Christmas Celebrations 2024 : రాష్ట్రవ్యాప్తంగా క్రిస్మస్ వేడుకలు ఘనంగా జరుగుతున్నాయి. ప్రార్థనా మందిరాలను సర్వాంగ సుందరంగా విద్యుద్దీపాలతో అలంకరించారు. మంగళవారం రాత్రి 9 గంటల నుంచి 12 గంటలకు పలు కార్యక్రమాలు, సామూహిక ప్రార్ధనలు చేపట్టారు. ప్రత్యేక ప్రార్ధనలతో రోజుని ప్రారంభించనున్నారు. పండగ వేళ రాష్ట్రవ్యాప్తంగా ఉన్న చర్చిలు యేసు నామస్మరణతో మార్మోగుతున్నాయి. క్రీస్తు జన్మదినాన్ని పురస్కరించుకుని పలువురు ప్రముఖులు శుభాకాంక్షలు తెలియజేశారు.
క్రీస్తు పుట్టిన రోజు వేడుకలు : రాష్ట్రవ్యాప్తంగా క్రీస్తు పుట్టిన రోజు వేడుకలు ఘనంగా జరుగుతున్నాయి. అంబర చుంబిత ఆకాశహార్మ్యంగా కీర్తించబడే అద్భుత కట్టడమైన మెదక్ చర్చిలోనూ ప్రత్యేక ప్రార్థనలు మిన్నంటాయి. తెల్లవారుజామున ప్రాతఃకాల ఆరాధనతో వేడుకలు ప్రారంభమయ్యాయి. శతాబ్ది వేడుకల సందర్భంగా మెదక్ చర్చిని విద్యుత్ దీపాలతో అలంకరించారు. రంగురంగుల విద్యుద్దీపాలతో చర్చి ప్రాకారాలను, టవర్‌ను ముస్తాబు చేశారు. చిన్నపిల్లలను ఆహ్లాదపరిచేలా చర్చి ఆవరణలో రంగులరాట్నాన్ని ఏర్పాటు చేశారు.
హనుమకొండ జిల్లాలోని కరుణాపురం క్రీస్తుజ్యోతి ప్రార్ధనా మందిరం ప్రార్థనలతో మార్మోగింది. ముప్పై ఏళ్ల క్రితం ఓ చిన్న పాకలో ప్రార్ధనలతో మెుదలైన ప్రస్థానం అంచెలంచెలుగా విస్తరించింది. నేడు ఆసియాలోనే అతి పెద్ద చర్చిగా అవతరించింది. ఇక్కడ ఒకేసారి 40 వేల మందికి పైగా ప్రార్ధనలు చేసుకునే సదుపాయాలు ఉన్నాయి. క్రిస్మస్ పర్వదినం సందర్భంగా విద్యుద్దీప కాంతులతో చర్చి పరిసరాలు ధగధగలాడాయి. క్రీస్తు ఆరాధనలు, పాటలు, దేవుని వాక్యాల ఆలాపనలతో ఈ ప్రార్ధనా మందిరం మార్మోగింది.
క్రిస్మస్ శుభాకాంక్షలు తెలిపిన గవర్నర్, సీఎం : క్రైస్తవులకు రాష్ట్ర గవర్నర్, ముఖ్యమంత్రి, ఉపముఖ్యమంత్రి సహా పలువురు మంత్రులు క్రిస్మస్ శుభాకాంక్షలు తెలిపారు. ఏసుక్రీస్తు బోధనలు ఎప్పటికీ ప్రపంచంలోని మానవాళికి మార్గదర్శకమని సీఎం రేవంత్ రెడ్డి అన్నారు. యేసు ప్రభువు ఆదర్శాలను గౌరవించడానికి క్రిస్మస్ సంతోషకరమైన సందర్భమని గవర్నర్ జిష్ణుదేవ్ వర్మ పేర్కొన్నారు.
ప్రేమ, సహనం, త్యాగం, దాతృత్వమనే సుగుణాల ఆచరణ ద్వారా మానవాళిని సన్మార్గం వైపు నడిపించిన ఏసుక్రీస్తు జీవనం అందరికీ ఆదర్శనీయమని డిప్యూటి సీఎం భట్టి విక్రమార్క, మంత్రి శ్రీధర్‌బాబు, కొండా సురేఖ అన్నారు. బీఆర్ఎస్ అధినేత కేసీఆర్ రాష్ట్ర ప్రజలకు క్రిస్మస్ పండుగ శుభాకాంక్షలు తెలిపారు. క్రీస్తు బోధనలు, కార్యాచరణ ప్రపంచ మానవాళిని ఎంతగానో ప్రభావితం చేశాయని స్మరిస్తూ రాష్ట్ర ప్రజానీకానికి క్రిస్మస్ శుభాకాంక్షలు తెలిపారు.
వరంగల్ జిల్లాలో క్రిస్మస్ వేడుకలు : వరంగల్ జిల్లాలో క్రిస్మస్ పర్వదిన వేడుకలు ఘనంగా జరిగాయి. కాజీపేటలోని పలు ప్రార్ధనా మందిరాలు విద్యుద్దీపకాంతులతో ధగధగలాడాయి. రాత్రివేళ ప్రత్యేక ప్రార్ధనలు భక్తులను ఉర్రూతలూగించాయి. కాజీపేట ఫాతీమానగర్ చర్చిలో అర్ధరాత్రి జరిగిన క్మిస్మస్ వేడుకల్లో పెద్ద సంఖ్యలో భక్తులు పాల్గొన్నారు.
వరంగల్ పశ్చిమ ఎమ్మెల్యే నాయని రాజేందర్ రెడ్డి క్రిస్మస్ వేడుకల్లో పాల్గొన్నారు. సర్వమతాల సారం శాంతి అని అందరూ మంచిగా ఆలోచిస్తూ శాంతితో జీవించాలని ప్రభుత్వ విప్, డోర్నకల్ ఎమ్మెల్యే రామచంద్రనాయక్ కోరారు. భారత దేశం సర్వ మతాల సమ్మేళనమని ఎమ్మెల్యే రేవూరి ప్రకాష్ రెడ్డి కొనియాడారు. హనుమకొండ జిల్లా పరకాలలో క్రిస్మస్ కేక్ కట్ చేసి సంబరాలు నిర్వహించారు.
క్రిస్మస్ స్పెషల్ "ఎగ్లెస్ ప్లమ్ కేక్" - ఇలా చేస్తే అతిథులు వావ్ అనాల్సిందే!
క్రిస్మస్ రోజున పిల్లలను ఇలా రెడీ చేయండి - జస్ట్ లుకింగ్ లైక్ ఏ వావ్ అంటారు!
