ఒకసారి కప్పు గెలిచి గత సీజన్లో రన్నరప్గా నిలిచిన జట్టు ఓ వైపు... రెండు సార్లు ఐపీఎల్ విజేతగా నిలిచిన జట్టు మరోవైపు. సన్రైజర్స్ హైదరాబాద్, కోల్కతా నైట్ రైడర్స్ జట్ల మధ్య ఐపీఎల్ 2019 సీజన్ రెండో మ్యాచ్ నేడు కోల్కతా వేదికగా జరగనుంది. ఏడాది పాటు క్రికెట్కు దూరంగా ఉన్న వార్నర్ పునరాగమనం చేయనున్నాడు. ఐపీఎల్లో సత్తా చాటి ప్రపంచకప్లో చోటు కోసం ప్రయత్నిస్తున్నాడు దినేశ్ కార్తీక్.
ఈ రెండు జట్లు ముఖాముఖి 15 సార్లు తలపడగా కోల్కతానే ఎక్కువ మ్యాచ్ల్లో విజయం సాధించింది. నైట్రైడర్స్ 9 సార్లు గెలవగా, సన్రైజర్స్ 6 సార్లు నెగ్గింది. గతేడాది కోల్కతాని ఓడించి ఫైనల్ చేరింది హైదరాబాద్. ఈ ఏడాది కూడా దినేశ్ కార్తీక్ సారథ్యంలోనే నైట్రైడర్స్ బరిలోకి దిగనుంది. హైదరాబాద్ జట్టుకు విలియమ్సన్ కెప్టెన్గా వ్యవహరిస్తున్నాడు.
కోల్కతా నైట్రైడర్స్...
బలాలు: దినేశ్ కార్తీక్ గత సీజన్లో 498 పరుగులు చేసి జట్టును మూడో స్థానంలో నిలిపాడు. ఓపెనర్లు క్రిస్ లిన్, సునీల్ నరైన్ జట్టుకు అదనపు బలం. ఇద్దరూ భారీ షాట్లు ఆడగల సమర్థులు. సునీల్ నరైన్, కుల్దీప్ యాదవ్ లాంటి అంతర్జాతీయ స్పిన్నర్లు అందుబాటులో ఉన్నారు. మిడిల్ ఆర్డర్లో రసెల్, బ్రాత్వైట్ లాంటి విధ్వంసకర ఆటగాళ్లు జట్టులో ఉన్నారు.
బలహీనతలు: పేస్ విభాగం కాస్త బలహీనం. విండీస్ ఆల్రౌండర్ బ్రాత్వైట్, రసెల్ ఉన్నప్పటికీ గత సీజన్లో అంతగా ప్రభావం చూపలేదు. ఈసారి వీరు ఎంత వరకు జట్టు గెలుపునకు కృషి చేస్తారన్నది తెలియాలి.
సన్రైజర్స్ హైదరాబాద్..
బలాలు: డేవిడ్ వార్నర్ పునరాగమనం జట్టుకు కలిసొచ్చే అంశం. మార్టిన్ గప్తిల్, కేన్ విలియమ్సన్లతో టాప్ ఆర్డర్ బలంగా ఉంది. భువనేశ్వర్, రషీద్ ఖాన్, సందీప్ శర్మ, కౌల్, ఖలీల్ అహ్మద్లతో బౌలింగ్ విభాగం పటిష్టంగా ఉంది. గత రెండు సీజన్లలో ఆరెంజ్ క్యాప్ సన్ రైజర్స్ ఆటగాళ్లకే దక్కడం (వార్నర్, విలియమ్స్న్) విశేషం.
బలహీనతలు: మిడిల్ ఆర్డర్ బలహీనంగా ఉంది. యూసఫ్ పఠాన్, మనీశ్ పాండే, సాహాలు ఫామ్ అందిపుచ్చుకోవాల్సిన అవసరం ఉంది.
ఓపెనర్ శిఖర్ ధావన్ దిల్లీ వెళ్లగా ఆ స్థానంలో విజయ్ శంకర్, షాబాజ్ నదీమ్, అభిషేక్ శర్మలను తీసుకుంది సన్రైజర్స్. వీరు ఎలా ఆకట్టుకుంటారో చూడాలి.
జట్లు..
కోల్కతా నైట్ రైడర్స్: దినేశ్ కార్తీక్(కెప్టెన్), రాబిన్ ఊతప్ప, క్రిస్ లిన్, శుభ్మన్ గిల్, ఆండ్రీ రసెల్, కార్లోస్ బ్రాత్వైట్, సునీల్ నరైన్, పియూష్ చావ్లా, కుల్దీప్ యాదవ్, నిఖిల్ యాదవ్, జోయ్ డెన్లై, శ్రీకాంత్ ముండే, నితీశ్ రానా, సందీప్ వారియర్, ప్రసిధ్ కృష్ణ, లోకీ ఫెర్గ్యూసన్, హ్యారి గుర్నే, కేసీ కరియప్ప, యర్రా పృథ్వీరాజ్.
హైదరాబాద్ సన్ రైజర్స్: కేన్ విలియమ్సన్(కెప్టెన్), మనీశ్ పాండే, మార్టిన్ గప్తిల్, రికీ భూయ్, డేవిడ్ వార్నర్, దీపక్ హూడ, మహమ్మద్ నబీ, యూసఫ్ పఠాన్, షకీబ్ అల్ హసన్, అభిషేక్ శర్మ, విజయ్ శంకర్, శ్రీ వాత్స గోస్వామి, బెయిర్స్టో, వృద్ధిమాన్ సాహా, సిద్ధార్థ్ కౌల్, ఖలీల్ అహ్మద్, భువనేశ్వర్ కుమార్, రషీద్ ఖాన్, బసీల్ థంపీ, బిల్లి, టీ. నటరాజన్, సందీప్ శర్మ, షాబాజ్ నదీమ్.
