భారత్-ఇంగ్లాండ్ జట్ల మధ్య మరికాసేపట్లో ప్రారంభంకావాల్సిన ఐదో టెస్టు చివరి నిమిషంలో రద్దయ్యింది. ఈ మేరకు ఇంగ్లాండ్ క్రికెట్ బోర్డు(ఈసీబీ) ఒక ప్రకటనలో వెల్లడించింది. భారత జట్టు శిక్షణ బృందంలోని సభ్యులకు కరోనా వైరస్ సోకడం వల్ల రద్దు నిర్ణయం తీసుకున్నట్లు తెలుస్తోంది. ప్రస్తుతం ఈ సిరీస్లో 2-1 తేడాతో భారత్ ఆధిక్యంలో ఉంది. మరో సమయంలో ఈ టెస్టును ఆడే వీలుందని బీసీసీఐ వర్గాలు వెల్లడించాయి.
దాదా ముందే చెప్పారు
నాలుగో టెస్టు సమయంలో రవిశాస్త్రితో పాటు మరో ముగ్గురు సహాయ సిబ్బందికి కరోనా పాజిటివ్గా తేలింది. తాజాగా ఐదో టెస్టుకు ముందు మరొకరికి వైరస్ సోకింది. దీంతో ప్రాక్టీస్ సెషన్ కూడా రద్దయింది. అప్పుడే ఐదో టెస్టు జరుగుతుందో లేదో అన్న అనుమానాలు వ్యక్తమయ్యాయి. బీసీసీఐ అధ్యక్షుడు సౌరభ్ గంగూలీ కూడా మ్యాచ్పై అనుమానాలు వ్యక్తం చేశారు. మ్యాచ్ జరిగే అవకాశం చాలా తక్కువ అంటూ వెల్లడించారు.
ఐపీఎల్ కారణమా?
మరో కొద్ది రోజుల్లో ఐపీఎల్ 13వ సీజన్ రెండో దశ ప్రారంభం కాబోతుంది. దుబాయ్ వేదికగా జరగబోయే ఈ లీగ్ కోసం ఇప్పటికే ఫ్రాంచైజీలు అక్కడికి చేరుకుని ప్రాక్టీస్ చేస్తున్నాయి. ఇంగ్లాండ్తో టెస్టు సిరీస్ ముగిశాక సీనియర్ ఆటగాళ్లు కూడా వారితో కలవాల్సి ఉంది. అయితే ఒకవేళ ఐదో టెస్టు సమయంలో ఏ ఆటగాడికైనా కరోనా పాజిటివ్గా తేలితే కనీసం 10 రోజులు క్వారంటైన్లో ఉండాల్సిన పరిస్థితి. ఇదే జరిగితే ఐపీఎల్ నిర్వహణపై ప్రభావం పడుతుంది. అందుకే ముందుగానే ఈ పరిస్థితిని గమనించిన బీసీసీఐ.. మ్యాచ్ను రద్దు చేసుకోవడమే మంచిదని భావించినట్లు సమాచారం.
