IND VS WI 2023 : వెస్టిండీస్‌తో జరిగిన రెండు టెస్టుల సిరీస్ను క్లీన్‌స్వీప్‌ చేయాలనుకున్న టీమ్ఇండియా ఆశ నెరవేరలేదు. వరుణుడు అడ్డింకిగా మారి రెండో టెస్ట్ విజయాన్ని ఎత్తుకెళ్లాడు. రెండో టెస్టులో ఆఖరి రోజు పూర్తిగా వర్షం పడటం వల్ల మ్యాచ్ డ్రాగా ముగిసింది. దీంతో సిరీస్ 1-0తో టీమ్ఇండియా సొంతమైంది.
వాస్తవానికి నాలుగో రోజే వరుణుడు అడ్డుగా నిలిచాడు. దీంతో ఆ రోజు దాదాపు ఒక సెషన్‌ ఆటకు నష్టం వాటిల్లింది. కనీసం చివరి రోజైనా వరుణుడు కరుణించాలని అభిమానులు కోరుకున్నారు. కానీ అదీ జరగలేదు. వర్షం పలుసార్లు పడుతూ ఆగుతూ ఉండటం వల్ల ప్లేయర్స్ మైదానంలోకి రాలేకపోయారు. ఆఖరికి అంపైర్లు ఆటను రద్దు చేస్తున్నట్లు ప్రకటించాల్సి వచ్చింది. ఫలితంగా మ్యాచ్ డ్రాగా ముగిసింది.
నాలుగో రోజు ఆదివారం 365 పరుగుల లక్ష్యంతో బరిలోకి దిగింది వెస్టిండీస్.. చివరికి 76/2తో నిలిచింది. ఇక ఆ జట్టు విజయానికి ఇంకా 289 పరుగులు అవసరమయ్యాయి. కెప్టెన్‌ క్రెయిగ్‌ బ్రాత్‌వైట్‌ (28), అరంగేట్ర బ్యాటర్‌ కిర్క్‌ మెకంజీ (0)లను అశ్విన్‌ (2/33) వరుస ఓవర్లలో పెవిలియన్ చేర్చాడు. త్యాగ్‌నారాయణ్‌ (24), జెర్మైన్‌ బ్లాక్‌వుడ్‌ (20 *) నాలుగో రోజు తమ జట్టుకు అండగా నిలిచారు. అయితే అప్పటికే ఈ సిరీస్‌లో భారత బౌలర్ల జోరు చూస్తుంటే.. సోమవారం ఐదో రోజు ఆటలో కనీసం రెండు సెషన్లు పడినా విండీస్‌ను దెబ్బతీసేవారు.
ind vs wi test series result : ఇక ఈ మ్యాచ్‌లో టాస్‌ ఓడి తొలి ఇన్నింగ్స్‌లో మొదట బ్యాటింగ్‌ చేసిన టీమ్ఇండియా.. 438 పరుగులకు ఆలౌటైంది. అనంతరం బరిలోకి దిగిన విండీస్‌ 255 పరుగులకే కుప్పకూలింది. భారత్‌కు 183 పరుగుల ఆధిక్యం లభించింది. రోహిత్ శర్మ (57), ఇషాన్‌ కిషన్‌ (52 *) దూకుడుతో 24 ఓవర్లలోనే 2 వికెట్లకు 181 పరుగులు చేసి రెండో ఇన్నింగ్స్‌ను డిక్లేర్‌ చేసింది టీమ్ఇండియా. యశస్వి జైస్వాల్‌ (38), శుభ్‌మన్‌ (29 నాటౌట్‌) కూడా బాగానే రాణించారు. ఫలితంగా.. ఆతిథ్య జట్టుకు 365 పరుగుల లక్ష్యాన్ని నిర్దేశించింది భారత్. ఈ క్రమంలోనే విండీస్‌ నాలుగో రోజు ఆట ముగిసే సమయానికి.... 2 వికెట్ల నష్టానికి 76 పరుగులు చేసింది. చివరి రోజు భారీ వర్షం కురవడంతో మ్యాచ్ డ్రాగా ముగిసింది. ఇకపోతే ఈ సిరీస్ మొదటి మ్యాచ్‌లో.. భారత్ ఇన్నింగ్స్‌ విజయం సాధించిన సంగతి తెలిసిందే. కాగా, ఇరు జట్ల మధ్య మూడు వన్డేల సిరీస్‌లో భాగంగా మొదటి మ్యాచ్ ఈ నెల గురువారం జరగనుంది.
విరాట్ స్థానంలో నేనుంటే క్రికెట్ ఆడేవాడినే కాను : ఇషాంత్ శర్మ
టెస్టుల్లో 'డబుల్‌' డిజిట్స్‌.. ఫస్ట్ బ్యాటర్‌గా రోహిత్ రికార్డ్
