టీమ్ఇండియా మాజీ సారథి ఎంఎస్ ధోనీతో తనకున్న అనుబంధం గురించి సురేశ్‌ రైనా మరోసారి గుర్తు చేసుకున్నాడు. గుజరాత్‌ లయన్స్‌కు సారథ్యం వహిస్తున్నప్పుడు జరిగిన ఓ సరదా సంఘటన గురించి వివరించాడు. ఐర్లాండ్‌లో ధోనీభాయ్‌తో శీతల పానీయాలు తెప్పించుకున్నానని, కిట్ బ్యాగు మోయించానని వెల్లడించాడు.
2016లో చెన్నై సూపర్‌కింగ్స్‌పై నిషేధం విధించడం వల్ల 'రైజింగ్‌ పుణె 'కు ధోనీ, 'గుజరాత్‌ లయన్స్‌'కు రైనా సారథ్యం వహించారు. అప్పుడు పుణెతో ఆడినప్పుడు విచిత్రమైన అనుభూతి కలిగిందని రైనా పేర్కొన్నాడు.
"అవును, అప్పుడు భావోద్వేగానికి గురయ్యాను. రాజ్‌కోట్‌లో ఆడటం నాకు గుర్తుంది. అశ్విన్‌ బౌలింగ్‌ చేస్తున్నాడు. నాన్‌స్ట్రైకర్‌ ఎండ్‌లో మెక్‌కల్లమ్‌ ఉన్నాడు. నేను బ్యాటింగ్ చేస్తున్నా. ధోనీ భాయ్‌ కీపింగ్‌ చేస్తున్నాడు. డుప్లెసిస్‌ ఫస్ట్‌ స్లిప్‌లో నిలబడ్డాడు. వాళ్లంతా అప్పటివరకు సీఎస్క్ జట్టులో ఉన్నవారే. అందుకే, మా పొరుగింటి వాళ్లతో లీగ్‌ ఆడినట్టు అనిపించింది. పైగా నేను క్రీజులోకి వెళ్లినపుడు 'రండి.. రండి.. కెప్టెన్ సాబ్‌' అని ధోనీ పలకరించాడు. 'వస్తున్నాను భాయ్‌.. ముందు మీరు జరగండి' అని నేను బదులిచ్చాను" అని రైనా తెలిపాడు.
2018లో ఐర్లాండ్‌ వెళ్లినప్పుడు మరో సంఘటన జరిగిందని రైనా చెప్పాడు. "ఆ మ్యాచులో ధోనీ భాయ్‌ నాకు శీతల పానీయాలు అందించాడు. నేను ప్రతిసారీ గ్లోవ్స్‌, బ్యాట్ల కోసం పిలుస్తుండటం వల్ల అతడు నా కిట్‌బ్యాగ్‌ మొత్తం మోసుకొచ్చాడు. 'ఏం కావాలో తీసుకో. మళ్లీ మళ్లీ పిలవకు. ఇక్కడ చలిగా ఉంది' అని అన్నాడు. నేను నవ్వుతూ.. 'ఐతే ఓ పనిచేయి. నా హ్యాండ్‌ గ్రిప్‌ తీసుకుకొని రా' అని చెప్పాను. 'భలే మనిషివి దొరికావు. ముందు నీళ్లు తాగు. తీసుకొస్తా,' అని వెళ్లాడు. ఈ రోజు మహీభాయ్‌ నాకు దొరికాడు అని సంతోషించా' అని రైనా పేర్కొన్నాడు.
ఇదీ చదవండి: ఒక్క మ్యాచ్.. రెండు ఘనతలు- ధావన్ అందుకునేనా?
యువీ స్థానంలో నేను..
పరిమిత ఓవర్ల సిరీసులో చెప్పుకోదగ్గ ప్రదర్శన చేసిన రైనా.. టెస్టుల్లో మాత్రం తక్కువ మ్యాచ్లకే పరిమితమయ్యాడు. తన టెస్టు అరంగేట్రం ఎలా జరిగిందనే విషయాన్ని రైనా చెప్పుకొచ్చాడు. మ్యాచ్కు ముందు రోజు రాత్రి యువరాజ్ సింగ్ తనతో చెప్పిన మాటలను గుర్తు చేసుకున్నాడు. యువీ ఆడాల్సిన మ్యాచ్లో తానెలా ఆడాడో వెల్లడించాడు.
"మ్యాచ్కు ముందు రోజు రాత్రి 1 గంటల సమయంలో యువీ నాకు ఫోన్ చేశాడు. తనకు కడుపులో నొప్పిగా ఉందని, కొంత అసౌకర్యంగా ఉందని.. నిద్ర పట్టడం లేదని చెప్పాడు. లంకతో మ్యాచ్కు అందుబాటులో ఉండకపోవచ్చని తెలిపాడు. కాబట్టి, నన్ను సిద్ధంగా ఉండమని సూచించాడు. దీంతో ఆ రోజు రాత్రి నాకు నిద్ర పట్టలేదు. టెస్టులో తొలి మ్యాచ్ ఆడబోతునందుకు సంతోషంగా అనిపించింది."
-సురేష్ రైనా, టీమ్ఇండియా మాజీ క్రికెటర్.
అరంగేట్ర మ్యాచ్లోనే సెంచరీతో మెరిశాడు రైనా. 12 ఫోర్లు, 2 సిక్స్ల సాయంతో 120 పరుగులు చేశాడు. మాస్టర్ బ్లాస్టర్ సచిన్ తెందుల్కర్ కూడా ఈ మ్యాచ్లో డబుల్ సెంచరీతో చేలరేగాడు. మొత్తానికి ఈ మ్యాచ్ డ్రాగా ముగిసింది.
రైనా శతకం అనంతరం యువీ అతన్ని గట్టిగా హత్తుకున్నాడు. 'ఇది నీ రోజు, వెల్ డన్, నీ బ్యాటింగ్ నాకెంతో సంతోషాన్నిచ్చింది' అని మెచ్చుకున్నాడు.
ఇదీ చదవండి: IND vs SL: టాస్ గెలిచి బ్యాటింగ్ ఎంచుకున్న శ్రీలంక
