Gayle return to IPL: క్రికెట్లో విధ్వంసానికి పర్యాయపదం ఏదైనా ఉందంటే అది క్రిస్ గేల్! అంతలా ఆటపై ముద్ర వేశాడు ఈ కరీబియన్ వీరుడు. పొట్టి ఫార్మాట్లో ఎడాపెడా బౌండరీలు, సిక్సులతో విరుచుకుపడే గేల్ ఆటను.. ఈసారి ఐపీఎల్లో చాలా మంది మిస్ అవుతున్నారు. ఈ ఏడాది ఐపీఎల్ వేలానికి తన పేరును గేల్ నమోదు చేసుకోలేదు. దీంతో సీజన్కు దూరమయ్యాడు. అయితే, తాజాగా సామాజిక మాధ్యమాల్లో పోస్టు పెట్టి అందరినీ ఆశ్చర్యపరిచాడు గేల్. ఐపీఎల్ కోసం సిద్ధమవుతున్నట్లు చెప్పుకొచ్చాడు. అయితే ఈ సీజన్కు కాదండోయ్. 2023లో జరిగే ఐపీఎల్ కోసం ఇప్పటి నుంచే కసరత్తులు చేస్తున్నట్లు పేర్కొన్నాడు.
IPL 2022: ఈ ఏడాది చివర్లో గేల్కు 43 ఏళ్లు నిండుతాయి. అయితే, ఈ వయసులోనూ తాను ఎవరికీ తక్కువ కాదని చెబుతున్నాడు ఈ యూనివర్స్ బాస్. అందుకే ఫిట్నెస్పై దృష్టిసారించాడు. జిమ్లో చెమటలు వచ్చేలా వర్కౌట్లు చేస్తున్నాడు. తర్వాతి ఎడిషన్ ఐపీఎల్కు సిద్ధమవుతున్నాడు. ఐపీఎల్లో ఇప్పటివరకు మూడు ఫ్రాంఛైజీలకు ప్రాతినిధ్యం వహించాడు గేల్. 2009లో కోల్కతా తరఫున ఆడిన గేల్... ఆ తర్వాత ఆర్సీబీ తరఫున వీరవిహారం చేశాడు. అనంతరం పంజాబ్కు మారాడు. గతేడాది అతడి ప్రదర్శన అంతంతమాత్రంగానే ఉంది. 10 మ్యాచ్లు ఆడిన గేల్.. 21.44 నామమాత్రపు సగటుతో 193 పరుగులు చేశాడు.
ఐపీఎల్ 2022 సీజన్కు దూరమవుతున్నానని ఈ ఏడాది జనవరిలో ప్రకటించి అందరికీ షాకిచ్చాడు గేల్. దీంతో అతడి ఐపీఎల్ కెరీర్ ముగిసిందనే భావించారు. అయితే, వచ్చే ఏడాది రానున్నట్లు చేసిన తాజా ప్రకటనతో ఫ్యాన్స్ సంతోషం వ్యక్తం చేస్తున్నారు. ఐపీఎల్లో 142 మ్యాచ్లు ఆడి.. 4965 పరుగులు చేశాడు గేల్. అందులో ఆరు శతకాలు ఉన్నాయి. సెంచరీల జాబితాలో అగ్రస్థానంలో కొనసాగుతున్నాడు. రెండో స్థానంలో విరాట్ కోహ్లీ నిలిచాడు.
ఇదీ చదవండి: 'మంచి స్పిన్నర్లు ఎందరో ఉంటారు.. వార్న్ మాత్రం భిన్నం'
