IND VS AUS: మూడో వన్డేలో కోహ్లీ లుంగీ డ్యాన్స్.. ప్రపంచ రికార్డుకు అడుగు దూరంలో.. - kohli 2 runs away from historic record

ఆస్ట్రేలియాతో జరుగుతున్న మూడో వన్డేలో టీమ్ఇండియా స్టార్ బ్యాటర్ కోహ్లీ.. మైదానంలో లుంగీ డ్యాన్స్ వేసి ఆకట్టుకున్నాడు. దీనికి సంబంధించిన వీడియో సోషల్ మీడియాలో వైరల్ అవుతోంది. అలాగే ఈ మ్యాచ్లో రోహిత్-కోహ్లీ జోడీ మరో రెండు పరుగులు సాధిస్తే ప్రపంచ రికార్డును అందుకుంటుంది. ఆ వివరాలు..

IND VS AUS Third ODI Kohli Lungi dance video viral

IND VS AUS: మూడో వన్డేలో కోహ్లీ లుంగీ డ్యాన్స్.. ప్రపంచ రికార్డుకు అడుగు దూరంలో..

Published : Mar 22, 2023, 3:24 PM IST

టీమ్ఇండియా స్టార్ విరాట్ కోహ్లీ గురించి ప్రత్యేకంగా చెప్పనక్కర్లేదు. అతడు వరల్డ్ క్లాస్ బ్యాటర్ మాత్రమే కాదు.. మంచి ఫన్ ఎంటర్టైనర్ కూడా. అప్పుడప్పుడు ఫన్నీ ఎక్స్ప్రెషన్స్తో కామెడీ చేయడం, డ్యాన్స్లు వేయడం చేస్తూ ఎంటర్టైన్ చేస్తుంటాడు. వాటిని సోషల్మీడియా వేదికగా పంచుకుంటుంటాడు. అలానే ఫీల్డ్లోనూ ఫుల్ యాక్టివ్గా ఉంటూ.. తన బాడీ లాంగ్వేజ్, హావాభావాలు, డ్యాన్స్లతో ప్రేక్షకులను ఎప్పుడూ అలరిస్తూ ఉంటాడు. గతంలోనూ చాలా సార్లు మైదానంలో ఇలాంటివి చేశాడు. అయితే ఇప్పుడు మరోసారి తనదైన స్టైల్లో గ్రౌండ్లో స్టెప్పులేసి అభిమానులను ఆకట్టుకున్నాడు. తాజాగా చెపాక్‌ వేదికగా ఆస్ట్రేలియాతో జరుగుతున్న మూడో వన్డే ప్రారంభానికి ముందు విరాట్ కోహ్లీ గ్రౌండ్లో డ్యాన్స్‌ వేశాడు. బౌండరీ రోప్‌ వద్ద 'చెన్నై ఎక్స్‌ప్రెస్' మూవీలోని లుంగీ డ్యాన్స్‌ పాటకు స్టెప్పులు వేశాడు. దీనికి సబంధించిన వీడియో సోషల్‌ మీడియాలో ప్రస్తుతం తెగ వైరల్‌ అవుతోంది. దీనికి తెగ లైక్స్, కామెంట్స్ వస్తున్నాయి.

కాగా, ఈ మ్యాచ్‌లో టాస్‌ గెలిచిన ఆస్ట్రేలియా ఫస్ట్ బ్యాటింగ్కు దిగింది. రెండు మార్పులతో బరిలోకి దిగిన ఆసీస్.. తొలి రెండు వన్డేలకు అందుబాటులో లేని ఆసీస్‌ స్టార్‌ ఓపెనర్‌ డేవిడ్‌ వార్నర్ను జట్టులోకి తీసుకుంది. స్పిన్నర్‌ ఆగర్‌ను కూడా తుది జట్టులో అవకాశం కల్పించింది. ఇకపోతే ఈ సిరీస్‌లో అంతగా రాణించని కెప్టెన్ రోహిత్‌ శర్- విరాట్ కోహ్లీని ఓ ప్రపంచ రికార్డు ఊరిస్తోంది. వీరిద్దరూ కలిసి మరో 2 రన్స్ సాధిస్తే.. వన్డేల్లో అత్యంత వేగంగా 5 వేల పరుగులు పూర్తి చేసిన జంటగా నిలవనున్నారు.

వన్డేల్లో 85 ఇన్నింగ్స్‌లు ఆడిన కోహ్లీ-రోహిత్ జోడీ 4,998 రన్స్ను తమ ఖాతాలో వేసుకుంది. ఇక ఈ మూడో వన్డేలో మరో రెండు పరుగులు చేస్తే అత్యంత వేగంగా ఐదు వేల పరుగులు చేసిన జంటగా వీరు రికార్డుకెక్కుతారు. ప్రస్తుతానికి ఈ రికార్డు వెస్టిండీస్‌ జంట గ్రీనిడ్జ్‌-డెస్మండ్‌ హేన్స్‌ పేరిట ఉంది. వీరు ఈ ఘనతను 97 ఇన్నింగ్స్‌లో అందుకున్నారు. ఆ తర్వాత ఆస్ట్రేలియా జంట మాథ్యూ హెడెన్‌-గిల్‌క్రిస్ట్‌ 104 ఇన్నింగ్స్లో ఈ మైలురాయిని అందుకున్నారు.

ఇకపోతే ఈ లిస్ట్లో 4 వేల కన్నా ఎక్కువ పరుగులు చేసిన వారిని తీసుకుంటే.. 60 కంటే ఎక్కువ సగటు ఉన్న ఏకైక జంట రోహిత్‌-కోహ్లీనే. అలానే వన్డే క్రికెట్‌లో ఎక్కువ పరుగుల భాగస్వామ్యాన్ని నెలకొల్పిన జంట జాబితాలో రోహిత్‌-కోహ్లీ 8వ స్థానంలో ఉన్నారు. ఈ లిస్ట్లో సచిన్‌-గంగూలీ 8227 పరుగులతో అగ్రస్థానంలో ఉన్నారు.