ఆదివారం జరిగిన భారత్- పాకిస్థాన్ టీ20 మ్యాచ్ అనంతరం మీడియా సమావేశం జరగ్గా.. ఓ పాకిస్థానీ విలేకరి అడిగిన ప్రశ్న సారధి విరాట్ కోహ్లీకి షాక్ ఇచ్చింది. 'జట్టు కూర్పుపై సందేహాలు వ్యక్తమవుతున్నాయి. ఇషాన్ కిషన్ బాగా ఆడుతున్నాడు. వార్మప్ మ్యాచ్లలో రాణించాడు. అతడిని జట్టులోకి తీసుకుని ఉంటే.. రోహిత్ కన్నా బాగా ఆడేవాడు అని మీరు అనుకుంటున్నారా?' అని అడిగాడు. రోహిత్ శర్మను పక్కనపెట్టడం అన్న మాట వినేసరికి కోహ్లీ ముఖకవళికలు ఒక్కసారిగా మారిపోయాయి. 'రోహిత్ శర్మను జట్టులో నుంచి తీసేయడమా.. ఇదేం ప్రశ్న?' అన్నట్టు ఆ విలేకరివైపు కోహ్లీ చూశాడు. ఆ తర్వాత తనదైన శైలిలో సమాధానమిచ్చాడు.
"ఈ ప్రశ్న అడగడానికి చాలా ధైర్యం ఉండాలి. మీరేం అనుకుంటున్నారు సర్? నాకు బలంగా కనిపించిన జట్టునే మైదానంలోకి దింపాను. మీరేం అనుకుంటున్నారు? అంతర్జాతీయ టీ20 మ్యాచ్ల నుంచి రోహిత్ శర్మను మీరు తొలగిస్తారా? రోహిత్ను తప్పిస్తారా? భారత్-పాకిస్థాన్ ఆడిన చివరి మ్యాచ్(2019 ప్రపంచకప్)లో రోహిత్ ఏం చేశాడో మీకు గుర్తుంది కదా! వివాదాలు కావాలి అనుకుంటే ముందే చెప్పండి.. అందుకు తగ్గట్టుగానే జవాబు చెబుతాను" అంటూ విరాట్ నవ్వుకున్నాడు.
2019 ప్రపంచకప్లో పాకిస్థాన్పై రోహిత్ చెలరేగి ఆడాడు. బౌలర్లపై విరుచుకుపడుతూ 140 పరుగులు చేసి జట్టు విజయంలో కీలక పాత్ర పోషించాడు.
ఇప్పుడు ఆదివారం జరిగిన మ్యాచ్లో పాకిస్థాన్ చేతిలో టీమ్ఇండియా ఘోరంగా ఓడిపోయింది. టాస్ ఓడి తొలుత బ్యాటింగ్కు దిగిన భారత్.. 20ఓవర్లకు 151 పరుగులు మాత్రమే చేయగలిగింది. పూర్తిగా స్వేచ్ఛగా ఆడారు పాకిస్థాన్ ఆటగాళ్లు. ఆ తర్వాత లక్ష్యఛేదలో బ్యాటర్లు దుమ్ముదులిపారు. మొత్తం మీద భారత్పై 10 వికెట్ల తేడాతో గెలిచారు. ప్రపంచకప్లో భారత్పై పాక్కు ఇదే తొలి విజయం కావడం విశేషం.
ఇవీ చూడండి:-
