తొలిసారి నిర్వహిస్తున్న వన్డే ప్రపంచకప్ సూపర్ లీగ్ (ICC Super League)లో టీమ్ఇండియా ఐదో స్థానానికి చేరుకుంది. తాజాగా శ్రీలంకతో జరిగిన తొలి వన్డేలో 7 వికెట్ల తేడాతో ఘన విజయం సాధించిన ధావన్ సేన.. 39 పాయింట్లతో నిలిచింది. ఇక ఈ మ్యాచ్లో ఓడిన శ్రీలంక 13 పాయింట్లతో పట్టికలో చివరి నుంచి రెండో స్థానంలో ఉంది.
ఈ లిస్టులో ఇంగ్లాండ్ 95 పాయింట్లతో అగ్రస్థానంలో ఉంది. మొత్తం 15 మ్యాచ్లాడిన ఇంగ్లాండ్ 9 విజయాలు నమోదు చేసింది. ఇక జింబాబ్వేతో సిరీస్లో భాగంగా తొలి రెండు వన్డేలను గెలుచుకున్న బంగ్లాదేశ్.. 70 పాయింట్లతో రెండో స్థానంలో నిలిచింది.
ఏంటీ సూపర్ లీగ్..
2023 వన్డే ప్రపంచకప్ అర్హత కోసం 2020 జులై 30న ఈ సూపర్ లీగ్ను ప్రారంభించింది ఐసీసీ. ఇందులో భాగంగా తొలి మ్యాచ్ సౌంథాప్టన్ వేదికగా ఇంగ్లాండ్, ఐర్లాండ్ మధ్య జరిగింది. ఐసీసీ శాశ్వత సభ్యదేశాలైన 12 జట్లతో పాటు నెదర్లాండ్స్ ఈ లీగ్లో పాల్గొంటున్నాయి. ప్రతి జట్టు స్వదేశంలో మూడు సిరీస్లు, విదేశాల్లో మూడు సిరీస్లు ఆడాల్సి ఉంటుంది.
ఈ సూపర్ లీగ్ ద్వారా భారత్లో జరిగే 2023 ప్రపంచకప్ అర్హత జట్లను నిర్ణయించనున్నారు. వన్డే ర్యాంకింగ్స్లో తొలి 7 స్థానాల్లో ఉన్న జట్లు నేరుగా ప్రపంచకప్కు అర్హత సాధిస్తాయి. మిగిలిన టీమ్ల అర్హత కోసం ఈ టోర్నీ నిర్వహించనున్నారు.
ఇదీ చదవండి: కెప్టెన్సీ ఛేంజ్.. ఇది మీరు గమనించారా!
