాడు.
విధ్వంసకర బ్యాటింగ్తో పొట్టి ఫార్మాట్కు ఊపు తెచ్చే ఈ కరీబియన్ ఆటగాడు.. యూఏఈలో జరిగిన గత సీజన్లో ప్రారంభ మ్యాచ్లకు ఎంపిక కాలేదు. తర్వాతి చివరి 7 మ్యాచ్లు ఆడిన గేల్.. 41.14 సగటుతో 288 పరుగులు సాధించాడు. ఇందులో 23 సిక్స్లతో పాటు 15 ఫోర్లు ఉన్నాయి.
ఇదీ చదవండి: బూట్లు లేని స్థితి నుంచి ఐపీఎల్లో అదరగొట్టి..
సోమవారం రాజస్థాన్తో జరిగిన మ్యాచ్లో అర్ధసెంచరీకి 10 పరుగుల దూరంలో అవుటయ్యాడు గేల్. 40 రన్స్ సాధించిన అతడిని.. చిరాగ్ పరాగ్ పెవిలియన్ పంపాడు. పంజాబ్ తరఫున అతనాడిన ఐపీఎల్ ప్రారంభ మ్యాచ్ల్లో హాఫ్ సెంచరీలు చేసిన క్రిస్.. ఈ సారి త్రుటిలో ఆ అవకాశం చేజార్చుకున్నాడు.
గతంలో ఇలా..
- 2018 సీజన్లో చెన్నై సూపర్ కింగ్స్పై 33 బంతుల్లో 62 పరుగులు.
- 2019 సీజన్లో రాజస్థాన్ రాయల్స్పై 47 బంతుల్లో 79 పరుగులు.
- 2020 సీజన్లో రాయల్ ఛాలెంజర్స్ బెంగుళూరుపై 45 బంతుల్లో 53 పరుగులు.
ఐపీఎల్లో ఇప్పటి వరకు 13 సీజన్లలో 133 మ్యాచ్లాడిన ఈ 41 ఏళ్ల విండీస్ క్రికెటర్.. మొత్తంగా 4812 రన్స్ తన ఖాతాలో వేసుకున్నాడు.
ఇదీ చదవండి: గోల్ఫ్లో మత్సుయామ సరికొత్త రికార్డు
