ఐపీఎల్లో మరో ఆసక్తికర పోరుకు రంగం సిద్ధమైంది. కేఎల్ రాహుల్ నేతృత్వంలోని పంజాబ్ కింగ్స్, సంజూ శాంసన్ కెప్టెన్సీలోని రాజస్థాన్ రాయల్స్తో తలపడనుంది. సోమవారం(ఏప్రిల్ 12) ఈ మ్యాచ్ జరగనుంది. ఇందులో శుభారంభం చేయాలని ఇరుజట్లు తహతహలాడుతున్నాయి. ఈ నేపథ్యంలో వాటి బలాబలాలు ఓ సారి పరిశీలిద్దాం.
రాజస్థాన్ బోణీ కొట్టేనా?
ఆల్రౌండర్ బెన్ స్టోక్స్, బట్లర్, కెప్టెన్ శాంసన్లతో రాజస్థాన్ బ్యాటింగ్ లైనప్ బలంగా కనిపిస్తోంది. బట్లర్తో కలిసి యశస్వి జైస్వాల్ ఇన్నింగ్స్ ప్రారంభించే అవకాశం ఉంది. శివం దూబే, శ్రేయస్ గోపాల్, రాహుల్ తెవాతియా, రియాన్ పరాగ్, లివింగ్స్టన్ వంటి ఆటగాళ్లు అటు బంతితోనూ మాయ చేసే సత్తా ఉన్నవాళ్లే. లెగ్ స్పిన్నర్లను తుది జట్టులోకి తీసుకోవాలని శాంసన్ భావిస్తే గోపాల్తో పాటు తెవాతియాకు స్థానం దక్కుతుంది! గాయం కారణంగా లీగ్కు దూరమైన ఇంగ్లాండ్ ఆటగాడు ఆర్చర్ స్థానంలో కొత్తగా జట్టులోకి వచ్చిన క్రిస్ మోరిస్.. బౌలింగ్ విభాగాన్ని నడిపించొచ్చు.
తుది 11 మందిలో నలుగురు మాత్రమే విదేశీ ఆటగాళ్లు ఉండాలి. దీంతో ముస్తాఫిజుర్ రెహామాన్కు అవకాశం ఇస్తారో లేదో చూడాలి. అనుభవం ప్రకారం చూస్తే కనుక జైదేవ్ ఉనద్కత్కు స్థానం దక్కడం ఖాయంగా కనిపిస్తోంది. కార్తిక్ త్యాగి, చేతన్ సకారియాలలో ఏ ఒక్కరిని సోమవారం నాటి మ్యాచ్లో బరిలోకి దింపుతారో వేచి చూడాల్సిందే.
ఇదీ చదవండి: 'మిస్టర్ కూల్' ధోనీపై ద్రవిడ్ కోప్పడిన వేళ!
శుభారంభం దక్కేనా?
రాహుల్ (గతేడాది 670 పరుగులు), మయాంక్ అగర్వాల్ (గత సీజన్లో 424 రన్స్), క్రిస్ గేల్ వంటి బ్యాట్స్మెన్తో పంజాబ్ బ్యాటింగ్ ఆర్డర్ దుర్భేద్యంగా ఉంది. గతేడాది లాగే రాహుల్-అగర్వాల్ జోడీ ఓపెనింగ్ చేసే అవకాశం ఉంది. పొట్టి ఫార్మాట్లో ప్రపంచ నంబర్ వన్ బ్యాట్స్మెన్ డేవిడ్ మలన్.. యువ క్రికెటర్ షారుక్ ఖాన్, నికోలస్ పూరన్ పంజాబ్కు అదనపు బలమని చెప్పొచ్చు.
గతేడాది అదరగొట్టిన షమి బౌలింగ్ బృందాన్ని ముందుండి నడిపించే అవకాశం ఉంది. బిగ్బాష్ లీగ్లో రాణించిన ఆసీస్ స్పీడ్ స్టార్స్ జే రిచర్డ్సన్, రిలే మెరిడిత్తో పాటు క్రిస్ జోర్డాన్లలో ఎవరు కొత్త బంతిని పంచుకుంటారో చూడాలి. స్పిన్ విభాగానికొస్తే మురుగన్ అశ్విన్, రవి బిష్ణోయ్ల ద్వయానికి తుది జట్టులో స్థానం దక్కొచ్చు.
జట్లు (అంచనా)
రాజస్థాన్: సంజూ శాంసన్(కెప్టెన్), జోస్ బట్లర్, బెన్ స్టోక్స్, యశస్వి జైస్వాల్, డేవిడ్ మిల్లర్, రియాన్ పరాగ్, రాహుల్ తెవాతియా, శ్రేయస్ గోపాల్, జైదేవ్ ఉనద్కత్, క్రిస్ మోరిస్, చేతన్ సకారియా.
పంజాబ్: కేఎల్ రాహుల్(కెప్టెన్), మయాంక్ అగర్వాల్, డేవిడ్ మలన్, నికోలస్ పూరన్, సర్ఫ్రాజ్ ఖాన్, దీపక్ హుడా, మురుగన్ అశ్విన్, రవి బిష్ణోయ్, మహమ్మద్ షమి, జే రిచర్డ్సన్, రిలే మెరిడిత్.
ఇదీ చదవండి: గడ్డం పెంచితే.. నా పని అంతే: పాంటింగ్
