ఐపీఎల్- 2019లో వరుసగా మూడు మ్యాచ్ల్లో నెగ్గి నాలుగో విజయంపై కన్నేసింది ముంబయి ఇండియన్స్. మరోపక్క చివరి వరకు వచ్చి మ్యాచ్ చేజార్జుకుంటున్న రాజస్థాన్... గెలుపు కోసం ఆరాటపడుతోంది. ఈ రెండు జట్ల మధ్య ముంబయిగా వేదికగా ఈ రోజు సాయంత్రం 4 గంటలకు మ్యాచ్ జరగనుంది.
గత మ్యాచ్లో గాయంతో రోహిత్ దూరమైనప్పటికీ ముంబయి అద్భుతమైన విజయం సొంతం చేసుకుంది. కెప్టెన్ ఇన్నింగ్స్తో పొలార్డ్ రెచ్చిపోయి జట్టును గెలిపించాడు. ఇదే ఆత్మవిశ్వాసంతో మరోసారి సత్తా చాటాలనుకుంటోంది ముంబయి జట్టు. పాయింట్ల పట్టికలో కింద నుంచి రెండో స్థానంలో ఉన్న రాజస్థాన్ విజయం కోసం తహతహలాడుతోంది. చెన్నైతో జరిగిన మ్యాచ్లో చివరి వరకు వచ్చి అనవసర తప్పిదాలతో మ్యాచ్ చేజార్చుకుంది.
ముంబయి ఇండియన్స్...
పొలార్డ్, అల్జారీ జోసెఫ్ ఇద్దరూ ముంబయి జట్టుకు ప్రధాన బలంగా మారారు. ముంబయి నెగ్గిన గత రెండు మ్యాచ్ల్లోనూ పొలార్డ్ ఆకట్టుకునే ప్రదర్శన చేశాడు. సన్రైజర్స్తో మ్యాచ్లో 12 పరుగులిచ్చి ఆరు వికెట్లతో ఐపీఎల్లో ఎవరూ అందుకోలేని ఘనత సాధించాడు అల్జారీ జోసెఫ్. వీరిద్దరూ జట్టులో కీలకం కానున్నారు. పొలార్డ్తో పాటు డికాక్, సూర్యకుమార్ యాదవ్, పాండ్య సోదరులతో బ్యాటింగ్ లైనప్ బలంగా ఉంది. ఈ మ్యాచ్లో రోహిత్ కూడా ఆడే అవకాశముంది. బుమ్రా, అల్జారీ జోసెఫ్, బెహ్రెండార్ఫ్ లాంటి డెత్ ఓవర్ స్పెషలిస్టులో జట్టులో ఉన్నారు. దీంతో బ్యాటింగ్, బౌలింగ్లో సమతూకంగా ఉంది ముంబయి జట్టు. సొంతగడ్డపై జరగనుండటం వల్ల గెలుపుపై ధీమాగా ఉంది ముంబయి. ఈ మ్యాచ్లో గెలిస్తే 10 పాయింట్లతో రెండో స్థానానికి చేరుకుంటుంది రోహిత్ సేన.
రాజస్థాన్ రాయల్స్...
సమిష్టిగా ఆడటంలో విఫలమవుతోంది రాజస్థాన్ రాయల్స్ జట్టు. చెన్నైతో జరిగిన మ్యాచ్ని సులభంగా గెలిచే అవకాశమున్నా చేజార్చుకుంది. బ్యాట్స్మెన్ వైఫల్యాలు జట్టును వెంటాడుతున్నాయి. రహానే, సంజూ సాంసన్, స్టీవ్ స్మిత్, బట్లర్ లాంటి హేమాహేమీలున్నా స్థాయికి తగ్గట్టుగా ఆకట్టుకులేకపోతున్నారు. బౌలింగ్లో ఉనద్కత్, ధవల్ కులకర్ణి, శ్రేయాస్ గోపాల్ లాంటి దేశవాళీ ఆటగాళ్లు మంచి ప్రదర్శన చేస్తున్నారు. రాజస్థాన్ స్టార్ బౌలర్ జోఫ్రా ఆర్చర్ ఇప్పటీ వరకు జరిగిన మ్యాచ్ల్లో రాణించాడు.
ఇప్పటికే ఐదు మ్యాచ్ల్లో పరాజయం చెందింది రహానే సేన. ఇందులో నెగ్గి ప్లే ఆఫ్ ఆశలు సజీవంగా ఉంచుకోవాలని ఆశిస్తోంది రాజస్థాన్.
జట్ల అంచనా:
ముంబయి ఇండియన్స్
రోహిత్ శర్మ, పొలార్డ్, బెహ్రాండార్ఫ్, సూర్యకుమార్ యాదవ్, డికాక్, బుమ్రా, హార్దిక్ పాండ్యా, ఇషాన్ కిషన్, అల్జారీ జోసెఫ్, కృనాల్ పాండ్యా, రాహుల్ చాహర్
రాజస్థాన్ రాయల్స్:
అజింక్యా రహానే(కెప్టెన్), స్టీవ్ స్మిత్, స్టోక్స్, జోఫ్రా ఆర్చర్, బట్లర్, సంజూ శాంసన్, శ్రేయాస్ గోపాల్, ఉనద్కత్, ధవల్ కులకర్ణి, క్రిష్ణప్ప గౌతమ్, రాహుల్ త్రిపాఠి.
