IPL 2022 CSK: ఐపీఎల్ మెగా టీ20 లీగ్ 15వ సీజన్లో చెన్నై సూపర్ కింగ్స్ జట్టు అత్యంత పేలవ ప్రదర్శనతో విమర్శలు ఎదుర్కొంటోంది. ఆడిన 6 మ్యాచుల్లో కేవలం ఒకే ఒక్క విజయంతో పాయింట్ల పట్టికలో తొమ్మిదో స్థానంలో కొనసాగుతున్న ఆ జట్టుకు మరో ఎదురుదెబ్బ తగిలింది. ముంబయి ఇండియన్స్తో గురువారం జరిగే మ్యాచ్కు ముందు ఇద్దరు కీలక ఆటగాళ్లు దూరమయ్యారు. కోల్కతా నైట్రైడర్స్తో జరిగిన తొలి మ్యాచ్లో సీఎస్కే పేసర్ అడమ్ మిల్నే మోకాలికి గాయమైంది. గాయం తీవ్రమవటం వల్ల ఈ సీజన్ మొత్తానికి దూరమైనట్లు సంబంధిత వర్గాలు తెలిపాయి.
మిల్నే స్థానంలో జూనియర్ 'మలింగ': గాయం కారణంగా జట్టుకు దూరమైన అడమ్ మిల్నే స్థానంలో జూనియర్ మలింగగా పేరున్న శ్రీలంక యువ పేసర్ మథీశ పథిరాణాను జట్టులోకి తీసుకుంటున్నట్లు సీఎస్కే ప్రకటించింది. ఈ 19 ఏళ్ల మీడియం పేసర్ 2020, 2022లో జరిగిన అండర్ 19 ప్రపంచకప్లో శ్రీలంక తరఫున ఆడి మంచి ప్రదర్శన చేశాడు. రూ.20 లక్షల బేస్ ప్రైజ్తో జట్టులోకి తీసుకుంటున్నట్లు తెలిసింది.
ఈ ఐపీఎల్ సీజన్లో దీపక్ చాహర్ తర్వాత సీఎస్కే నుంచి అడమ్ మిల్నే టోర్నీకి దూరమయ్యాడు. మిల్నే కేవలం ఒకే మ్యాచ్ ఆడి 2.3 ఓవర్లలో 19 పరుగులు ఇచ్చాడు. వికెట్లేమీ తీయలేదు. తొలి మ్యాచ్ తర్వాత మాట్లాడిన సీఎస్కే కోచ్ స్టిఫెన్ ఫ్లెమింగ్.. మిల్నే త్వరగా కోలుకుని జట్టులోకి వస్తాడని ఆశాభావం వ్యక్తం చేశాడు. కానీ, టోర్నీ మొత్తానికి దూరం కావటం జట్టుకు పెద్ద ఎదురుదెబ్బగానే చెప్పాలి.
పెళ్లి కోసం స్వదేశానికి సీఎస్కే బ్యాటర్: చెన్నై సూపర్ కింగ్స్ ఓపెనర్ డెవాన్ కాన్వే ఐపీఎల్ను వీడాడు. తన వివాహం కోసం భారత్ను వీడి దక్షిణాఫ్రికా చేరుకున్నాడు. మరోవారం పాటు ఐపీఎల్కు దూరం కానున్నాడని సీఎస్కే వర్గాలు తెలిపాయి. అయితే.. కాన్వే ఇప్పటి వరకు ఒకే ఒక్క మ్యాచ్ ఆడాడు. దీంతో అతడి సేవలను జట్టు అంతగా కోల్పోకపోవచ్చని విశ్లేషకులు భావిస్తున్నారు. కాన్వే ఏప్రిల్ 24(ఆదివారం) సీఎస్కే స్క్వాడ్లో చేరతాడని సమాచారం. అయినప్పటికీ కొవిడ్-19 ప్రోటోకాల్స్ ప్రకారం మూడు రోజుల పాటు ఐసోలేషన్లో ఉండాల్సి ఉంటుంది. ఆ తర్వాతే సీఎస్కే క్యాంప్లో చేరాలి. దీంతో వచ్చే రెండు మ్యాచ్లకు దూరం కానున్నాడు.
ఇదీ చూడండి: 'కెప్టెన్గా తప్పుకుంటానని ధోనీ.. నాకు ముందే చెప్పాడు'
