టీమ్ఇండియా వైట్ బాల్ కెప్టెన్సీ లేదా టీ20 ఫార్మాట్ కెప్టెన్సీ బాధ్యతను వైస్ కెప్టెన్ రోహిత్శర్మ స్వీకరించాలని మాజీ క్రికెటర్ గౌతమ్ గంభీర్ అభిప్రాయపడ్డాడు. ఐపీఎల్లో అత్యంత విజయవంతమైన కెప్టెన్గా రోహిత్ నిలిచాడని అన్నాడు. కెప్టెన్ అయ్యేందుకు హిట్మ్యాన్కు తగిన అర్హతలు ఉన్నాయని గంభీర్ తెలిపాడు.
"రోహిత్ శర్మ భారత కెప్టెన్ కాకపోతే, జట్టుకే నష్టం కలుగుతుంది తప్ప రోహిత్కు ఎలాంటి నష్టం వాటిల్లదు. ఒక మంచి కెప్టెన్కు జట్టుతో అనుబంధం ఎంతో ముఖ్యమని నేను అంగీకరిస్తున్నా. కానీ, కెప్టెన్ అవ్వడానికి పరిమితులు ఏమిటి? నాయకత్వ పగ్గాల కోసం పరిమితులతో సహా బెంచ్ మార్క్ ఒకేలా ఉండాలి. రోహిత్ శర్మ తన జట్టుకు ఐదు ఐపీఎల్ టైటిళ్లను అందించాడు. కెప్టెన్సీని ఇరువురికి పంచే మార్గాన్ని పరిశీలించవచ్చు. కోహ్లీ కెప్టెన్సీ కంటే రోహిత్శర్మ నాయకత్వం ఎంత తేడా ఉంటుందో వైట్ బాల్ క్రికెట్లో చూపించాడు. రోహిత్ ఇప్పటివరకు ఐదు ఐపీఎల్ టైటిళ్లను సాధించి పెట్టాడు. కోహ్లీ మాత్రం ఒక్క ట్రోఫీని తన ఖాతాలో వేసుకోలేదు. విరాట్ పేలవమైన కెప్టెన్ అని నేను అనడం లేదు. ఇద్దరూ ఒకే సమయంలో ఐపీఎల్లో జట్టు పగ్గాలను చేపట్టారు. రోహిత్ సరైన నాయకుడిగా నిలబడ్డాడని నేను భావిస్తున్నా."
- గౌతమ్ గంభీర్, టీమ్ఇండియా మాజీ క్రికెటర్
దుబాయ్ వేదికగా జరిగిన ఐపీఎల్ 2020 ఫైనల్లో దిల్లీ క్యాపిటల్స్పై ముంబయి ఇండియన్స్ ఘన విజయం సాధించింది. ఈ గెలుపుతో ఐదోసారి ఐపీఎల్ టైటిల్ కైవసం చేసుకుంది. ముంబయి జట్టుకు ట్రోఫీని అందించడంలో కెప్టెన్గా రోహిత్శర్మ విజయవంతమైన ఇన్నింగ్స్ ఆడాడు. రోహిత్శర్మ నేతృత్వంలో ముంబయి ఇండియన్స్ ఐదుసార్లు (2013, 2015, 2017, 2019, 2020) విజేతగా నిలిచింది.
