నాన్న కల నెరవేర్చిన వేళ.. సిరాజ్​ అదరహో!

తండ్రి మరణం ఓవైపు.. ఆయన కన్న కల మరోవైపు. ఆ కుర్రాడికి భౌతికంగా నాన్న కనిపించనప్పటికీ.. ఆయనెప్పుడూ తనతోనే ఉంటాడని నమ్మాడు. అందుకే.. ఆ కలను నెరవేర్చడమే ప్రధానమని భావించాడు. ఆస్ట్రేలియాతో మెల్​బోర్న్​ వేదికగా జరగుతున్న రెండో టెస్టులో ఎరుపు బంతి చేతపట్టి తను అనుకున్నది సాధించాడు. ఆ కుర్రాడే హైదరాబాద్ వాసి, టీమ్​ఇండియా పేసర్​ మహ్మద్​ సిరాజ్​.

ఆస్ట్రేలియాతో రెండో టెస్టులో తన తండ్రి కల నెరవేర్చాడు హైదరాబాద్​ కుర్రాడు, టీమ్​ఇండియా పేసర్​ మహ్మద్ సిరాజ్​. తొలిసారిగా టెస్టుల్లో బరిలోకి దిగిన అతడు బంతితో ఔరా అనిపించాడు. తొలిటెస్టులో షమీ గాయపడగా.. రెండో మ్యాచ్​లో చోటు దక్కించుకున్న సిరాజ్​ మొదటిరోజు ప్రదర్శనతో కెప్టెన్ రహానె, కోచ్​ రవిశాస్త్రి పెట్టుకున్న నమ్మకాన్ని నిజం చేశాడు. లంచ్​ బ్రేక్​ అనంతరం బౌలింగ్​కు దిగిన సిరాజ్​.. ఆసీస్ కీలక ఆటగాళ్లు లబూషేన్ (48)​, గ్రీన్ ​(12)ను పెవిలియన్​కు చేర్చాడు.

అలా వెలుగులోకి..

హైదరాబాద్​లోని పేద కుటుంబంలో పుట్టిన సిరాజ్‌ భారత క్రికెటర్‌గా ఎదగడంలో తన తండ్రి మహ్మద్‌ గౌస్‌ (53) కీలకపాత్ర పోషించాడు. ఆటో డ్రైవర్‌గా కుటుంబాన్ని పోషిస్తూ సిరాజ్‌ను ప్రోత్సహించాడు. 2015 వరకు సిరాజ్..​ స్థానిక టోర్నీలకే పరిమితమై సత్తా చాటేవాడు. 2016-17 సీజన్లో రంజీ ట్రోఫీలో హైదరాబాద్‌ తరఫున అదరగొట్టి.. వెలుగులోకి వచ్చాడు. తొమ్మిది మ్యాచ్​ల్లోనే 41 వికెట్లు తీశాడు.

ఐపీఎల్​లో అదరగొట్టి..

రంజీల్లో సిరాజ్​ ప్రదర్శన మెచ్చి.. 2017 ఐపీఎల్‌కు అతడిని సన్‌రైజర్స్‌ హైదరాబాద్‌ ఏకంగా రూ.2.6 కోట్లు పెట్టి కొనుగోలు చేసింది. 2018 నుంచి అతడు రాయల్​ ఛాలెంజర్స్​ బెంగళూరు(ఆర్​సీబీ)కు ప్రాతినిధ్యం వహిస్తున్నాడు. ఐపీఎల్​ 2020లో ఆర్​సీబీ తరఫున 9 మ్యాచ్​లు ఆడిన అతడు.. 11 వికెట్లు తీశాడు. కోల్​కతాతో జరిగిన మ్యాచ్​లో సంచలన గణాంకాలు (4-2-8-3) నమోదు చేశాడు. బహుశా ఈ అద్భుత ప్రదర్శన కారణంగానే సెలెక్టర్లు అతణ్ని ఆస్ట్రేలియా పర్యటనకు ఎంపిక చేసి ఉంటారు.

దుఃఖాన్ని దిగమింగుకుని..

ఐపీఎల్‌లో మెరుపులతో సిరాజ్‌ అనూహ్యంగా ఆస్ట్రేలియా పర్యటనకు ఎంపికయ్యాడు. అయితే అక్కడికెళ్లాక అతడి తండ్రి మరణించాడన్న వార్త విన్నాడు. ఆ సమయంలో.. భారత్‌కు తిరిగి వచ్చేందుకు బీసీసీఐ ఏర్పాట్లు చేస్తామన్నా అతడు నిరాకరించాడు. భారత్‌కు వెళ్లి వస్తే క్వారంటైన్‌ ఇబ్బందులుంటాయన్న ఉద్దేశంతో అక్కడే ఆగిపోయాడు. తండ్రి కోరుకున్నట్టుగా దేశానికి సేవ చేయడమే ప్రధానమని నిశ్చయించుకున్నాడు.

తాను క్రికెట్లో ఎదిగి, అంతర్జాతీయ స్థాయికి చేరడానికి కారణమైన తండ్రి చనిపోతే అంత్యక్రియలకు హాజరు కాలేకపోవడంపై సిరాజ్‌ ఎంత బాధ పడి ఉంటాడో అర్థం చేసుకోవచ్చు. ఆ దుఃఖాన్ని ఆటతోనే దిగమింగాడు. ''ఏదో ఒక రోజు అందరూ వెళ్లిపోవాల్సిందే. ఈ రోజు మీ నాన్న. రేపు నేనూ.. నాన్న కోరుకున్నది సాధించు" అని తల్లి చెప్పిన మాటలు.. సిరాజ్​ను టెస్టులో స్థానం దిశగా నడిపించాయి.

ఇదీ చూడండి:మెల్​బోర్న్​లో మూడో టెస్టు.. మరింత మంది ప్రేక్షకులు!