IPL longer window: ఎనిమిది జట్లు.. 74 మ్యాచ్లతో రసవత్తరంగా సాగింది ఐపీఎల్ 2022. అయితే వచ్చే సీజన్ మరింత ఆసక్తికరంగా మార్చేందుకు మ్యాచ్ల సంఖ్యను పెంచేలా బోర్డు సన్నాహాలు చేస్తున్నట్లు తెలిసింది. ఇందుకోసం గంగూలీ, జైషా ఇంగ్లాండ్ పర్యటనకు వెళ్లనున్నారట. అక్కడ ఐపీఎల్ విండో సమయం పెంపు, మహిళల ఐపీఎల్ విండో గురించి ఈసీబీ మేనేజింగ్ డైరెక్టర్ రాబ్ కీతో చర్చించనున్నట్లు ఓ బోర్డు అధికారి తెలిపారు.
"ఇప్పటికే సమావేశ ఏర్పాట్లు పూర్తయ్యాయి. బీసీసీఐ అధ్యక్షుడు గంగూలీ, కార్యదర్శి షా ఇంగ్లాండ్ వెళ్లనున్నారు. అక్కడ జరిగే రిషెడ్యూల్ ఐదో టెస్టును వీక్షించనున్నారు. టెస్టు మ్యాచుకు ఒక రోజు ముందు జూన్ 30న ఇంగ్లాండ్కు వెళ్లనున్నారు. ఈసీబీ మేనేజింగ్ డైరెక్టర్ రాబ్ కీతో ఐపీఎల్ విండో పెంచడం సహా మహిళల ఐపీఎల్ గురించి మాట్లాడనున్నారు. దీంతో పాటే మరిన్ని అంశాల గురించి చర్చించనున్నారు. బీసీసీఐకి ఈసీబీ మద్దతు ఇస్తోంది." అని సదరు అధికారి వెల్లడించారు.
గతేడాది ఐదు టెస్టుల సిరీస్ కోసం టీమ్ఇండియా ఇంగ్లాండ్లో పర్యటించింది. నాలుగు టెస్టులు ముగిసేసరికి 2-1తేడాతో ఆధిక్యంలో నిలిచింది. కరోనా వల్ల ఆఖరి టెస్టును వాయిదా వేశారు. జులై 1-5 వరకు ఈ మ్యాచ్(రీషెడ్యూల్) జరగనుంది. దాదాపు 15ఏళ్ల తర్వాత ఇంగ్లాండ్ను సొంత గడ్డపై ఓడించే అవకాశం టీమ్ఇండియా ముంగిట నిలిచింది.
ఇదీ చూడండి: 'భారత్‌, పాక్‌ ప్లేయర్స్ తలపడాలనుకుంటున్నారు'
