IND vs PAK T20: టీ20 ప్రపంచకప్లో భాగంగా పాకిస్థాన్తో జరిగిన మ్యాచ్లో ఘోర ఓటమి చవిచూసింది టీమ్ఇండియా. పొట్టి ప్రపంచకప్లో పాక్పై భారత్కు ఎదురేలేదంటూ గర్వంగా చెప్పుకొన్న అభిమానులకు తీవ్ర నిరాశను మిగిల్చింది. ఈ మ్యాచ్లో దాయాది జట్టుకు కనీసం పోటీ ఇవ్వలేకపోయింది భారత్. దీంతో ఈ మ్యాచ్ అనంతరం కోహ్లీసేనపై గట్టి విమర్శలు వచ్చాయి. తాజాగా ఈ మ్యాచ్లో భారత్ ఓటమి గురించి స్పందించిన పాక్ మాజీ క్రికెటర్ ఇంజమామ్ ఉల్ హక్(Inzamam Ul Haq on India).. పాక్తో మ్యాచ్కు ముందే భారత్ భయపడిందని తెలిపాడు.
"పాక్తో మ్యాచ్ మొదలవ్వకముందే భారత జట్టు భయపడినట్లు కనపడుతోంది. టాస్ సమయంలో కోహ్లీ, బాబర్ అజామ్ ఇంటర్వ్యూ దగ్గర వారి బాడీ లాంగ్వేజ్ను బట్టి ఈ విషయం స్పష్టమవుతోంది. పాక్ కంటే భారత్ చాలా ఒత్తిడిలో కనిపించింది. రోహిత్ శర్మ ఔటయ్యాక కాదు.. మ్యాచ్ మొదలుకాక ముందే భారత్ ఒత్తిడిలో పడింది. టీమ్ఇండియా గొప్ప టీ20 జట్టు. కానీ ఈ మ్యాచ్లో వారి స్థాయికి తగ్గ ప్రదర్శన చేయలేకపోయారు. పాక్తో ఓడిపోయాక వారిపై తీవ్ర విమర్శలు వచ్చాయి. దీంతో మరింత ఒత్తిడికి గురయ్యారు. న్యూజిలాండ్తో జరిగిన మ్యాచ్లో స్పిన్నర్లు ఇష్ సోధి, శాంట్నర్లను కూడా వారు ఎదుర్కోలేకపోయారు."
-ఇంజమామ్, పాక్ మాజీ క్రికెటర్
ఈ మెగాటోర్నీలో తొలి రెండు మ్యాచ్ల్లో పాక్, న్యూజిలాండ్ చేతిలో ఓడిపోయి సెమీస్ రేసులో వెనకపడింది టీమ్ఇండియా. చివరి మూడు మ్యాచ్ల్లో అఫ్గాన్, నమీబియా, స్కాట్లాండ్పై గెలిచినా.. రన్రేట్ తక్కువైన కారణంగా సెమీస్ నుంచి పూర్తిగా నిష్క్రమించింది.
భారత్-పాక్ మ్యాచ్ రికార్డు
IND vs PAK T20 viewership: ఈ టోర్నీలో భారత్-పాక్ మ్యాచ్కు(IND vs PAK T20 viewers) విశేష ఆదరణ లభించింది. ఏకంగా 167 మిలియన్ల (16.7 కోట్లు) మంది ఈ మ్యాచ్ వీక్షించినట్లు ఐసీసీ తెలిపింది. టీ20 చరిత్రలో ఓ మ్యాచ్ను ఇంతమంది వీక్షించడం ఇదే తొలిసారి అని పేర్కొంది.
