ఆస్ట్రేలియా పర్యటనలో చోటు దక్కపోవడంపై తాను అసంతృప్తికి గురైనట్లు టీమ్ఇండియా ఆటగాడు సూర్యకుమార్ యాదవ్ చెప్పాడు. జట్లు ప్రకటించిన రోజు తాను చాలా బాధపడ్డాడని అన్నాడు. కానీ ఆ సమయంలో ముంబయి ఇండియన్స్ సారథి రోహిత్ శర్మతో మాట్లాడిన తర్వాత ఆ బాధ పోయిందని తెలిపాడు. హిట్మ్యాన్ మాటలు ఎంతో స్ఫూర్తినిచ్చాయని వెల్లడించాడు.
"ఆ రోజు జిమ్లో రోహిత్ నా పక్కన కూర్చున్నాడు. నేను బాధలో ఉన్నాని అతడితో చెప్పాను. 'ఐపీఎల్ ప్రారంభం నుంచి జట్టు కోసం నువ్వు నీ బాధ్యతను సరిగ్గా నిర్వర్తిస్తున్నావు. టీమ్ఇండియాలో చోటు దక్కకపోవడంపై ఆలోచించకుండా, ఇప్పుడు కూడా అదే చేస్తావని నా నమ్మకం. సరైనా సమయంలో నీకు అవకాశం వస్తుంది. అది ఈరోజు లేదా ఇంకెప్పుడైనా రావాల్సిందే. నీపైనా నువ్వు విశ్వాసం ఉంచు' అని నాతో అన్నాడు. ఈ మాటలు నన్ను బాధ నుంచి బయటకు లాగి, ఆత్మవిశ్వశాన్ని నింపాయి"
-సూర్యకుమార్ యాదవ్, టీమ్ఇండియా క్రికెటర్
సంతృప్తినిచ్చింది
ఈ ఐపీఎల్తో తాను మరింత మెరుగయ్యానని సూర్యకుమార్ చెప్పాడు. మంచి ప్రదర్శన చేయడం కోసం బాగా శ్రమించానని తెలిపాడు.
"2018 నుంచి నన్ను నేను మరింత మెరుగుపరుచుకోవడానికి ప్రతిరోజు శ్రమిస్తూనే ఉన్నాను. సాధారణంగా లెగ్ సైడ్ ఆడటానికి బాగా ఇష్టపడతాను. ఆ తర్వాత మరింత ప్రాక్టీస్ చేసి ఆఫ్ సైడ్ స్ట్రోక్స్ ఆడటం బాగా నేర్చుకున్నాను. మొత్తంగా ఈ ఐపీఎల్లో నా ప్రదర్శనకు నేను సంతృప్తిగా ఉన్నాను. లీగ్ ప్రారంభం నుంచి ఎక్కువ పరుగులు చేయడం కన్నా జట్టు విజయానికి ఏం చేయగలను అనే విషయాన్ని ఎక్కువగా ఆలోచించాను"
-సూర్యకుమార్ యాదవ్, టీమ్ఇండియా క్రికెటర్
ఈ సీజన్లో అద్భుత ప్రదర్శనతో క్రికెట్ అభిమానుల నుంచి పలువురు మాజీ, ప్రస్తుత క్రికెటర్లందరీ దృష్టినీ ఆకర్షించాడు. అతడికి టీమ్ఇండియాలో చోటు దక్కుతుందని అందరూ అనుకున్నారు. కానీ అతడు ఎంపిక కాలేదు. దీంతో పలువులు క్రికెటర్లు సూర్యకు మద్దతు తెలుపుతూ సెలక్టర్లపై విమర్శలు కూడా చేశారు.
