ఐపీఎల్లో బ్యాట్స్మన్గా రోహిత్ శర్మ ఏ మాత్రం ప్రభావం చూపించలేకపోతున్నాడు. దిల్లీతో గురువారం జరిగిన క్వాలిఫయర్లోనూ డకౌట్ అయ్యాడు. దీంతో హిట్మ్యాన్ తన ఫిట్నెస్ నిరూపించుకోవాలని అంటున్న వారికి ఇది ఊతమిచ్చినట్లైంది. ఆస్ట్రేలియా పర్యటనకు హిట్మ్యాన్ను ఎంపిక చేయకపోవడానికి గాయం కాదని, ఫామ్లేమినే ప్రధాన కారణమని క్రికెట్ విశ్లేషకులు అభిప్రాయపడుతున్నారు. అసలు రోహిత్ శర్మకు ఏమైంది?
రోహిత్ ప్రదర్శన
ప్రస్తుత ఐపీఎల్లో రోహిత్శర్మ వరుసగా చేసిన స్కోరు: 0, 4, 9, 35, 5, 35, 6, 70, 8, 80, 12.. మొత్తం కలిపి ఇప్పటివరకు 264 పరుగులు(11 మ్యాచ్ల్లో) చేశాడు. టోర్నీ చరిత్రలో మొత్తం 199 మ్యాచ్లు ఆడిన రోహిత్.. 130.58 స్ట్రైక్రేట్తో 5,162 పరుగులు చేశాడు. అందులో 38 అర్ధశతకాలతో పాటు ఓ సెంచరీ ఉంది. ఈ సీజన్లో మాత్రం అనుకున్నంతగా ఆడలేకపోతున్నాడు.
ఫిట్గా లేడు!
రోహిత్శర్మ ఫిట్గా లేడని, అందుకే ఆసీస్ పర్యటనకు ఎంపిక చేయలేదని బీసీసీఐ అధ్యక్షుడు గంగూలీ ఇటీవలే మీడియాతో చెప్పాడు. ప్రధానకోచ్ రవిశాస్త్రి కూడా ఇదే విషయాన్ని ప్రస్తావించాడు. కానీ, రోహిత్ ఐపీఎల్లో ఆడుతుండటం పలు అనుమానాలకు తావిస్తోంది.
మాజీల ఒత్తిడి
ఐపీఎల్ మొత్తంలో ఎక్కువ పరుగులు చేసిన బ్యాట్స్మెన్ జాబితాలో విరాట్ కోహ్లీ అగ్రస్థానంలో.. రోహిత్ శర్మ రెండో స్థానంలో ఉన్నారు. ఈ టోర్నీలో కెప్టెన్గా రోహిత్(ముంబయి) నాలుగుసార్లు ట్రోఫీ అందుకోగా.. కోహ్లీ(బెంగళూరు) మాత్రం ఒక్కసారి కూడా విజేతగా నిలవలేకపోయాడు. ఈ నేపథ్యంలో హిట్మ్యాన్ను భారత టీ20 జట్టుకు కెప్టెన్గా నియమించాలని మాజీలు అగార్కర్, అతుల్ వాసన్ సూచించారు. ప్రస్తుతం టీమ్ఇండియా టెస్టు, వన్డే, టీ20 జట్లకు కోహ్లీ కెప్టెన్గా ఉన్నాడు. వైస్ కెప్టెన్లుగా రహానె(టెస్టులకు), రోహిత్(వన్డే, టీ20లకు) ఉన్నారు.
