టీమ్ఇండియా యువక్రికెటర్ ఇషాన్ కిషన్ ఐసీసీ ర్యాంకింగ్స్లో అదరగొట్టేశాడు. టీ20 ర్యాంకింగ్స్లో 68 స్థానాలు ఎగబాకి 689 పాయింట్లతో టాప్ 10లో చోటు సంపాదించాడు. అంతేకాదు.. టీ20 టాప్ 10 బ్యాట్స్మెన్ ర్యాంకింగ్స్లో నిలిచిన ఏకైక భారత ఆటగాడిగా నిలిచాడు. కిషన్ తర్వాత స్థానాల్లో కేఎల్ రాహుల్ (14), రోహిత్ శర్మ (16), శ్రేయస్ అయ్యర్ (17), విరాట్ కోహ్లీ (21) స్థానాల్లో కొనసాగుతున్నారు. రోహిత్, శ్రేయస్ చెరో స్థానం కోల్పోగా.. కోహ్లీ రెండు స్థానాలు దిగజారి 21కు చేరాడు. 818 పాయింట్లతో పాకిస్థాన్కు చెందిన బాబర్ ఆజామ్ నెంబర్వన్ టీ20 బ్యాటర్గా ఉన్నాడు. బౌలింగ్ ర్యాంకింగ్స్లో భువనేశ్వర్ కుమార్, చాహల్ తమ స్థానాలను మెరుగుపరుచుకున్నారు. భూవీ ఏడు స్థానాలు ఎగబాకి 11కు చేరగా.. చాహల్ నాలుగు స్థానాలు మెరుగుపడి 26కు చేరాడు. ఆస్ట్రేలియాకు చెందిన జాష్ హేజిల్వుడ్ 792 పాయింట్లతో ఫస్ట్ప్లేస్లో కొనసాగుతున్నాడు. ఉత్తమ టీ20 ఆల్రౌండర్గా అఫ్గానిస్థాన్కు చెందిన మహమ్మద్ నబీ నిలిచాడు.
టెస్టు ర్యాంకింగ్స్లో 754 పాయింట్లతో రోహిత్ శర్మ 7వ స్థానం, 742 పాయింట్లతో కోహ్లీ 10వ స్థానంలో నిలిచి.. టాప్-10 బ్యాట్స్మెన్ల జాబితాలో కొసాగుతున్నారు. ఇంగ్లాండ్కు చెందిన రూట్ 897 పాయింట్లతో అగ్రస్థానంలో కొనసాగతున్నాడు. బౌలర్లలో 830 పాయింట్లతో బూమ్రా మూడో స్థానానికి చేరగా.. 850 పాయింట్లతో అశ్విన్ రెండో స్థానంలో కొనసాగుతున్నాడు. టాప్ బౌలర్గా 901 పాయింట్లతో ఆస్ట్రేలియాకు చెందిన పాట్ కమిన్స్ నిలిచాడు. ఆల్రౌండర్ల జాబితాలో తొలి రెండు స్థానాల్లో స్పిన్ ద్వయం జడేజా, అశ్విన్లు నిలిచారు.
వన్డే ర్యాంకింగ్స్లో 811 పాయింట్లతో విరాట్ కోహ్లీ, 791 పాయింట్లతో రోహిత్ శర్మ మూడు, నాలుగు స్థానాల్లో నిలిచారు. బౌలింగ్లో 679 పాయింట్లతో బూమ్రా ఒక్కడే టాప్10లో నిలిచాడు. టాప్ బ్యాటర్గా 892 పాయింట్లతో పాకిస్థాన్కు చెందిన బాబర్ ఆజామ్ కొనసాగుతున్నాడు. 726 పాయింట్లతో న్యూజిలాండ్కు చెందిన ట్రెంట్ బౌల్ట్ టాప్ బౌలర్గా నిలిచాడు.
ఇదీ చూడండి : మళ్లీ మెరిసిన నీరజ్ చోప్రా.. ఈసారి జాతీయ రికార్డు కైవసం
