IPL 2022: ఐదుసార్లు టైటిల్ గెలిచిన జట్టు ఒకటైతే.. నాలుగు సార్లు గెలిచిన జట్టు మరొకటి.. ఇలా చెప్పుకుంటూ పోతే ప్రతీ జట్టు ఐపీఎల్లో ప్రత్యేక స్థానాన్ని సంపాదించుకున్నాయి. ఎనిమిది జట్లతో హోరాహోరిగా కొనసాగుతున్న ఐపీఎల్లోకి ఈసారి మరో రెండు కొత్త జట్లు ఎంట్రీ ఇచ్చాయి. మరి వీటిలో ఏ జట్లకు ప్లేఆఫ్స్ చేరుకునే అవకాశం ఉందో చూడండి.
1.చెన్నై సూపర్ కింగ్స్
నాలుగు సార్లు టైటిల్ విజేత, డిఫెండింగ్ ఛాంపియన్ చెన్నై సూపర్ కింగ్స్.. మరో టైటిల్ కోసం సిద్ధమవుతోంది. ఈ జట్టుకు ప్రధాన బలం మహేంద్రసింగ్ ధోనీ నాయకత్వమే. రవీంద్ర జడేజా, మొయిన్ అలీ రూపంలో అద్భుతమైన ఆల్రౌండర్లు సీఎస్కే సొంతం. గతేడాది అత్యధిక పరుగులు చేసి ఆరెంజ్ క్యాప్ దక్కించుకున్న రుత్రాజ్ గైక్వాడ్ లాంటి ఆటగాళ్లతో ఉన్న చెన్నై ప్లేఆఫ్కు చేరడం కష్టమైన పని కాదు. అయితే దీపక్ చాహర్ లాంటి ప్రధాన బౌలర్ ఈ సీజన్ మొత్తానికీ దూరమైతే జట్టుపై కొంత ప్రతికూల ప్రభావం చూపవచ్చు.
2.దిల్లీ క్యాపిటల్స్
శిఖర్ ధావన్, శ్రేయస్ అయ్యర్ల రూపంలో ప్రధాన ఆటగాళ్లను కోల్పోయినా.. దిల్లీ క్యాపిటల్స్ బలంగానే కనిపిస్తోంది. 2020లో రన్నరప్గా నిలిచిన ఈ జట్టు.. ఈ సారి జరిగిన మెగావేలంతో మరింత పటిష్ఠంగా మారింది. స్టార్ బ్యాటర్ డేవిడ్ వార్నర్తో కలిసి పృథ్వీ షా ఓపెనింగ్ చేయనున్నాడు. రిషభ్ పంత్, మిచెల్ మార్ష్లతో మిడిల్ ఆర్డర్ దృఢంగా ఉండగా... బౌలింగ్లో శార్దుల్ ఠాకూర్, కుల్దీప్ యాదవ్, అక్షర్ పటేల్, ఖలీల్ అహ్మద్, చేతన్ సకారియా, రెహ్మన్లతో జట్టు సమతూకంగా కనబడుతోంది.
3. కోల్కతా నైట్రైడర్స్
రెండు సార్లు కప్పు గెలిచిన కోల్కతా నైట్రైడర్స్.. ఈ సారి కొత్త కెప్టెన్తో బరిలోకి దిగనుంది. శ్రేయస్ అయ్యర్ను వేలంలో కొన్న యాజమాన్యం అతడికే జట్టు పగ్గాలను అప్పగించింది. వెంకటేశ్ అయ్యర్, నితీశ్ రాణా, ఆండ్రూ రసెల్, సునీల్ నరైన్ లాంటి హిట్టర్లతో బలంగా ఉంది. ఇక బౌలింగ్ విషయానికి వస్తే ప్యాట్ కమిన్స్, ఉమేశ్ యాదవ్, టిమ్ సౌథీ, నరైన్, చక్రవర్తిలతో బ్యాలెన్స్డ్గా ఉంది.
4. లఖ్నవూ సూపర్ జెయింట్స్
తొలిసారిగా ఐపీఎల్లో అడుగుపెడుతున్న లఖ్నవూ సూపర్ జెయింట్స్ కూడా ఈసారి టైటిల్ ఫేవరెట్గానే కనబడుతోంది! పేపర్పైన ఈ జట్టు బలంగా ఉంది. అనుభవం కలిగిన ఆటగాళ్లు కేఎల్ రాహుల్, క్వింటన్ డికాక్లతో ఓపెనింగ్ జోడి చక్కగా కుదిరింది. అలాగే మనీశ్ పాండే, దీపక్ హుడా, కృనాల్ పాండ్య, మార్కస్ స్టోయినిస్, జేసన్ హోల్డర్లతో పవర్ఫుల్ బ్యాటింగ్ లైనప్ ఉంది. ఇక బౌలింగ్ విషయానికొస్తే అవేశ్ ఖాన్, మార్క్ వుడ్, హోల్డర్, స్టోయినిస్, రవి బిష్ణోయ్, పాండ్య ఉన్నారు. దీంతో కొత్త జట్టు కూడా ప్లేఆఫ్స్కు గట్టి పోటీనే ఇస్తుంది.
ఐపీఎల్ 2022 ఈనెల 26న ప్రారంభం కానుంది. ఇప్పటికే జట్లన్నీ కెప్టెన్లను నియమించుకొని ప్రాక్టీస్ను మొదులుపెట్టేశాయి. వీటిలో ఏ జట్టు ప్లేఆఫ్స్కు చేరుతుందో చూడాలంటే మరికొన్ని రోజులు వేచిచూడాల్సిందే.
ఇదీ చదవండి: కోహ్లీలా ఉండలేను.. ధోనీకి నాకూ పోలిక ఉంది: డుప్లెసిస్
