IPL mega auction 2022: ఐపీఎల్ రెండు రోజు వేలం కూడా ఆసక్తికరంగా సాగుతోంది. కొంతమంది ప్లేయర్లు అధిక ధరకు అమ్ముడుపోతుండగా మరికొందరు తక్కువ ధర పలుకుతున్నారు. అయితే ఈ ఆటగాళ్లలో వెస్టిండీస్ ఆల్రౌండర్లు అదరగొట్టారు. ఒడియన్ స్మిత్, రొమారియో షెపర్డ్కు భారీ ధర దక్కింది. అంతర్జాతీయ టీ-20 టోర్నీల్లో అదరగొడుతున్న ఆల్రౌండర్ టిమ్ డేవిడ్ మంచి ధర పలికాడు.
టిమ్డేవిడ్
అంతర్జాతీయ టీ-20 టోర్నీల్లో అదరగొడుతున్న ఆల్రౌండర్ టిమ్ డేవిడ్ను మంచి ధర పలికాడు. ఇతడి కోసం పలు జట్లు పోటీపడినా చివరికి ముంబయిదే పైచేయి అయింది. రూ. 8.25 కోట్లకు అతడిని దక్కించుకుంది. ఇతడి టీ-20 స్ట్రైక్ రేట్ 159.39 కావడం విశేషం. బంతిని బలంగా బాదగల ఈ పొడగరి కచ్చితంగా టీమ్లో ఉండే అవకాశముంది.
6.5 అడుగుల ఎత్తు ఉండే టిమ్.. ఇప్పటివరకు 14 టీ20 అంతర్జాతీయ మ్యాచులు ఆడి 558 పరుగులు చేశాడు. ఇతడి అత్యధిక స్కోరు 92 నాటౌట్. ఇతడు స్పిన్ బౌలింగ్ కూడా చేయగలడు. గతంలో టిమ్.. రాయల్ ఛాలెంజర్స్ బెంగళూరుకు ప్రాతినిధ్యం వహించాడు.
స్మిత్
స్మిత్ కోసం పంజాబ్ కింగ్స్, రాజస్థాన్ రాయల్స్ పోటీ పడగా.. చివరకు పంజాబ్ రూ.6కోట్లకు కొనుగోలు చేసింది. కాగా, భారత్తో జరిగిన వన్డే సిరీస్లో స్మిత్ అద్భుతంగా రాణించాడు. టీమ్ఇండియాతో ఆడిన రెండు వన్డేల్లో అతడు 60 పరుగులు సహా మూడు వికెట్లు తీశాడు. కరేబియన్ ప్రీమియర్ లీగ్-2021లో కూడా అద్భతంగా రాణించాడు. ఈ టోర్నీలో అత్యధిక వికెట్లు తీసిన రెండో బౌలర్గా నిలిచాడు.
షెపర్డ్
మరో ఆల్రౌండర్ రొమారియో షెపర్డ్ను రూ.7.75కోట్లకు సన్రైజర్స్ హైదరాబాద్ సొంతం చేసుకుంది. వేలంలో రూ.75లక్షల కనీస ధరతో వచ్చిన అతడి కోసం లక్నో సూపర్ జెయింట్స్, ముంబయి ఇండియన్స్, చెన్నై సూపర్ కింగ్స్, రాజస్థాన్ రాయల్స్, సన్రైజర్స్ పోటీపడ్డాయి. చివరకు అతడు సన్రైజర్స్ గూటికి చేరాడు.
2019లో వెస్టిండీస్ తరఫున అరంగేట్రం చేశాడు షెపర్డ్. ఇప్పటివరకు అతడు 10 వన్డేలు, 14 టీ20 మ్యాచులు ఆడాడు. ఇటీవల ఇంగ్లాండ్తో జరిగిన టీ20సిరీస్లో బాగా రాణించాడు.
ఇదీ చూడండి: వారి కోసం కోట్లు కుమ్మరించిన ముంబయి ఇండియన్స్
