తొలి రెండు మ్యాచ్ల్లో అద్భుత విజయం సాధించింది రాజస్థాన్ రాయల్స్. తొలి మ్యాచ్లో ముంబయిపై ఓడినా.. పుంజుకుని సన్రైజర్స్ హైదరాబాద్పై గెలిచింది కోల్కతా నైట్ రైడర్స్. ఇప్పుడీ రెండు జట్లు నేడు (బుధవారం) హోరాహోరీగా తలపడనున్నాయి. హ్యాట్రిక్ విజయం అందుకోవాలనే లక్ష్యంతో రాజస్థాన్, మరోసారి సత్తా చాటాలని దినేశ్ కార్తీక్ సేన పట్టుదలతో ఉన్నాయి. కచ్చితమైన వ్యూహాలు అమలు చేసి, పాయింట్లు పెంచుకోవాలని చూస్తున్నాయి. ఈ సందర్భంగా ఇరు జట్ల బలాలు, బలహీనతలపై ఓ లుక్కేద్దాం.
రాజస్థాన్ రాయల్స్
ఈ ఐపీఎల్ అభిమానులకు అసలైన మజా రాజస్థాన్ రాయల్స్ బరిలో దిగడం నుంచే ప్రారంభమైంది. తొలి మ్యాచ్లో అద్భుత స్కోరు చేసి ధోనీ సేనను మట్టికరిపించింది. శాంసన్(74) మెరుపులు, స్మిత్(69) మాస్టర్ స్ట్రోక్తో ఈ సీజన్లో 200కు పైగా స్కోరు చేసిన తొలి జట్టుగా నిలిచింది రాజస్థాన్. ఇదే జోష్తో పంజాబ్ జట్టును చతికిలపడేలా చేసింది. మరోసారి సంజూ శాంసన్(85), స్మిత్(50) అర్ధ శతకాలతో మెరిశారు. అయితే ఈ మ్యాచ్ చివర్లో రాహుల్ తెవాతియా ధనాధన్ ఇన్నింగ్స్ అందరీ దృష్టిని ఆకర్షించింది. దీంతో అతడు హీరోగా మారిపోయాడు. మొత్తంగా రెండు మ్యాచ్ల్లోనూ ఏమాత్రం జోరు తగ్గకుండా ప్రత్యర్థులపై విరుచుకుపడింది రాజస్థాన్. ప్రస్తుతం కోల్కతాతో జరిగే మ్యాచ్లోనూ ఈ ఆటగాళ్లే రాయల్స్కు బలం. వీరు ఇదే జోరును కొనసాగిస్తే హ్యాట్రిక్ విజయాన్ని అందుకోవడం ఖాయం.
కోల్కతా నైట్ రైడర్స్
కోల్కతా నైట్ రైడర్స్.. తొలి మ్యాచ్లోనే ముంబయిపై ఓడినా.. పుంజుకుని సన్రైజర్స్ హైదరాబాద్పై విజయాన్ని అందుకుంది. అయితే రెండు మ్యాచుల్లోనూ స్కోరు తక్కువే చేసింది. తొలి మ్యాచ్లో సారథి దినేశ్ కార్తీక్, నితీశ్ రానా జట్టును గెలిపించడానికి విఫలయత్నం చేశారు. ఈ మ్యాచ్ చివర్లో కమిన్స్ (33, 12 బంతుల్లో; 1×4, 4×6) విరుచుకుపడ్డా.. అప్పటికే మ్యాచ్ చేజారిపోయింది. ఆ తర్వాత మ్యాచ్లో సన్రైజర్స్ పేలవమైన ప్రదర్శన చేయడం వల్ల అదృష్టం కొద్దీ కోల్కతా గెలిచింది. లేదంటే మళ్లీ ఓటమిని మూటగట్టుకోవాల్సి ఉండేది. శుభమన్ గిల్(70), ఇయాన్ మోర్గాన్, నితీశ్ రానా తప్ప మిగితా వారు విఫలమయ్యారు. మరి ఈ మ్యాచ్లోనైనా కచ్చితమైన వ్యూహాలతో బరిలో దిగితే తప్ప గెలవడం కష్టమనే చెప్పాలి.
జట్ల అంచనాలు
కోల్కతా
సునీల్ నరైన్, శుభ్మన్ గిల్, దినేశ్ కార్తిక్(కెప్టెన్), నితీశ్ రానా, మోర్గాన్, ఆండ్రూ రసెల్, కమిన్స్, కమలేశ్ నాగర్కోటి, వరుణ్ చక్రవర్తి, కుల్దీప్ యాదవ్, శివమ్ మావి
రాజస్థాన్
జాస్ బట్లర్, స్మిత్(కెప్టెన్), సంజూ శాంసన్, రాబిన్ ఉతప్ప, రాహుల్ తెవాతియా, రియాన్ పరాగ్, టామ్ కరన్, జోఫ్రా ఆర్చర్, శ్రేయస్ గోపాల్, ఉనద్కత్, అంకిత్ రాజ్పుత్
