'మలింగ మాయ చేశాడు.. అతడో ఛాంపియన్​'

చివరి ఓవర్లో మలింగ అద్భుతం చేశాడని, అతడో ఛాంపియన్​ అని ముంబయి ఇండియన్స్​ సారథి రోహిత్ శర్మ ఆనందాన్ని వ్యక్తం చేశాడు. ఈ విజయంతో ఎక్కువ ఐపీఎల్ ఫైనల్​ మ్యాచ్​లు గెలిచిన జట్లకు ప్రాతినిథ్యం వహించిన ఆటగాడిగా రికార్డు సృష్టించాడు.

ఈ సీజన్​లో తాము జట్టుగా బాగా ఆడామని ముంబయి ఇండియన్స్​ కెప్టెన్ రోహిత్ శర్మ తెలిపాడు. ప్రతీ బౌలర్ అద్భుతంగా రాణించాడని, చివర్లో మలింగ చక్కటి ప్రదర్శన చేశాడని రోహిత్ ఆనందం వ్యక్తం చేశాడు.

"చివరి ఓవర్​ నేను హార్ధిక్ పాండ్యకు ఇద్దామనుకున్నా. కానీ ఎవరైన అనుభవజ్ఞులకు ఇస్తే బాగుంటుందని నిర్ణయాన్ని మార్చుకున్నా. ఈ పరిస్థితుల్లో మలింగానే సరైన బౌలర్​ అనుకొని అతడికి బంతినిచ్చా. అనుకున్నట్టుగానే మలింగ అద్భుతం చేశాడు. అతడో ఛాంపియన్"​ - రోహిత్ శర్మ, ముంబయి కెప్టెన్

ఈ విజయంతో రోహిత్ మరో రికార్డును తన ఖాతాలో వేసుకున్నాడు. ఎక్కువ ఐపీఎల్​ ఫైనల్​ మ్యాచ్​ల్లో గెలిచిన జట్లకు ఆడిన ఆటగాడిగా ఘనత సాధించాడు. రోహిత్ 5 సార్లు ఐపీఎల్​ విజేతగా నిలిచిన జట్లలో సభ్యుడిగా ఉన్నాడు. 4 సార్లు ముంబయి తరపున, ఓ సారి డెక్కన్ ఛార్జర్స్​ తరపున ప్రాతినిథ్యం వహించాడు.

చెన్నై సూపర్​కింగ్స్​తో జరిగిన ఫైనల్​లో ముంబయి ఇండియన్స్​ ఒక్క పరుగు తేడాతో గెలిచింది. బుమ్రా రెండు వికెట్లతో ఆకట్టుకోగా.. మలింగ చివర్లో అద్భుత ప్రదర్శనతో మ్యాచ్ గెలిపించాడు.