కరోనా మహమ్మారి కారణంగా వాయిదా పడిన పాకిస్థాన్ సూపర్ లీగ్(పీఎస్ఎల్)ను తిరిగి యూఏఈ వేదికగా నిర్వహించాలని ఆ లీగ్ ఫ్రాంఛైజీలు.. పాకిస్థాన్ క్రికెట్ బోర్డు(పీసీబీ)ను కోరాయి. గత మార్చిలో కరాచీ వేదికగా జరిగిన పీఎస్ఎల్.. పలువురు ఆటగాళ్లకు కరోనా సోకడం వల్ల వాయిదా పడింది. అయితే టోర్నీ తిరిగి ప్రారంభించడానికి సన్నాహాలు జరుగుతున్నాయని ఓ పాక్ క్రీడాఛానెల్ వెల్లడించింది.
"అర్ధంతరంగా ఆగిపోయిన పీఎస్ఎల్ ఆరో సీజన్ను జూన్ 1 నుంచి జూన్ 20 వరకు తిరిగి నిర్వహించాలని ఫ్రాంఛైజీలు నిర్ణయించాయి. ఆ విషయమై పీసీబీకి ఓ లేఖను కూడా రాశాయని" ఓ క్రీడా ఛానెల్ నివేదించింది.
పీస్ఎల్ను తిరిగి నిర్వహించడంపై గత నెలలో పీసీబీ బోర్డు ఆఫ్ గవర్నర్స్ వర్చువల్గా సమావేశమయ్యారు. ఇద్దరు సభ్యుల నిజ నిర్ధరణ కమిటీ సూచించిన విధివిధానాలు, బైలాస్లపై చర్చ జరిగిందని నివేదిక వెల్లడించింది.
ఈ టోర్నీలో పాల్గొన్న విదేశీ క్రికెటర్లు తదుపరి లీగ్కు అందుబాటులో ఉండమని స్పష్టం చేశారు. దీంతో ఆయా క్రికెటర్ల స్థానంలో వేరే ఆటగాళ్లకు అవకాశం కల్పించనున్నారు.
ఇదీ చదవండి: 'ఐపీఎల్ నిరవధిక వాయిదాను అర్థం చేసుకోగలం'
