ICC Changed Stump Out Rule : క్రికెట్ రూల్స్లో పలు కీలక మార్పులు చేసింది ఇంటర్నేషనల్ క్రికెట్ కౌన్సిల్(ఐసీసీ). వికెట్‌ కీపర్ చేసే స్టంపౌట్ అప్పీళ్లపై నిబంధనలను సవరించింది. దీని ప్రకారం స్టంపౌట్ అప్పీళ్ల రివ్యూ సమయంలో థర్డ్ అంపైర్ స్టంపౌట్ను మాత్రమే చెక్ చేయాల్సి ఉంటుంది. క్యాచ్ ఔట్ను చెక్ చేయకూడదు. స్టంపౌట్ను స్పష్టంగా చూపించే సైడ్ ఇమేజ్ రీప్లేలను మాత్రమే అంపైర్ ఉపయోగించుకోవాల్సి ఉంటుంది. ఈ నిబంధన గతేడాది 12 నుంచే అమల్లోకి వచ్చినట్టు ఐసీసీ తెలిపింది.
ఇంతకుముందు వరకు ఇలాంటి అప్పీళ్లపై స్టంపౌట్తో పాటు బంతి బ్యాట్కు తాకిందా లేదా అనే విషయాన్ని కూడా థర్డ్ అంపైర్ పరిశీలించేవారు. ఏదైనా టీమ్ స్టంపౌట్ అప్పీల్ చేస్తే థర్డ్ అంపైర్- స్టంపౌట్తో పాటు క్యాచ్ను సైతం చెక్ చేసేవారు. ఒకవేళ బ్యాట్కు బంతి తగిలి కీపర్ క్యాచ్ పడితే ఔట్ ఇచ్చేవారు. దీంతో బౌలింగ్ జట్టు ఒకదాని కోసం రివ్యూ కోరి మరో విధంగా లాభపడేది. ఇక ఈ విషయం తెలిసిన కీపర్లు కూడా ఈ లూప్హోల్ను ఉపయోగించుకుని తెలివిగా రివ్యూ కోరేవారు. గతేడాది భారత్తో సిరీస్ సందర్భంగా ఆస్ట్రేలియా కీపర్ అలెక్స్ కేరీ ఇలాగే పదేపదే స్టంపౌట్కు రివ్యూ కోరాడు. టీమ్ డీఆర్ఎస్లను వినియోగించుకోకుండానే స్టంపౌట్ అప్పీల్ చేసి క్యాచ్ ఔట్ రివ్యూలు సైతం తీసుకున్నాడు. ఈ విధానంతో బ్యాటింగ్ టీమ్కు నష్టం జరిగేది. ఇప్పుడు మాత్రం టీవీ అంపైర్ అవేవీ చెక్ చేయకుండా- కీపర్ సరిగ్గా స్టంపౌట్ చేశాడా, బ్యాటర్ క్రీజులోనే ఉన్నాడా లేదా అనేది మాత్రమే పరిశీలించాల్సి ఉంటుంది.
ఈ స్టంపౌట్ రిఫరల్స్‌ నిబంధనలతో పాటు కంకషన్ సబ్‌స్టిట్యూట్‌ నిబంధనలలో మరింత స్పష్టతనిచ్చింది ఐసీసీ. కంకషన్కు గురైన ప్లేయర్పై బౌలింగ్ నిషేధం ఉంటే అతడి స్థానంలో వచ్చే సబ్స్టిట్యూట్ను బౌలింగ్కు అనుమతించరని ఐసీసీ స్పష్టం చేసింది. దీంతో పాటు మైదానంలో గాయపడ్డ ప్లేయర్కు చికిత్స కోసం నిర్దేశించిన సమయాన్ని నాలుగు నిమిషాలకు పరిమితం చేసింది.
