మార్చి 31 నుంచి ప్రారంభంకానున్న ఇండియన్ ప్రీమియర్ లీగ్ 16వ సీజన్ కోసం అంతా సిద్ధమైపోయింది. అయితే గత సీజన్లో ఛాంపియన్‌గా నిలిచిన గుజరాత్ టైటాన్స్కు.. ఈ సీజన్ ప్రారంభానికి ముందు ఓ అదిరిపోయే వార్త అందింది. తాజాగా టీ20 అంతర్జాతీయ బౌలింగ్ ర్యాంకింగ్‌లో ఆ జట్టు స్టార్ బౌలర్ రషీద్ ఖాన్ అగ్రస్థానానికి చేరుకున్నాడు. రీసెంట్గా పాకిస్థాన్తో జరిగిన టీ20 సిరీస్‌లో ఆకట్టుకునే ప్రదర్శన చేసి ఈ మార్క్ను అందుకున్నాడు. లంక మిస్టరీ స్పిన్నర్ వనిందు హసరంగాను అధిగమించి తొలి ర్యాంకును సాధించాడు. మెగాటోర్నీ 2023కి రెండు రోజుల మందుకు అతడు ఈ ఘనత సాధించడం విశేషం. దీంతో అతడు ఈ సీజన్లో తన బంతితో ఎలాంటి మ్యాజిక్ చూపిస్తాడా అని అభిమానుల్లో ఆసక్తి నెలకొంది. కాగా, గతంలోనూ 2018లో టీ20 ఫార్మాట్లో రషీద్ తొలిసారి నెంబర్ వన్ బౌలర్‌గా నిలిచాడు. గత సీజన్లో గుజరాత్ టైటాన్స్ ట్రోఫీని ముద్దాడడంలో కీలకంగా వ్యవహరించాడు రషీద్ ఖాన్. అప్పుడు మొత్తంగా 16 మ్యాచులు ఆడిన అతడు 19వికెట్లు పడగొట్టాడు. మొత్తంగా ఈ గ్రాండ్ లీగ్లో అతడు ఇప్పటివరకు మొత్తం 92 మ్యాచ్‌లు ఆడి.. 6.38 ఎకానమీతో 112 వికెట్లు తీశాడు.
కాగా, షార్జా వేదికగా పాకిస్థాన్తో జరిగిన టీ20 సిరీస్‌లో రషీద్ ఖాన్ ఆకట్టుకునే ప్రదర్శన చేశాడు. చాలా పొదుపుగా బౌలింగ్ వేశాడు. మొత్తం మూడు మ్యాచ్ ఈ సిరీస్‌లో తొలి మ్యాచ్లో ఒక వికెట్ తీసిన అతడు.. రెండో టీ20లోనూ ఓ వికెట్ తీశాడు. ఇక చివరి మూడో టీ20లోనూ ఓ వికెట్ పడగొట్టాడు. అలా ఈ ప్రదర్శనతో తాజా టీ20 ర్యాంకింగ్స్లో 710 పాయింట్లతో అగ్రస్థానాన్ని దక్కించుకున్నాడు. అప్ఘానిస్థాన్కు చెందిన మరో ప్లేయర్ పేసర్‌ ఫజల్‌ హక్‌ ఫారూకీ.. మూడో ర్యాంకుకు చేరుకున్నాడు. అతడు పాక్‌తో జరిగిన సిరీస్‌లో 5 వికెట్లు తీసి టాప్‌-5లోకి దూసుకొచ్చాడు. ఇతడు ఐపీఎల్ తాజా సీజన్లో సన్రైజర్స్ హైదరాబాద్కు ప్రాతినిధ్యం వహిస్తున్నాడు. ఇతడి ప్రదర్శనతో కూడా సన్రైజర్స్కు మంచి బూస్టప్ వచ్చినట్టైంది.ఇక అప్ఘన్కు చెందిన మిస్టరీ స్పిన్నర్ ముజీబ్‌ ఉర్‌ రెహ్మాన్‌ కూడా ఎనిమిదో ర్యాంకుకు చేరుకున్నాడు.
మొత్తంగా తాజా ర్యాంకింగ్స్లో రషీద్ ఖాన్(అఫ్గానిస్తాన్‌- 710 పాయింట్లు), వనిందు హసరంగ(శ్రీలంక- 695 పాయింట్లు), ఫజల్‌హక్‌ ఫారూకీ(అఫ్గనిస్తాన్‌- 692 పాయింట్లు), జోష్‌ హాజిల్‌వుడ్‌(ఆస్ట్రేలియా- 690 పాయింట్లు), ఆదిల్‌ రషీద్(ఇంగ్లాండ్-684 పాయింట్లు) తొలి ఐదు స్థానాల్లో నిలిచారు.
రషీద్ 500 వికెట్లు.. స్టార్ బౌలర్ రషీద్ ఖాన్.. రీసెంట్గా ఓ అరుదైన ఘనత కూడా సాధించాడు. టీ20 ఫార్మాట్ లో 500 వికెట్ల మార్క్ను అందుకున్నాడు. దక్షిణాఫ్రికా టీ20 లీగ్లో ప్రిటోరియా క్యాపిటల్స్- ముంబయి కేప్ టౌన్ మధ్య జరిగిన మ్యాచ్లో తన 500వ వికెట్ను తీశాడు రషీద్.
ఇదీ చూడండి: 'సచిన్ తెందూల్కర్ ముఖ్యమంత్రి కావాలి'.. ఐస్క్రీం వ్యాపారి వినూత్న ప్రచారం!
