ఆస్ట్రేలియాతో నాలుగో టెస్టులో మహమ్మద్ సిరాజ్ అదరగొట్టాడు. తొలి ఇన్నింగ్స్‌లో ఒక వికెట్టే తీసినా రెండో ఇన్నింగ్స్‌లో ఐదు వికెట్లు పడగొట్టి కెరీర్‌లో అత్యుత్తమ గణాంకాలు నమోదు చేశాడు. 19.5 ఓవర్లు బౌలింగ్ చేసిన అతడు 73 పరుగులు ఇచ్చాడు. చక్కని లెంగ్తుల్లో, క్రమశిక్షణతో బంతులు విసిరాడు. అనవసర పొరపాట్లకు తావివ్వలేదు.
కీలకమైన లబుషేన్‌, స్టీవ్‌స్మిత్‌, కామెరాన్‌ గ్రీన్‌లతో పాటు టెయిలెండర్లు మిచెల్‌ స్టార్క్‌, హేజిల్‌వుడ్‌ను పెవిలియన్‌కు పంపించాడు. ఈ సిరీసులోనే అరంగేట్రం చేసినప్పటికీ టీమ్ఇండియా బౌలింగ్‌కు నాయకత్వం వహించడం విశేషం. షమి, బుమ్రా, ఉమేశ్‌ స్థానాల్లో జట్టులోకి వచ్చిన శార్దూల్‌ ఠాకూర్‌, నటరాజన్‌కు మెలకువలు చెబుతూ ప్రోత్సహించాడు.
ప్రత్యర్థి జట్టుపై ఆధిపత్యం చెలాయించిన సిరాజ్‌పై ప్రస్తుతం అభినందనల వెల్లువ కొనసాగుతోంది. తొలి టెస్టు సిరీసులోనే సిరాజ్ బౌలింగ్ దాడికి నాయకత్వం వహించాడు. ముందుండి నడిపించాడు. ఈ సిరీసులో కొత్తవాళ్ల ప్రదర్శన ఎప్పటికీ గుర్తుండిపోతుంది. ఐదు వికెట్లు తీసిన సిరాజ్ ఇక ఎంత మాత్రం కుర్రాడు కాదు.
-వీరేంద్ర సెహ్వాగ్, ఇండియా మాజీ ఓపెనర్.
"ఆసీస్‌ సిరీస్‌లో మహమ్మద్ సిరాజ్ ఆకట్టుకున్నాడు. మనసు పెట్టి బంతులు విసురుతున్నాడు. తొలిసారి ఐదు వికెట్ల ఘనత అందుకున్నందుకు అభినందనలు. నీ భవిష్యత్తు మరెంతో బాగుండాలి" అని మహిళల వన్డే జట్టు సారథి మిథాలీరాజ్‌ అభినందించింది.
ఐదు వికెట్ల ఘనత అందుకున్నందుకు తనకెంతో సంతోషంగా ఉందని సిరాజ్ అన్నాడు. "టీమ్ఇండియా తరఫున అరంగేట్రం చేసి, ఐదు వికెట్లు తీయడం గొప్పగా అనిపిస్తోంది. మా నాన్న ఇది చూస్తున్నారనే అనుకుంటున్నా. ఆయన కన్నుమూశాక కఠినంగా గడిచింది. మా అమ్మతో మాట్లాడిన తర్వాత ధైర్యం వచ్చింది. టెస్టుల్లో భారత్‌కు ప్రాతినిధ్యం వహించాలన్న నా తండ్రి కల నెరవేర్చడంపైనే దృష్టి సారించా" అని సిరాజ్ తెలిపాడు.
ఇదీ చదవండి: పంత్ 'స్పైడర్ మ్యాన్' పాట వైరల్
