కొవిడ్తో పోరాడుతున్న భారతదేశానికి మద్దతు ప్రకటించింది క్రికెట్ ఆస్ట్రేలియా. సత్వరమే రూ.37 లక్షల ఆర్థిక సాయం చేయనున్నట్లు వెల్లడించింది. తమ దేశ ప్రజలు కూడా తమ వంతు సాయం చేయాలని కోరింది. దేశంలో విధ్వంసం సృష్టిస్తున్న కరోనా రెండో దశపై తీవ్ర విచారం వ్యక్తం చేసింది.
క్రికెట్ ఆస్ట్రేలియాతో పాటు ఆస్ట్రేలియన్ క్రికెట్ అసోసియేషన్, యూనిసెఫ్ ఆస్ట్రేలియాలు విరాళాల సేకరణకు ముందుకు వచ్చాయి. దేశంలోని తీవ్ర ప్రభావిత ప్రాంతాల్లో ఆక్సిజన్ ప్లాంట్ల ఏర్పాటుతో పాటు వైద్య పరికరాలు అందజేయనున్నట్లు యూనిసెఫ్ ఆస్ట్రేలియా తెలిపింది. వ్యాక్సినేషన్ ప్రక్రియలో మద్దతు ఇవ్వనున్నట్లు పేర్కొంది.
ఇదీ చదవండి: కరోనాతో బీసీసీఐ మాజీ సెలెక్టర్ మృతి
"క్రికెట్పై ఉన్న ప్రేమ ఆస్ట్రేలియా, ఇండియా ప్రజల మధ్య మంచి బంధం ఏర్పర్చింది. కొవిడ్ ధాటికి భారతదేశ ప్రజలు ఇబ్బందులు ఎదుర్కొంటున్నారు. ఇది చాలా బాధాకరం. దీనిపై విచారం వ్యక్తం చేస్తున్నాం. ఇప్పటికే మా క్రికెటర్లు కమిన్స్, బ్రెట్ లీ తమ దాతృత్వాన్ని చాటుకున్నారు. అదే స్ఫూర్తితో యూనిసెఫ్ ఆస్ట్రేలియాతో కలిసి విరాళాల సేకరణ చేపట్టలనుకుంటున్నాం. ఆక్సిజన్ సరఫరా, వైద్య పరికరాలు, వ్యాక్సిన్ల తయారీకి ఈ నిధులను ఉపయోగించాలని కోరుతున్నాం."
-నిక్ హాక్లీ, క్రికెట్ ఆస్ట్రేలియా తాత్కాలిక సీఈఓ.
ఇదీ చదవండి: 'వార్నర్ ప్రపంచ స్థాయి ఆటగాడు.. త్వరలోనే జట్టులోకి..'
