ఐసీసీ ప్రపంచ టెస్టు ఛాంపియన్షిప్ అరుదైన ఘనత నమోదు చేసింది. ఫైనల్(WTC Final) సరికొత్త రికార్డు సృష్టించింది. గత నెలలో భారత్-కివీస్ మధ్య జరిగిన ఈ మ్యాచ్ను ప్రపంచవ్యాప్తంగా 17.7 కోట్ల మంది వీక్షించారని అంతర్జాతీయ క్రికెట్ మండలి బుధవారం వెల్లడించింది. రెండేళ్ల పాటు జరిగిన డబ్ల్యూటీసీలో(WTC) ఏ మ్యాచ్కు రానన్ని వ్యూస్ ఫైనల్కు వచ్చాయని చెప్పింది.
ప్రపంచ దేశాలలో భారత్ నుంచే ఎక్కువ మంది అభిమానులు ఈ మ్యాచ్ను చూశారని ఐసీసీ(ICC) తెలిపింది. వీరిలోనూ 94.6 శాతం మంది స్టార్ స్పోర్ట్స్, దూరదర్శన్ ఛానళ్ల ద్వారా ఫైనల్ను వీక్షించారని వెల్లడించింది. తెలుగు, హిందీ, తమిళం, కన్నడ వంటి ప్రాంతీయ భాషల్లోనూ స్టార్ స్పోర్ట్స్ ఛానెల్ మ్యాచ్ను ప్రత్యక్ష ప్రసారం చేసింది.
ఈ టెస్టు జూన్ 18-జులై 23 వరకు జరిగింది. వరుణుడు అడ్డంకిగా మారిన ఈ మ్యాచ్కు 23వ తేదీని రిజర్వ్ డేగా ప్రకటించారు. ఈ మ్యాచ్లో కివీస్ 8 వికెట్ల తేడాతో విజయం సాధించింది.
జనాభా పరంగా చిన్న దేశమైన న్యూజిలాండ్లోనూ డబ్ల్యూటీసీ ఫైనల్ మ్యాచ్కు మంచి స్పందన లభించింది. 2 లక్షల మంది అభిమానులు ఈ మ్యాచ్ను చూశారని ఐసీసీ తెలిపింది. ఆ దేశంలో స్కై స్పోర్ట్స్ ఛానల్ ఈ ఫైనల్ను ప్రత్యక్ష ప్రసారం చేసింది. యూకేలోనూ స్కై స్పోర్ట్స్కు రికార్డు స్థాయిలో వీక్షణలు వచ్చాయి. 2015 తర్వాత ఇంగ్లాండ్ జట్టు ఆడని ఓ మ్యాచ్ను అక్కడి అభిమానులు పెద్ద మొత్తంలో చూడడం ఇదే మొదటిసారి అని ఐసీసీ వెల్లడించింది.
ఐసీసీ కొత్తగా ప్రారంభించిన ఓటీటీ ప్లాట్ఫామ్ ఐసీసీ.టీవీ ద్వారా మరో 6.65 లక్షల ప్రత్యక్ష వీక్షణలు వచ్చాయి.ఐసీసీ ఫేస్బుక్ పేజీ ద్వారా 42.3 కోట్ల మంది మ్యాచ్ను చూశారు. ఇందులో రిజర్వ్ డే రోజున అత్యధిక వ్యూస్ వచ్చాయి. ఆ ఒక్క రోజే 6.57 కోట్ల మంది ఈ మ్యాచ్ను వీక్షించారు. ఐసీసీ మహిళల టీ20 ప్రపంచకప్ సందర్భంగా ఉన్న 6.43 కోట్ల వీక్షణల సంఖ్యను ఇది చెరిపేసింది.
మరో డిజిటల్ ప్లాట్ఫామ్ ఇన్స్టా వేదికగా ఈ మ్యాచ్ను 7 కోట్ల మంది చూశారు. ఐసీసీ వెబ్సైట్, మొబైల్ యాప్, ట్విట్టర్, యూ ట్యూబ్లో ఐసీసీ ఛానల్ ద్వారా లెక్కేసుకుంటే మొత్తం వీడియో వ్యూస్ 51.5 కోట్లు దాటినట్లు ఐసీసీ వెల్లడించింది.
ఇదీ చదవండి: టీమ్ఇండియాకు షాకిచ్చిన ఇంగ్లాండ్ మాజీ క్రికెటర్ మృతి
