IPL 2022: ఐపీఎల్ మెగా టీ20 లీగ్లో మరో ఆసక్తికరమైన పోరుకు రంగం సిద్ధమైంది. వరుస విజయాలతో దూసుకెళ్తూ పాయింట్స్ టేబుల్లో టాప్లో ఉన్న కోల్కతా నైట్రైడర్స్ను దిల్లీ క్యాపిటల్స్ ఢీకొట్టనుంది. ఆదివారం మధ్యాహ్నం జరగనున్న ఈ మ్యాచ్లో కేకేఆర్ జైత్రయాత్రకు బ్రేక్ వేసి ట్రాక్లోకి రావటం పంత్ సేనకు అంత సులభమేమీ కాదు. రెండు వరుస ఓటములతో డీలా పడిన దిల్లీ ఈ మ్యాచ్ను సొంతం చేసుకోవాలని పట్టుదలతో ఉంది. ఈ నేపథ్యంలో ఇరు జట్ల బలాబలాలను పరిశీలిద్దాం..
బలాబలాలు .. ఐపీఎల్లో దిల్లీ జట్టును పోటీలో నిలిపాడు మాజీ కెప్టెన్ శ్రేయస్ అయ్యర్. 2020లో దిల్లీని ఫైనల్కు చేర్చాడు. అయితే.. గాయం కారణంగా గత ఏడాది సీజన్లో తొలి అర్ధభాగం టోర్నీకి దూరమవ్వటంతో జట్టు పగ్గాలు రిషబ్ పంత్కు అప్పగించింది దిల్లీ. ఇటీవల జరిగిన మెగా వేలంలో శ్రేయస్ను దిల్లీ వదులుకుంది. ప్రస్తుత సీజన్లో శ్రేయస్ సారథ్యంలో కేకేఆర్ మూడు విజయాలతో టేబుల్ టాప్లో ఉంది. కేవలం ఆర్సీబీపైనే ఓటమి పాలైంది. మరోవైపు.. దిల్లీ క్యాపిటల్స్ ఈ సీజన్ను విజయంతో ప్రారంభించినా.. ఆ తర్వాత రెండు వరుస ఓటములతో వెనకబడిపోయింది. పాయింట్స్ టేబుల్లో 7వ స్థానంలో కొనసాగుతోంది. పంత్, శ్రేయస్ భవిష్యత్తులో టీమిండియా కెప్టెన్లుగా పలువురు భావిస్తున్న తరుణంలో ఇరువురి మధ్య పోరు ఆసక్తికరంగా కనిపిస్తోంది.
బౌలింగ్ సమస్యతో సతమతమవుతున్న దిల్లీకి దక్షిణాఫ్రికా ఆటగాడు అన్రిచ్ నోర్జే చేరడం ఊరట కలిగించే విషయమే అయినా.. టీ20 ప్రపంచ కప్ నుంచి అతను బౌలింగ్ చేయలేదు. టాప్ బౌలర్స్ ఉన్నప్పటికీ ధారాళంగా పరుగులు ఇస్తుండటం దిల్లీని కలవరపెడుతోంది. ముస్తఫిజర్ రెహ్మాన్ ఒక్కడే కాస్త పర్వాలేదనిపిస్తున్నాడు. అటు బ్యాటింగ్లోనూ తడబడుతోంది దిల్లీ. మరోవైపు.. ముంబయి ఇండియన్స్పై విజయంతో మంచి జోష్ మీదుంది కోల్కతా. ఆల్రౌండర్ ప్రదర్శనతో ఆటగాళ్లు జట్టును ముందుకు నడిపిస్తున్నారు. ప్రధాన బౌలర్ ఉమేశ్ యాదవ్ మంచి ఫామ్లో ఉండటం ఆ జట్టుకు కలిసొచ్చే విషయం.
లఖ్నవూను రాజస్థాన్ అడ్డుకుంటుందా?: మూడు వరుస విజయాలతో దూసుకెళ్తున్న లఖ్నవూ సూపర్ జెయింట్స్తో ఆదివారం సాయంత్రం తలపడనుంది రాజస్థాన్ రాయల్స్. తొలి సీజన్లోనే అద్భుత ప్రదర్శనతో పాయింట్స్ టేబుల్లో టాప్-3లో కొనసాగుతోంది లఖ్నవూ. ఆడిన నాలుగు మ్యాచుల్లో మూడు గెలిచి ఉత్సాహంతో ఉంది. తొలి మ్యాచ్ గుజరాత్ టైటాన్తో ఓడినా.. ఆ తర్వాత చెన్నై సూపర్ కింగ్స్, హైదరాబాద్, దిల్లీ క్యాపిటల్స్తో జరిగిన మూడు మ్యాచుల్లో విజయం సాధించింది. ఎవిన్ లెవిస్, దీపక్ హుడా, ఆయుష్ బదోనిలు బ్యాట్తో రాణిస్తుండగా.. అవేశ్ ఖాన్, రవి బిష్ణోయ్లు తమ స్పిన్ మాయాజాలాన్ని చూపిస్తున్నారు. మరోవైపు.. రాజస్థాన్ రాయల్స్ తొలి రెండు మ్యాచుల్లో విజయం సాధించగా.. మూడో మ్యాచ్లో ఓటమిపాలైంది. ఆర్ఆర్ బ్యాటర్ జోస్ బట్లర్ మంచి ఫామ్లో ఉండటం ఆ జట్టు బ్యాటింగ్కు కలిసొచ్చే విషయం. ఐపీఎల్ 2022 సీజన్లో తొలి సెంచరీ నమోదు చేశాడు బట్లర్. దేవదత్ పడిక్కల్, హెట్మెయర్లు తమవంతుగా పరుగులు రాబడుతున్నారు. అయితే.. పేసర్ నవదీప్ సైనీ దారాళంగా పరుగులు సమర్పించుకోవటం ఆందోళన కలిగిస్తోంది.
ఇదీ చూడండి: ముంబయికి కలిసిరాని మెగా ఆక్షన్.. గతంలోనూ వరుస ఓటములు
