భారత్ వేదికగా గతంలో జరిగిన రెండు టెస్టు మ్యాచ్ల్లో ఫిక్సింగ్ జరిగినట్లు అల్జజీరా న్యూస్ ఛానల్ రూపొందించిన డాక్యుమెంటరీని అంతర్జాతీయ క్రికెట్ మండలి(ఐసీసీ) తోసిపుచ్చింది. ఆ డాక్యుమెంటరీ మొత్తం ఊహాజనితంగా ఉందని తెలిపింది. అదంతా ఆగమ్యగోచరమమని పేర్కొంది.
2016లో చెన్నైలో జరిగిన ఇంగ్లాండ్-భారత్ టెస్టుతో పాటు 2017లో రాంచీ వేదికగా జరిగిన ఆస్ట్రేలియా-భారత్ మ్యాచ్లోనూ ఫిక్సింగ్ జరిగినట్లు ఆ డాక్యుమెంటరీలో పేర్కొంది అల్ జజీరా. దీనిని 'క్రికెట్స్ మ్యాచ్ ఫిక్సర్స్' పేరుతో విడుదల చేసింది.
ఈ డాక్యుమెంటరీ చిత్రీకరణలో ఐదుగురు వ్యక్తులు పాల్గొన్నట్లు ఐసీసీ తెలిపింది. కానీ వారిపై అభియోగాలు మోపడానికి ఎలాంటి ఆధారాలు లేవని పేర్కొంది. ఇందులో అనీల్ మున్నావార్ అనే బుకీ ప్రస్తావన ఉంది. అతడు చాలా మ్యాచ్ల్లో ఫిక్సింగ్కు ప్రయత్నించినట్లు ఉంది. ఇందులో రెండు మ్యాచ్లు భారత్ వేదికగా విరాట్ కోహ్లీ నాయకత్వంలో జరిగాయని డాక్యుమెంటరీలో తెలిపాడు.
ఇదీ చదవండి: 'విజయ్.. నీ బ్యాట్ కంటే నోరే ఎక్కువ మాట్లాడుతుంది'
అయితే ఇందులో పాల్గొన్న వారి గురించి ఐసీసీ ఎటువంటి విషయాలు వెల్లడించలేదు. అయినప్పటికీ.. పాకిస్థాన్ క్రికెటర్ హసన్ రాజా, శ్రీలంక ఆటగాళ్లు తరంగ ఇండికా, తరిందు మెండిస్, ముంబయి ఫస్ట్ క్లాస్ క్రికెటర్ రాబిన్ మోరిస్ ఇందులో ఉన్నట్లు విశ్వసనీయ వర్గాలు తెలిపాయి.
ఐసీసీ దర్యాప్తు..
అల్ జజీరా చేసిన ఈ ఆరోపణలపై ఐసీసీ సమగ్ర దర్యాప్తు చేపట్టింది. ఆ డాక్యుమెంటరీ తప్పని స్పష్టం చేసింది. ఈ రెండు టెస్టు మ్యాచ్ల్లో ఎలాంటి ఫిక్సింగ్ జరగలేదని తేల్చిచెప్పింది. డాక్యుమెంటరీ రూపకల్పనలో పాల్గొన్న వారెవరు.. ఆ ప్రొగ్రామ్ను ఎక్కడి నుంచి తెచ్చారనే విషయాలపై ప్రధానంగా దృష్టి సారించింది ఐసీసీ.
ఇదీ చదవండి: లొంగిపోవడానికి సిద్ధపడ్డ రెజ్లర్ సుశీల్ కుమార్!
